जीव भांड्यात पडला

जीव भांड्यात पडला

छोट्याशा  गाडीतून  एकदा
भाज्या निघाल्या फिरायला,
बसायच्या  आधीच  गाडीत
लागल्या कि त्या भांडायला !

हिरमुसलेली कोथिंबीर मग
लागली मुसमुसत रडायला,
पाहताना तिच्याकडे कांदा 
लागला ना डोळे पुसायला !

वांग्याने उंच उडी मारताना
टमाटरला  काढला चिमटा,
लाल लाल टमाटरने लगेच
दिला त्याच्या पाठी धपाटा !

मिरचीच्या वाटे मात्र तेव्हा
नेमकं  कुणीही नाही  गेलं,
शेजारी फक्त तिच्या तेवढे
निवांत  बसूनच होतं आलं !