अपुलीच आपल्याला छळतात माणसे ही (तरही)

Submitted by प्राजु on 28 March, 2011 - 22:34

वेठीस नेहमी का धरतात माणसे ही??
अपुलीच आपल्याला छळतात माणसे ही

शेंदूर फ़ासलेल्या दगडास ताट भरले
गरिबास घास देण्या, अडतात माणसे ही

भेटून नास्तिकाला, तक्रार सांगतो 'तो'
"हा जीव ही नकोसा.. करतात माणसे ही!"

तडकून काच जाते नात्यांमधील जेव्हा
तुकड्यात बिंब बघण्या, उरतात माणसे ही

करशील तू अपेक्षा त्यांच्याच पूर्ण जोवर
पूजा तुझीच येथे, करतात माणसे ही!

माझ्याच कातडीच्या घालूनिया वहाणा
'पायांस बोचती!' मज म्हणतात माणसे ही..

पाहू नकोस 'प्राजू', मागे अता जराही
मार्गावरी यशाच्या नडतात माणसे ही!!

- प्राजु

गुलमोहर: 
मराठी गझल
शेअर करा

व्वा.... प्रत्येक शेर खणखणीत.

माझ्याच कातडीच्या घालूनिया वहाणा
'पायांस बोचती!' मज म्हणतात माणसे ही...... फार छान शेर. Happy

Submitted by डॉ.कैलास गायकवाड on 28 March, 2011 - 23:33

भेटून नास्तिकाला, तक्रार सांगतो 'तो'
"हा जीव ही नकोसा.. करतात माणसे ही!"
मस्त आहे हा!! एकदम सहज!! Happy

गरिबास घास देण्या, अडतात माणसे ही असं म्हणायचंय का?

Submitted by आनंदयात्री on 29 March, 2011 - 01:25

सर्वांचे मनापासून आभार.
आनंदयात्री, हो.. देण्या च हवंय तिथे. करतेय बदल.धन्यवाद.

Submitted by प्राजु on 29 March, 2011 - 09:14

आपल्या -----
माझ्याच कातडीच्या घालूनिया वहाणा
'पायांस बोचती!' मज म्हणतात माणसे ही..

या कडव्यानंतर मला सुचलेल्या दोन ओळी ......

थांबून जरी पुसशील काय दुखः आहे
प्रगती तुझी सलते बरळतात माणसे हि !!

जाऊ दे मुळ गझलच छान आहे....
खूपच सुरेख गझल आवडली !!!!!!!!!!!

Submitted by किंकर on 29 March, 2011 - 09:56

भेटून नास्तिकाला, तक्रार सांगतो 'तो'
"हा जीव ही नकोसा.. करतात माणसे ही!"

व्वा! ultimate!
बाकी शेर पण छान

Submitted by रामकुमार on 4 April, 2011 - 15:48