ओसाड गाव झाले
गजबज असे सदोदित
विझले दिवे घरातिल
शहरांमुळे कदाचित
येतात बालपणचे
खेड्यामधील आठव
पारावरील गप्पा
संभाषणात लाघव
शहरातल्या सुखाने
झालो न मी प्रभावित
विझले दिवे घरातिल
शहरांमुळे कदाचित
सारेच तिथे माझे
मीही पण सार्यांचा
तुटवडा तिथे नव्हता
अश्रू पुसणार्यांचा
गर्दी असून झालो
शहरी कसा तिर्हाइत?
विझले दिवे घरातिल
शहरांमुळे कदाचित
एकत्र कुटुंबाच्या
मी चाखले फळांना
आधार सर्व देती
थंडावती झळांना
ना जिंकलो तरीही
झालो न मी पराजित
विझले दिवे घरातिल
शहरांमुळे कदाचित
शहरी घरात कुत्रे
वृध्दाश्रमात आई
मोकाट श्वान गावी
आई घरात राही
असुनी कुटुंब निर्धन
नसते कुणी निराश्रित
विझले दिवे घरातिल
शहरांमुळे कदाचित
हळव्या मनास आता
हळहळही न वाटे
अन् बधीर हृदयाला
ना बोचतात काटे?
जगण्यात स्वतःसाठी
मी केवढा पटाइत!
विझले दिवे घरातिल
शहरांमुळे कदाचित
निशिकांत देशपांडे. मो.क्र. ९८९०७ ९९०२३