आवडलेल्यांचा इतकाही करू नये अभ्यास कधी

आवडलेल्यांचा इतकाही करू नये अभ्यास कधी
की वाटावे ह्यांचा आता घडू नये सहवास कधी

विरक्त व्हावे ठरवल्याक्षणी नवी नवी फुलतात फुले
गाभुळलेल्या चारित्र्या मी स्वीकारू सन्यास कधी

बघ, बसला ना धक्का, आपण किती क्षुद्र असतो ह्याचा
म्हणून सांगत होतो, लावू नये हात झाडास कधी

असे लिही, तू तसे लिही, तू लिही बरे, नक्कोच लिहू
कुणानशीबी ना येवो कवितेचा सासुरवास कधी

मला एवढे कळायलाही एक जमाना लागावा?
तुझ्यामुळे जग खास भासते, तू नव्हतीसच खास कधी

'दोघांचेही आहे' हा एकावेळी झाला नाही
तुला व्हायचा भास कधी तर मला व्हायचा भास कधी