घर देता कां कुणी ?

*घर देता कां कुणी ?*

घर देता कां कुणी ? घर

दारा खिडक्यांचे नको
विटा सिमेंटचें नको
भाव-भावनांनी वसलेलं
प्रेमाच्या विटांनी रचलेलं
आपुलकीच्या सिमेंटनी बांधलेलं
घर देता कां कुणी ? घर

भाड्याचं पण घेऊ
पण आम्ही काय देऊ ?
आयुष्य डिपॉझिट ठेवू
आशिर्वादाचं भाडं देऊ
तुम्हाला चालेल का भाऊ ?
घर देता कां कुणी ? घर

आशिर्वादाचा विनिमय दर
नाही आम्हाला माहित
प्रेमाचा हिशोब आम्ही
नाही लिहिला वहीत
नाही साधलं स्वहित
घर देता कां कुणी ? घर