स्वित्झर्लंड भाग १ - होहेर कास्टन

Submitted by kulu on 26 December, 2014 - 06:29

उच्च शिक्षणासाठी स्वित्झर्लंडला जाण्याचा योग आला. तिथे राहुन टुरिस्टांचा एक आणि स्विस लोकांचा एक, अशी स्वित्झर्लंड ची दोन्ही सुंदर रुपं पहायला मिळाली. मुळात दिनेशकडुन खुप ऐकलं होतं. त्यामुळे बघायची खुप उत्सुकता होतीच. पण मी बैठ्या प्रकृतीचा (आळशी म्हटलं तरी चालेल) असल्याने आयती संधी आल्याशिवाय कुठेही जाणं जमत नाही :फिदी: सुदैवाने माझी घरमालकीण मार्था ही भटक्या प्रवृत्तीची असल्याने तिने पुर्ण स्वित्झर्लंड पालथा घातला आहे. त्यामुळे तिने मला प्रवासाचे पुर्ण प्लॅन बनवुन द्यायला सुरुवात केली. शिवाय "उठ जरा बुड हलव. मी सांगतेय तो भाग बघुन ये आज" हे पालुपद असायचंच! त्यामुळे सुर्यप्रकाश आहे असं बघायचं, मार्थाकडुन प्लॅन बनवुन घ्यायचा आणि भटकायला सुरु करायचं असा सपाटाच लावला मी. शिवाय वयाने २५ च्या आतला असल्याने मला विशेष सवलतीचा पासही मिळालाय, त्यामुळे मी पुर्ण स्वित्झर्लंड मधे कुठेही पब्लिक ट्रान्स्पोर्ट त्या पास मुळे वापरु शकतो. पहिली गोष्ट जाणवली ती म्हणजे या देशाला निसर्गाने भरपुर दान दिलंय आणि सुदैवाने या देशाची झोळी फाटकी नसल्याने जे निसर्गदत्त आहे ते तसंच्या तसं जपलं देखील गेलंय!

मार्थाने पहिला प्लॅन बनवुन दिला तो, ती जिथे वाढली त्या अप्पेनझेल या कॅन्टॉन मध्ये जाण्याचा (मार्था भारतात असती तर कोल्हापुरात परफेक्ट फिट झाली असती, मी पण माझ्या विदेशातील मित्रांची भारत दर्शन टुर पन्हाळ्यापासुनच सुरु करतो ;) ), त्या ट्रिप चे फोटो इथे देतोय. अप्पेनझेल कॅन्टॉन मधलं आल्प्सचं कळसुबाई शिखर म्हणजे "होहेर कोस्टन" असं म्हणायला काही हरकत नाही. तिथुन समोर आल्प्स खाली स्वित्झर्लंड आणि ऑस्ट्रियाचा भाग दिसतो!

माझ्या मोबाईलचा कॅमेरा आणि माझी फोटोग्राफी हे दोन्ही अतिसामान्य आहेत. माबो तल्या खुप चांगल्या फोटोग्राफर्सनी अशा ठिकाणी जायला हवे. कारण स्वित्झर्लंड चा निसर्ग दोन प्रकारचा आहे एक म्हणजे "सुंदर" आणि दुसरा म्हणजे "अतिसुंदर"

१. अतिशय सुंदर सोनसळी दिवस. अप्पेनझेल कॅन्टॉन चे हे अप्रतिम दर्शन. छोट्या छोट्या हिरव्या टेकड्या उजळुन निघाल्या होत्या. मला नेहमी वाटतं की हे युरोपातलं ऊन म्हणजे शुध्द सारंगाचं, विंदांच्या शब्दात सांगायचं तर "शिरशिरणारं" ऊन!

२. स्वित्झर्लंड मध्ये प्रत्येक कॅन्टॉन मध्ये घरांची रचना वेगवेगळी आहे! अप्पेनझेल मधले हे टिपिकल घर. मुळात शेतकरी आणि गुराख्यांचा प्रदेश. त्यामुळे घराला लागुनच गोठा.

३. होहेर कास्टन च्या पायथ्याशी पोहोचलो. इथुन वर न्यायला केबल कार आहे. ती दिसतेय बघा.

४. आता केबल कार मधला प्रवास सुरु झाला. जसजसे वर जाऊ तसतसे खाली निसर्गाचा पट उलगडत जातो!

५. हा ऑस्ट्रियाचा भागही एका बाजुला दिसतो

६.पोहोचलो बरं वर आता

७. तिथे वर हे फिरते रेस्टॉरंट. तिथे बसुन स्विस रोष्टी आणि रिवेल्ला चा आस्वाद घेत भोवतालचा आल्प्स बघता येतो. ३६० डीग्री व्ह्यु!

८. आणि वरुन दिसणारा हा नजारा

९. हा माझा सगळयात आवडता नजारा. अगदी कोंदणात बसवलेल्या निळ्याशार स्फटिकाप्रमाणे मधे दोन कड्यांच्या मध्ये अलगद विसावलेले हे तळे

शब्दखुणा: 
Group content visibility: 
Public - accessible to all site users

कुलु.. प्रत्येक फोटोची वेगवेगळी लिंक द्यावी लागेल. त्यासाठी तो फोटो ओपन केल्यावर ( पिकासामधे ) लिंक टू धिस फोटो.. असा टॅग असेल. तिथली स्ट्रींग इथे कॉपी पेस्ट करावी लागेल.

धन्यवाद दादाश्री,हिम्स्कूल आणि दिनेश!
आज पहिल्यांदाच फोटो टाकलेत, आता कसं टाकायचे फोटोज ते कळले, अजुन फोटोज नक्की पोस्टेन! :)

मला नेहमी वाटतं की हे युरोपातलं ऊन म्हणजे शुध्द सारंगाचं, विंदांच्या शब्दात सांगायचं तर "शिरशिरणारं" ऊन! >>>> क्या बात है .. :)

सुर्रेख फोटो - मस्त लिखाण ... :)

मी तिथे आहे अशी कल्पना मनी करूनच सारी चित्र पाहिली मी, कुलू. सुंदरतेच्या व्याख्येच्या पल्याड सारे आहे हे. निसर्गाची किमया प्रत्येक फोटोतून अशी काही उलगडात गेली आहे की वाटू लागले यातील प्रत्येक फोटो कॉम्प्युटरवर वॉलपेपर म्हणून वापरला जावा.

वर्णनही असेच खेळकर वृत्तीने सहज उतरले आहे.

सर्वांचे खुप धन्यवाद! :)
सुंदरतेच्या व्याख्येच्या पल्याड सारे आहे हे>>>>> अगदी खरं बोल्लात मामा. खरंच तसं आहे इथे. कोल्हापुरला आलो की आण्खी फोटोज पाहु आपण नक्की!

धन्यवाद सर्वांचे! :)
चिन्नु , मंदिराचे फोटो नाहीत माझ्याकडे. कधी काढलेच नाहीत खरं तर. मला वाटतं मामा आणि दिनेश या दोघांकडे असतील!

छान आहेत फोटो. मार्थाने पुढला प्लान बनवून दिला आणि तू जाऊन आलास की फोटो आम्हाला दाखवत राहा :-)

रोश्टी अन रिवेल्ला , :)
रोश्टी इथे करता येते , पण आय मिस रिवेला. :)
स्विस मस्त आहेच. आणि तिथे प्रवास करणे सुलभ.
आने दो ! :)

Pages