खेळ

Submitted by द्वैत on 7 September, 2021 - 13:59

खेळ

कुणी उधळला क्षितिजावरती संध्येसमयी रंग
सोनेरी पाण्यात तरंगे झाडांचे प्रतिबिंब

काठावरती फुलून आली केशर पिवळी फुले
मावळतीच्या लाटांवरती नाव एकटी डुले

दूर डोंगरावरी पेटले मिणमिणारे दिवे
ओल्यावाऱ्यासवे निघाले पैलतीराला थवे

वाट पहाते इथे पुरातन ही खडकांची रांग
मुठीत घेऊन वाळू स्वप्ने कशी पहावी सांग

सुखदुःखांशी ठेवून अंतर सरते कातरवेळ
सुरू राहतो ह्या प्रहराला आठवणींचा खेळ

द्वैत

विषय: 
काव्यलेखन
Groups audience: 
गुलमोहर - कविता
Group content visibility: 
Public - accessible to all site users
शेअर करा

खूप छान...

आवडतो मज अफाट सागर अथांग पाणी निळे.. ची आठवण झाली.

Submitted by अ'निरु'द्ध on 21 February, 2022 - 22:29