अत्यंत चुकीचे आहे

अपुल्यामधले आकर्षण अत्यंत चुकीचे आहे
जे तुझ्यामते ते कारण अत्यंत चुकीचे आहे

त्यांचा अभ्यास बरळला, त्यांचे वाचन बकबकले
मोठे होणे निष्कारण अत्यंत चुकीचे आहे

कोणीही नसण्यासाठी हा जन्म मिळाला आहे
कोणीही असणे आपण अत्यंत चुकीचे आहे

घरपण देणारा जेथे नसला तर बिघडत नाही
त्या घरास देणे घरपण अत्यंत चुकीचे आहे

काहीही नसणे जेथे कोणी स्वीकारत नाही
काहीही असणे हे पण अत्यंत चुकीचे आहे

जगण्याचे दडपण नसले तर मरण्याचे दडपण घ्या
दडपण नसण्याचे दडपण अत्यंत चुकीचे आहे

मी तुला भेटल्यावरती दोघांना हेच कळाले
ग्रीष्मास भेटणे श्रावण अत्यंत चुकीचे आहे