कुठे जायला काल होतो निघालो

कुठे जायला काल होतो निघालो
=====

कुठे जायला काल होतो निघालो, कळेना कुठे पोचलो आज मी
दिशांनी दिला हात सोडून तेथे कुणा सांग देणार आवाज मी

इथे सागरासारखा खोल, विस्तीर्ण अन्याय चौफेर सोकावला
तुझ्या क्षीण हाळीत सामावुनी धन्यता मानते ती ठरो गाज मी

जिथे पाय टाकेन तेथे समस्या, तरीही पुढे पावले टाकतो
जगा पाहिजे तेवढा दुष्ट हो तू, कधीही न होणार नाराज मी

कुणाच्या मनाला दिले कर्ज केव्हा, किती आणि कोठे स्मरावे कसे?
स्वतःहून नाकारली मुद्दले मी, स्वतःहून नाकारले व्याज मी