मी तत्वांच्या फुटपाथावर चालत असतो ...
जगबाजारी मोहक रस्ता वाहत असतो
मी तत्वांच्या फुटपाथावर चालत असतो
अर्थहीन नात्यांवरती हा जीव उधळला
अर्थपूर्ण नात्यांत दुरावे साधत असतो
कधी वाटते शेर पूर्ण हा करून जावा
जरी स्वतःला अर्ध्यातच मी सोडत असतो
दृष्ट लागते असा शेर मज कसा जमावा
दृष्टीवर मी रोज झापडे बांधत असतो
या जगतावर खूप भाषणे करून झाली
स्वतःवरती बोलाया मी लाजत असतो
पराभवाचे जुने मनोरे समोर येता
जमेल तितका नाविन्यावर भाळत असतो
नजरचुकीने नजर भेटली होती अपुली
नजरचुकीचे आभारच मी मानत असतो