फौज आहे

Submitted by सतीश वाघमारे on 11 July, 2009 - 16:26

( काफिया न वापरता रचनेचा प्रयत्न आहे, मार्गदर्शन आणि सूचनांचं अर्थातच स्वागत आहे ! )

ढगांची नभी वाढती फौज आहे
इथे आठवांची मनी फौज आहे

मला एकटयानेच जिंकून गेला
वृथा आणली केवढी फौज आहे

नवी शांतिदूतासवे लष्करेही
अहिंसा, म्हणे कालची फौज आहे !

मनासारखे लाभले दान थोडे
उभी मागण्यांची नवी फौज आहे

तसा शूर आहे तिचा हा अबोला
सवे आसवांची छुपी फौज आहे !
************************
आणि एक स्फुट द्विपदी...

तुला भेटणे वेगळी मौज आहे
मला रोखण्या केवढी फौज आहे !

गुलमोहर:

मराठी गझल

शेअर करा

पूर्ण गझल

पूर्ण गझल छान आहे.
दुसरा शेर समजला नाही.
शेवटचा आणि स्फूट सुंदर.
..सुसंगती सदा घडो, सुजनवाक्य कानी पडो..

Submitted by अलका_काटदरे on 12 July, 2009 - 09:44

अलका, तुम्ह

अलका,
तुम्ही वेळ देऊन दखल घेतलीत, मनःपूर्वक आभार !

Submitted by सतीश वाघमारे on 13 July, 2009 - 14:02

मला ही ग़ज़ल आवडली. म्हणून मी तुझे इतर साहित्य वाचले. ते सुद्धा खूप आवडले. रसिकांनी फारशी दखल घेतली नाही याचे आश्चर्य वाटले नाही. कारण इथे फक्त साहित्यमूल्य इतकाच निकष नसतो; असा माझा समज आहे. (कदाचित गैर असू शकेल.)

प्रस्तुत गज़ल विषयी बोलायचे झाले तर माझ्यामते सहज सुंदर आहे. कुठेही द्वीपदी रचताना ओढाताण झालेली नाही. यतिभंग, मात्रादोष सकृतदर्शनी आढळत नाही.

<<<मला एकटयानेच जिंकून गेला
वृथा आणली केवढी फौज आहे

नवी शांतिदूतासवे लष्करेही
अहिंसा, म्हणे कालची फौज आहे !>> या द्वीपदी जास्त आवडल्या.

<<<तुला भेटणे वेगळी मौज आहे
मला रोखण्या केवढी फौज आहे !>>> ही द्वीपदीसुद्धा अत्यंत आवडली; पण ती वेगळी का ठेवली आहे ते समजले नाही.

शरद
.............................
"तुजसारखे कवी जे येतात रोज 'खावर'
बसतात गप्प सारे कोलाहलात इथल्या!"
............................

Submitted by शरद on 14 July, 2009 - 00:21