पावसा पावसा

पावसा पावसा (बालकविता)

जा रे जा रे पावसा
येऊ नको ना दिवसा
दिवसभर हुंदडत राही
आई बाबा तुला नाही?

कधी शाळा कधी सुट्टी
वेळापत्रक समजत नाही
येतो कधी जातो कधी
सगळ्यांची गंमत पाही
वेधशाळेचा करी पोपट
अभ्यासाचा खेळ होई

धो धो पाऊस घराबाहेर
घरात प्यायला पाणी नाही
बालक आम्ही, पालिकांची
जादू आम्हां समजत नाही

शिस्त तुला गुरुजींनी कधी
लावलेली दिसत नाही
सदा न् कदा रडत असतोस
अश्रू सारखे गाळत असतोस
अभ्यास तुझा नियमित नाही
म्हणून वाटतं मार खाई