१) काकड़ आरती

आज्जी पहाटे पहाटे उठायची ...
कार्तिक स्नान महापुण्यवान अस काही तरी म्हणायची ....
आम्ही साखर झोपेत असताना, ती थंडगार पाण्याने अंघोळ करायाची .....

अजुन ही आठवत आहेत ते अस्पष्टसे मन्त्र...अजुन ही आठवत आहे ती आजीची गड़बड़....
झोपेतून डोळे पुसत पुसत उठलेली आम्ही तिघ चौघ नातवंड .....ती आज्जीच्या हातातली फुलांची परडी ,त्यातल्या २-४ उदबत्या अन् पारिजातकाच्या फुलाचा तो मंद मंद सुगंध ......

मग

काळ्या रामाच्या मंदिराताल्या त्या तीन मूर्ति.... दही दूध तुपाने माखलेल्या ......टाळ मृदुन्गाचे स्वर.... एक सुंदरशी काकड़ आरती .

" काकड आरती परमात्मया रघुपती राजाराम रघुपती
जीवीजीवा प्रकाशली कैची निजात्म ज्योती|| धृ ||
.
त्रिगुण काकडा द्वैत घृते तिंबिला द्वैत घृते तिम्बिला
उजळली निजात्म ज्योती तेणे जळोनिया गेला || १ ||
.
काजळी ना मैस नाही जळमळ डळमळ नाही जळमळ डळमळ
अवनी ना अंबर प्रकाश निघोट निश्चळ || २ ||
.
उदयो ना अस्तु तया बोध प्रतःकाळी तया बोध प्रतः काळी
रामी रामदास सहजी सहज ओवाळी || ३ ||
.
|| जय जय रघुवीर समर्थ ||

......आणि इतर ५-६ आज्या ... भाव मग्न होउन ,तल्लीन होवून गाणारया

"ए आज्जी ,
दही दूध खायचं सोडून वाया का घालवत आहेत???
.
.
रामच अंग दहि दुधानं चिकट होत असेल ना त्याला आवडत का तस्???
.
.
इथला राम काला ..अन् तिथला गोरा अस का???
.
.
राम नक्की काला की गोरा ???
.
.
सांग ना"
.
.
असले हे आमचे बालिश प्रश्न ......
अन् सगळ्याना पुरून उरणार तिचं साध सोप्पा स उत्तर ....
...
...

'एक स्मित हास्य '....
....
....
एक समाधानाचा
धन्यतेचा भाव
उभे राहिलेले रोमांच ....आज्जी च्या डोळ्यात तरळणारे ते दोन अश्रुंचे मोती
मग

॥ कल्याण करी रामराया कल्याण करी देवराया ॥
॥ जनहित विवरी ,कल्याण करी राम राया ॥

.................................ते स्मित हास्य तेव्हाही उलगडलं नाही अजुन ही उलगडलं नाही...............
...
...
आत्ता आज्जी नाही...त्या ५-६ आज्या ही नाहीत
तो कार्तिक तसाच ...त्यातल ते थंड पाणी तसंच ...
आजी म्हणायची तेच मन्त्र
आमचा जागे वर मात्र दुसरं कोणी तरी साखर झोपेत...
ती काकड़ आरती ........ते स्वर ..........तो पारिजातकाचा सुगंध मात्र तसाच
काला राम ही तसाच ...इतकी वर्ष दुधातुपात नाहुनही अजुन ही तितकाच काला

पण
त्याच्या चहर्‍यावर ही एक तसंच स्मित हास्य
अगदी तसाच तो धन्यतेचा समाधानाचा भाव
...
...
...
हे स्मित हास्य कधी उलगडणार आहे की नाही रामच जाणे !!!

॥ कल्याण करी रामराया कल्याण करी देवराया ॥
॥ जनहित विवरी ,कल्याण करी राम राया ॥

Posted by पारिजातक - शनिवार ६ सप्टेंबर २००८ -

( हा अनुभव आधी मी माझ्या ब्लोग वर प्रकाशित केला होता , पारिजातक हे माझे अजुन एक टोपण नाव आहे )