हळवेपण कोडगे बनवणे जीवन माझे

हळवेपण कोडगे बनवणे जीवन माझे
माझ्यासोबत बहरत आहे मीलन माझे

कृष्णाने पुरुषाचा जन्म दिलेला आहे
वस्त्र कसे फेडेल कुणी दु:शासन माझे

तोच चेहरा दुर्दैवाने ठरला माझा
वेळोवेळी होई जो आच्छादन माझे

मिटरप्रमाणे सुखे कुठे देतात कधी ती
ही दु:खे वापरती निव्वळ वाहन माझे

ज्यांना क्षणभरचा सहवास हवासा होता
त्यांना जीवनभर पुरले आश्वासन माझे

तुला नकोसे व्हावे मी चोरीला जाणे
तुझ्या रोमरोमात वसावे चंदन माझे

तुझे खुळे आयुष्य निमुळते......प्रसरू शकते
विचारांतुनी बघ करुनी उच्चाटन माझे

रोज ठोकतो टाळा रात्री अस्तित्वाला
रोज सकाळी करतो मी उद्घाटन माझे