पालखीत पादुका, जिवंत लोक चालतात

Submitted by बेफ़िकीर on 7 May, 2010 - 05:20

माझ्या वैयक्तिक खाडाखोडीपैकी वेगळीच गझल आधी चुकून इथे कॉपी पेस्ट झाली होती.

अभिप्रेत गझल देत आहे. ही गझल मी व अजय जोशी आयोजीत करत असलेल्या गझल सहयोगच्या मुशायर्‍यात फेब्रुवारी महिन्यात सादर केली होती.
-------------------------------------------------------------------------------

पालखीत पादुका, जिवंत लोक चालतात, हाल हाल पाहुनी कमाल वाटते
पांडुरंग, माउली, तुका मिळून एकजात नाद लावतात यात चाल वाटते

आमचा गुलाल लाल हिंदवी रुपातला, तुझा गुलाल वेगळाच पाकधार्जिणा
फक्त दंगलीत मात्र आमच्याकडील वा तुझ्याकडील रक्त लाल लाल वाटते

आजवर पुण्यात शांतताच नांदली, जगात आमचे शहर कुणास माहिती नसे
स्फोट जाहला, अनेक लोक संपले, अता पुण्यात राहणे कसे विशाल वाटते

राजकारण्या पहा विशाल जाहिरात ही तुझाच वाढदिवस साजरा करायला
गोष्ट वेगळी म्हणा, तुझ्यामुळेच वाहतूक तुंबते, शहर अती बकाल वाटते

कोंडदेव की जिजाउ, रामदास की तुका, अशावरून आज रक्त सांडतो अम्ही
बायका धुणी धुतात, पोरटी जुगार खेळतात, हे अम्हास बेमिसाल वाटते

एक बुद्ध जाहला नि एक भीम जाहला, पुन्हा न आमच्यात जाहले कुणी तसे
वारसे म्हणून मागुनी मते जगाकडे निवडणुकीत लागला निकाल वाटते

मुंज लागताच तो बटू जरा सुधारतो, धरून जानवे हळूच पेग लावतो
बाप सांगतो मुलास 'चोख तंगडी', मधेच बायको म्हणे 'अहो हलाल वाटते'

'बेफिकीर'ला सभागृहात बोलवायचे असेल तर विचार कर, विचार कर जरा
एक एक शेर मुखवट्यास फाडतो, ज्वलंत ओळ ओळ पेटती मशाल वाटते

-'बेफिकीर'!

गुलमोहर: 
मराठी गझल
शेअर करा

भ्रमणध्वनीवर ऐकताना वेगळीच भासली होती........मात्र आता प्रत्येक ओळीचा चांगला अर्थ लागतोय...

एक बुद्ध जाहला नि एक भीम जाहला, पुन्हा न आमच्यात जाहले कुणी तसे
वारसे म्हणून मागुनी मते जगाकडे निवडणुकीत लागला निकाल वाटते

ही द्विपदी खासच.

डॉ.कैलास

Submitted by डॉ.कैलास गायकवाड on 7 May, 2010 - 09:57

सर्वांच्या प्रेमळ प्रोत्साहनाचे मनापासून अनेक आभार!

गिरीश, आपल्या प्रेमाचे विशेष आभार!

-'बेफिकीर'!

Submitted by बेफ़िकीर on 10 May, 2010 - 03:04

एक बुद्ध जाहला नि एक भीम जाहला, पुन्हा न आमच्यात जाहले कुणी तसे
वारसे म्हणून मागुनी मते जगाकडे निवडणुकीत लागला निकाल वाटते>> जबरी............ बेफिकीर....... क्या बात है बॉस.

Submitted by बकासूर on 23 February, 2012 - 01:06

सुंदर गझल.

एक बुद्ध जाहला नि एक भीम जाहला, पुन्हा न आमच्यात जाहले कुणी तसे
वारसे म्हणून मागुनी मते जगाकडे निवडणुकीत लागला निकाल वाटते>> खासच

Submitted by सस्मित on 23 February, 2012 - 02:20

छान

Submitted by जागोमोहनप्यारे on 23 February, 2012 - 03:20

फारच सुंदर गज़ल!

आमचा गुलाल लाल हिंदवी रुपातला, तुझा गुलाल वेगळाच पाकधार्जिणा
फक्त दंगलीत मात्र आमच्याकडील वा तुझ्याकडील रक्त लाल लाल वाटते>>> हा शेर सर्वांत खास वाटला मला. 'व्वा!' असं मोठयाने निघून गेलं तोंडातून. (जरा जास्तच मोठयाने... आजूबाजूची चार माणसं दचकून बघायला लागली माझ्याकडे Happy )

Submitted by मुग्धमानसी on 11 July, 2013 - 04:43

एक बुद्ध जाहला नि एक भीम जाहला, पुन्हा न आमच्यात जाहले कुणी तसे
वारसे म्हणून मागुनी मते जगाकडे निवडणुकीत लागला निकाल वाटते >>>

या शेरात असहाय्यता, कणव आली असती तर बरं वाटलं असतं. ज्यांचं मरण त्यांनीच भोगायचं आहे, आपला तिथे काहीच संबंध नाही, ते लोक कुणाच्या मैफिलीत वाहवा चा विषय होतात हे ही नसे थोडके. मत मांडायची ही जागा नव्हे, इंग्रज आले नसते तर इथलं बंदी घातलेलं पांडीत्यही कुचकामी असल्यानेच लोक का अडाणी राहीले यावर इतरत्र भरभरून लिहीलेले आहेच.. पुन्हा कधी गझल लिहाविशी वाटली तर या शेराला नक्कीच उत्तर देईन.

Submitted by उद्दाम हसेन on 19 September, 2013 - 23:47

Pages