काव्यलेखन

रावणास का पोसत असतो?

Submitted by निशिकांत on 8 October, 2019 - 04:18

( विजयादश्मीच्या निमित्ताने. )

विजयादश्मी मुहुर्तावरी
दशाननाला जाळत असतो
वर्षाच्या उरलेल्या दिवशी
रावणास का पोसत असतो?

रामप्रभूंना तोंड द्यावया
समोर होता एकच रावण
हजार आता सभोवताली
लुटावयाला अमुचा श्रावण
राम व्हायचे सोडून त्याच्या
पादुकांस प्रक्षाळत असतो
वर्षाच्या उरलेल्या दिवशी
रावणास का पोसत असतो?

दसऱ्याचं सोनं

Submitted by Asu on 7 October, 2019 - 23:19

पाटील परिवारातर्फे सर्व आप्तेष्ट आणि रसिकांना दसऱ्याच्या हार्दिक शुभेच्छा !

*दसऱ्याचं सोनं*

दसरा सण आनंदाचा
सोनं द्या प्रेमाचं मोठं
देऊन पानं आपट्याची
नका देऊ सोनं खोटं

आलिंगन देऊन परस्परांना
सोनं म्हणून वृक्षबीज देऊ
झाडे जगवा झाडे वाचवा
वसा आज हा आपण घेऊ

हर्षाच्या या मंगल समयी
नका रडवू अबोल वृक्षा
रक्षण करती आपुले जीवन
आपण करूया त्यांची रक्षा

शब्दखुणा: 

सूर्य तो अस्तास जातो

Submitted by निशिकांत on 7 October, 2019 - 00:15

( तरही गझल. मतल्यातील  सानी मिसरा गझलकार श्री राज पठाण यांचा. )

अंतसमयी सोडुनी मधुमास जातो
 उगवतो जो सूर्य तो अस्तास जातो

सोडुनी सुख आजचे जो तो प्रयत्ने
किर्तीरूपे व्यर्थ का उरण्यास जातो?

वांझ ढगही गाळती अश्रूस जेंव्हा
राबणारा घ्यावया गळफास जातो

देव नाही, भक्त देती भीक म्हणुनी
पायरीवर पोट मी भरण्यास जातो

येत तू नसतेस पण का भास होता
वेंधळा मी दार उघडायास जातो?

"ध्येय ठेवा उंच" हे शिकल्यामुळे मी
शक्य नसते तेच ते करण्यास जातो

मोडला ताठर कणा हे ठीक झाले
माज सरला, लीनता शिकण्यास जातो

याचक

Submitted by पुरंदरे शशांक on 6 October, 2019 - 22:47

याचक

हिरव्या रानातून बहरसी
वृक्षलता होऊनी डोलसी
रंगबिरंगी फुलाफुलातुनी
तूच विलसशी धरा होऊनी

शुभ्र हिमाच्या शिखरामधूनी
कडे कपार्‍या खोल दर्‍यातुनी
कुरणे गवतांची लसलसती
तूच नटसी हे रुप घेऊनी

अथांगशी मरुभूमी असो का
लाटा गंभीर सागरात का
चराचरात चैतन्य जागता
तूच प्रकृती जगती होऊनी

नानाविध रुपांनी सजूनी
भाव भावना अगणित खाणी
सरे वर्णना थकली वाणी
याचक मी तर तुझ्या अंगणी

याज्ञसेनी

Submitted by मी मधुरा on 6 October, 2019 - 11:15

ज्ञात आहे याज्ञसेनी? दुर्जनांची ती सभा?
दास होत्या सोंगट्याही, ना कुठे न्याया मुभा!

फास बनला द्यूत जेव्हा आणि फासे नाचले,
संपला पुरुषार्थ तेव्हा हात वस्त्रा लागले

ज्येष्ठ ते अन् श्रेष्ठ जे, हे धर्म पंथी मूक का?
भीष्म येथे, द्रोण येथे,का तरी शोकांतिका?

अंध म्हणूनी काय झाले ? ऐक राजा ही व्यथा
वर्ज कर या मूढ लोका, रोख काळाच्या रथा!

कोरड्या चेहऱ्यावरी ना रेष, ना संतप्तता,
कौरवांच्या या कृतीला सहमती जणू दावता?

काय झाले धर्मराजा? काय झाले अर्जुना?
आठवा तुमच्या हितार्थ साहिली मी वल्गना!

"असंही काही नाही"

Submitted by मी_अनामिक on 6 October, 2019 - 10:18

तु प्रेम करावस माझ्यावर... असंही काही नाही
तु हवीस आयुष्यात माझ्या... असंही काही नाही

आठवणी कवटाळून हसता येणार नाही कदाचित
म्हणुन रडेनच आयुष्यभर... असंही काही नाही

समुद्राच्या लाटांशी सुर बरे जुळतात माझे
मिळेलच गलबता किनारा... असंही काही नाही

मिळेल मकरंद अमाप त्याला प्रत्येक फुलावर
आवडेलच प्रत्येक फुल... असंही काही नाही

दुःखाशी जरा कमी गाठभेट होते
दिमतीला सुखच... असंही काही नाही

हल्ली हल्ली आठवण तुझी येईनाशी झालीये
म्हणुन विसरेनच मी तुला... असंही काही नाही

शब्दखुणा: 

याचना

Submitted by राजेंद्र देवी on 6 October, 2019 - 06:58

याचना

दे हात आता
हे अनंता उदारा
भटकते नाव माझी
ना साहील ना किनारा

घे उचलोनी आता
हे दयाघना परमेश्वरा
तप्त हे आयुष्य
जणू वाळवंट सहारा

संकटांची वादळे येती
संसार हा पाचोळा
भिरभिरत कोठे नेई
ना आकाश ना धरा

राजेंद्र देवी

शब्दखुणा: 

किंमत

Submitted by शब्दवेडा on 5 October, 2019 - 23:01

कधी दाटे मनात गहिवर कधी हास्याची लाट आहे

सोडून गेले सगेसोयरे अंधाराची साथ आहे

दूर टेकडीवर होता महाल त्यात होती सुवर्णशय्या

इंद्रालाही लाजवेल असा माझा थाट होता

नियतीची फिरताच चक्रे होते नव्हते सगळे गेले

सर्वस्व व्यापले अंधाराने राज्य संपले खचली हिम्मत

अंधाराच्या मगरमिठीतच प्रकाशाची कळली किंमत

शब्दखुणा: 

कधी वाटतं...

Submitted by वैभव जगदाळे. on 5 October, 2019 - 13:45

कधी वाटतं संध्याकाळचा मंद वारा बनून तुझ्या श्वासात सामावून जावं...
कधी वाटतं सकाळचं कोवळं उन बनून तुला अलगद स्पर्श करुन पहावं....

कधी वाटतं पावसाच्या सरी बनून तुझ्यावर मनसोक्त बरसावं...
कधी वाटतं चंद्र बनून खिडकीतून तुला पाहण्यासाठी तरसावं...

कधी वाटतं एखादं सुंदर फुल बनावं आणि तु अलगद मला तोडावं...
मग मीही तोडण्याच्या वेदना विसरून तुझ्याशी सुगंधाने नातं जोडावं...

कधी वाटतं मावळत्या सुर्याचे रंग बनून तुझी सायंकाळ रंगवून टाकावी...
कधी तुझ्या डोळ्याची नाजुक पापणी बनून तुझी सुंदर स्वप्ने झाकावी...

शब्दखुणा: 

Pages

Subscribe to RSS - काव्यलेखन