अनुभव..

तयाची ही ओढ | नित्य सतावते |
सुख ही सुखावते | जया ठायी ||

पीडितांचे भाग्य | उजळूनी यावे |
आनंदे निमावे | चरणात ||

सरणावरती | होई तुझा भास |
शेवटचे श्वास | मोजताना ||

जग विसरून | तुझ्यापाशी आलो |
तुझा भाग झालो | रामराया ||

प्रेमभावे राम | ह्रदयी धरला |
अंधार सरला | तया ठायी ||

अर्थ जीवनाचा | सहज कळला |
अवघा ढळला | मायापाश ||

रामनामे आला | आनंदाचा पूर |
चित्त त्याच्यावर | स्थिरावले ||

उरले सुरले | द्वैत सरू गेले |
मन भरू आले | कारुण्याने ||

देह अनावर | नाचू लागे असा |
आवरावा कसा | सांग रामा ||

अवघा रामाच्या | नामात गोडवा |
अनुदिनी नवा | अनुभव ||

- आदित्य