थरथरले सुरात ओठ कुणाचे अन बासरी विरघळली
सतारीच्या उत्सुक अधारांवर कोणता हा राग आहे ?
कोणीही मेहेफीलीत नाही... त्या मेहेफीली ढगांच्या
पौणिमेच्या पापण्यांवर कोणी छेडलेली आग आहे ?

कवितांच्या नाजुक वेलावर उठलाय की हळवा शहारा
पश्चिमेच्या संध्येचीही ह्या सुरांना दाद आहे...
अनोळख्या लयीत बुडाला तो श्वासातला मालकंस
केसातल्या ओल्या वीणेची ह्या तरंगांना साद आहे....

कोणी छेडले ?
कोणी वेढले ?
हे सुर वादळी कोणी काढले ?
...............................हि चर्चा सुरासुरात आहे....
त्या सुरांना मी म्हणालो.....
.....................लेक माझी येत आहे !

आली तर....
पण हि कविता लिहल्यानंतर सुमारे ५ महिन्यांनी....

मारवा !
आता साडेचार वर्षाची आहे.....