प्रकाश"चित्रगीत" – नाविका चल तेथे . . .

वेगवेगळी फुले उमलली... या थीमला दिलेल्या भरघोस प्रतिसादानंतर त्याच प्रकारची अजुन एक थीम घेऊन येत आहे "प्रकाशचित्रगीत". यात एक मराठी गाणे आणि त्या गाण्याला अनुरूप असा मी काढलेला एक(च) फोटो असेल. (प्रत्येक आठवड्याला एक फोटो आणि एक गाणे प्रदर्शित करण्याचा विचार आहे. अर्थात "ओव्हरडोस" होणार नाही याची नक्कीच काळजी घेईन. :-).) आशा आहे कि हि थीमही पूर्वीच्या इतर थीमप्रमाणे आवडेल.

"भंडारदरा" प्रवरा नदीवर बांधलेले ब्रिटीशकालीन धरण. अहमदनगर जिल्ह्यातील निसर्गसौंदयाने ओतप्रोत भरलेले एक अप्रतिम ठिकाण. खरंतर कुठल्याही ऋतुत येथे जा, पण पावसाळ्यातील याचे सौंदर्य वर्णनातीत असते. सभोवती असलेल्या हिरवागार निसर्ग पहात प्रिय व्यक्तीच्या सहवासात "ऑर्थर तलावात" होडीतुन एक फेरी मारताना नकळत गीत ओठावर येते........
=================================================
=================================================
नाविका चल तेथे, दरवळते जेथे चांदणे
नाविका......

जिथे उन्हाचा स्पर्शहि लोभस
सरगम गुंजत झरतो पाऊस
फुलासारखे तिथे फुलावे, तुझे नि माझे जिणे
नाविका चल तेथे ......

मखमालीची जिथली हिरवळ
मुळी न सुकते सुमनांचे दळ
अवकाशाच्या तारा छेडी, वारा मंदपणे
नाविका चल तेथे ......

प्रिय नयनातील, भाव वाचता
चुकुन दिसावा मोर नाचता
दूर देशीचे बुलबुल यावे, कधी मधी पाहुणे
नाविका चल तेथे ......

स्वर - आशा भोसले
(चित्रपट: एकटी)
=================================================
=================================================