सुख दुःख अस्तित्व प्रदेश

हव्याहव्याशा सुखांसाठी सहन मात्र दुःख फार केले
व्यथांच्या खेळात आता अस्तित्व जीवनाचे तडीपार गेले ||

कोण जाणे कुठली नाती, अकस्मात ही मज साद देती
तिच्या हाकेला हाक देऊन, घेतला मी हात हाती |
संकल्प होता शतजन्माचा, पण सुख मात्र दूर फार गेले
व्यथांच्या खेळात आता अस्तित्व जीवनाचे तडीपार गेले ||

तिचे दुःख काही केल्या कळेना, माझे सुख काही केल्या मिळेना,
आगपाखड दुःखावर ही, राख सुखाची काही केल्या जळेना |
लपाछपी ही सुखदुःखाची, सुख लपायला दूर फार गेले
व्यथांच्या खेळात आता अस्तित्व जीवनाचे तडीपार गेले ||