काव्यलेखन

सर्वव्यापी सर्वाकार

Submitted by डॉ.विक्रांत प्र... on 15 May, 2013 - 05:32

शब्द लाचार मिंधे
काही सांगत नाही l
रूप अर्धे अधुरे
काही दावत नाही l
तुज जाणूनिया मी
मज गावत नाही l
सर्वव्यापी सर्वाकार
तूही तूही अन मीही l

विक्रांत प्रभाकर
http://kavitesathikavita.blogspot.in/

कुणाला कळेना

Submitted by डॉ.विक्रांत प्र... on 15 May, 2013 - 05:14

कुणाला कळेना l माझे आचरण l
अवघे वागण l वेडगळ l १ l
पिता पत्नी पुत्र l सारे हसतात l
मित्र लाजतात l भेटावया l २ l
अहो भाग्य माझे l सारे जाती दूर l
एकांतात सूर l लागे छान l ३ l
असाच समज l व्हावा सर्वा इथे l
बुजगावणे ते l व्हावे खरे l ४ l
मग मी नादात l एकटा नाचत l
राहील गात l गीते त्याची l ५ l

विक्रांत प्रभाकर
http://kavitesathikavita.blogspot.in/

तू कधी.....

Submitted by आनंद पेंढारकर on 15 May, 2013 - 04:59

तू कधी आकाश अंधारलेलं उधळून जातेस
तू कधी तारे तेजाळलेले काजळून जातेस

तू कधी येऊनी या मनाच्या आरपार जातेस
तू कधी जीवघेणी कळ मागे सोडून जातेस
तू कधी क्षणात वीज या नभात रेखून जातेस
अन् कधी तळाशी मनाच्या साकळून जातेस
तू कधी आकाश........

तू कधी स्पर्शाने घाव सारे मिटवून जातेस
तू कधी एक नवा ओरखडा उठवून जातेस
तू कधी उधाणलेल्या सागराला शांतवून जातेस
अन् कधी किनारे सारे वादळून जातेस
तू कधी आकाश........

मला भावला रस्ता

Submitted by निशिकांत on 15 May, 2013 - 04:18

काटेरी पण तुझ्या घराचा मला भावला रस्ता
युगेयुगे मी चालत आहे पुरून उरला रस्ता

दर्शन घ्याया प्रभो निघालो, अर्ध्यातच मी थकलो
श्वास मला दे पार कराया उरला सुरला रस्ता

भरकटलेले जीवन माझे पत्ता कुठला सांगू?
एकलव्य मी मला न कळला कुठून चुकला रस्ता

अभिमन्यूची जिद्द अंतरी, चक्र्व्यूह भेदावे
प्रवेशलो पण परतायाचा कुठे न दिसला रस्ता

अन्नधान्य देशास पुरविती घाम गाळुनी अपुला
शेतकर्‍यांना फास घ्यायचा कुणी दावला रस्ता?

अजब जाहले ! राजकारणी जेथे जेथे गेला
संग होउनी असंगासवे काळवंडला रस्ता

गांधी पुतळे चौकामधले प्रश्न स्वतःला करती
"दाखवला जो मी शुचितेचा कुठे हरवला रस्ता"?

ज्याला हवे ते, तो लिही, कागद जणू आखीव मी!

Submitted by कर्दनकाळ on 15 May, 2013 - 04:15

गझल
वृत्त: मंदाकिनी
लगावली: गागालगा/गागालगा/गागालगा/गागालगा
************************************************

ज्याला हवे ते, तो लिही, कागद जणू आखीव मी!
कोणी म्हणे नेणीव मी, कोणी म्हणे जाणीव मी!!

डोळ्यामधे भरतो कधी! डोळ्यावरी येतो कधी!
माझे मला कळते कुठे, इतका कसा कोरीव मी!!

ज्याला हवे त्याने तसे सोयीप्रमाणे कापले.....
आरास त्यांची जाहली, होतो किती घोटीव मी!

आता दिसाया लागलो मी व्यंगचित्रासारखा!
होता गुन्हा माझा...नको तितका कसा रेखीव मी!!

होते सुबक कारण किती, टाळायला त्यांना मला!
प्रत्येक मैफीलीमधे होतो सदा राखीव मी!!

मोह

Submitted by समीर चव्हाण on 15 May, 2013 - 02:28

रात्र होता आस बांधत स्वप्नतारा चमकतो ना
गंधवाही कल्पनांचा सोनचाफा उमलतो ना

एक वेडा रात्रभर का चाळतो पाने वहीची
अर्थ त्याच्या आवडीचा मग पहाटे गवसतो ना

घर कसे ओसाड वाटे, फार त्याची याद दाटे
चेहरा त्याचा मला अपरोक्ष त्याच्या रडवतो ना

मी किती ठरवून बघतो, हृदयही काढून बघतो
मोह होतो आंधळा की वाट कोणी उजळतो ना

प्रहर आहे जायचा अन ऐकते कोठे मुळी मन
राहिला मक्ता `समिर' जो कागदावर उतरतो ना

समीर चव्हाण

शब्दखुणा: 

आस नवचैतन्याची ...

Submitted by पुरंदरे शशांक on 15 May, 2013 - 00:54

आस नवचैतन्याची ...

घुसमट तगमग शब्दही झाले नको नकोसे
आकाश मोकळे अता निरखू दे जराजरासे

येऊ दे जरा तो झुळझुळणारा रेशीमवारा
श्वासात भरु दे रानसुंगध हा घमघमणारा

शीळ कुणा पक्ष्याची येवो अर्ध जरिही
तुटलेली ही तार जुळावी सहज मनींची

मनपक्षी वेडा विहरत जावो दिगंतरासी
कंठात घेऊनी गाणी नवनवचैतन्याची .....

जरा जरासं.... जगायचं ठरवलंय!

Submitted by बागेश्री on 14 May, 2013 - 10:21

आता ना मी,
बदलायचं ठरवलंय...
जरा जरासं जगायचं ठरवलंय!

दाखवू किती अस्तित्त्व,
जगाला अन् मलाही?
प्रवाहातल्या दगडासारखी
स्थितप्रज्ञ अवस्था..!
घट्ट रोवलेली,
खळाळ लाटा, अंगावर घेणारी....
साचलं शेवाळ मुकाट जगवणारी

ह्या अवस्थेलाच ओलांडायचं ठरवलंय,
जरा जरासं.... जगायचं ठरवलंय!

आता प्रवाहावर सोडलेलं,
पान व्हावं म्हणतेय,
उगाच जपलेलं अढळपण,
सोडावं म्हणतेय..

नको तमा,
दिशेची.. उन्हाची
वार्‍याची.....पावसाची
आड येणार्‍या इतर दगडांची अन्
खुद्द प्रवाहाचीही...!!

जमेल तसं वहावं म्हणतेय...

कधी गिरकी,
कधी हळूच डुबकी,
कधी चार जागी फाटलेपणही चालेल..
पण;

शब्दखुणा: 

खेळणे

Submitted by वैवकु on 14 May, 2013 - 04:53

नियतीने सगळे डाव मांडले होते........

पाहिला करुन व्यापार नवा नात्यांचा
कर्मांची खेळुन सापशिडीही झाली
ते बुद्धिबळाने किती काटले शहही
नशिबाचे पत्तेही कुटले कितिदा मी

पण मन माझे त्या कशातही लागेना .....

मग मी म्हटले की नवे खेळणे शोधू
जे कुणाकडेही नसेल जगतामध्ये
की मला हवे ते तसे खेळता यावे
झेलावा त्याने शब्द शब्द तो माझा

जे मला पाहिजे तेच मिळाले आहे .....

जे मला पाहिजे तेच मिळाले आहे !!
मी त्याला घेवुन खूप खेळतो आता
मी कसे कथू केवढी मजा येते ती
की भूक-प्यासही विसरायाला होते

हा विठ्ठल घे अन् पहा खेळुनी तूही......

हे असे खेळणे कुठेच नाही मित्रा !!

चुकूनसुद्धा...

Submitted by मुग्धमानसी on 14 May, 2013 - 01:55

चुकूनसुद्धा माझा विषय निघू देऊ नकोस
मनात माझ्या क्षणांनाही जगू देऊ नकोस...

हसून सगळं टाळत जा
क्वचित काही बोलत जा
बोलतानाही शब्दांमध्ये
उगाच हसू घोळत जा
दोन शब्दांत जीवघेणं अंतर पडू देऊ नकोस..

देवापुढे दिवा लाव
हात जोड, डोळे मिट
पसरलेलं सगळं मन
पुन्हा लावून ठेव नीट
पण आठवांच्या उतरंडीला धक्का लागू देऊ नकोस...

पानांमागे विसावलेला
चंद्र हळूच बघताना
गार झुळूक हलकेच तुझ्या
अंथरुणात शिरताना
कवटाळलेल्या स्वप्नांत डोळे भिजू देऊ नकोस...

शब्दखुणा: 

Pages

Subscribe to RSS - काव्यलेखन