मायबोलीचे मोबाईल अॅप (अँड्रोईड + आयओएस) सर्वांसाठी उपलब्ध आहे.
श्रावण साजण....
Submitted by पुरंदरे शशांक on 30 July, 2012 - 02:20
रेशीम सरींना
गुंफतो उन्हात
श्रावण साजण
येतो गं भरात
कोवळ्या थेंबांना
सांभाळून घेत
पान पान डुले
नाजुक तालात
जाई जुई पानी
शुभ्रशी कनात
मंद मंद गंध
झुलवी मनात
शोभली सवाष्ण
गर्द हिरव्यात
नथ चमकते
मोत्यांची उन्हात
सणांचा श्रावण
झुलतो झुल्यात
गहिरी मेंदीही
खुलते हातात
कान्हाही भुलला
राधेच्या दर्शना
यमुना कल्लोळी
भेटवी चरणा
रसीला श्रावण
रंगीला साजण
धणी ती न पुरे
करीता वर्णन..
विषय:
शब्दखुणा:
