पदरावरती जरतारीचा (विडंबन)

( आजच दूरदर्शन वर बातमी झळकली बाजारात निवडणुकीच्या मुहूर्तावर पदरावर मोदींचा चेहरा असलेली साडी विक्रीसाठी आली आहे. बातमी पाहिल्यावर मनात आले ही साडी परिधान केल्यावर बीजेपी समर्थक स्त्रीच्या भावना काय असतील ? मग पुढील विडंबन सुचले. सादर करण्यापूर्वी कविवर्य ग दि माडगूळकर यांची माफी मागतो.)

पदरावरती गाली हासरा मोदी चेहरा हवा
आई मला नेसव शालू नवा...

बांधला सैलसर बुचडा मानेवरी
माळले भगवे कमळ मी त्यावरी
केशरी झाक उजळली भाळावरी
केसांवरती लहर उठवली फिरवूनी कंगवा

डोळ्यात रेखिले काजळ मी विकासाचे
कानात चमकते झुंबर त्या उज्वलेचे
दुप्पट्टयावरी बुट्टीदार छाप बघ कमळाचे
गो-या भाळी बिंदी केशरी चमचमता काजवा

मज भुलवावयास येत विरोधी जन ते
पाहीले काल अन् आजही त्या जाणते
दुर्गुणी तयांना जनता ही पूरती ओळखते
फिरुनी एकदा मोदी हवा घुमतो गं पारवा

© दत्तात्रय साळुंके