Submitted by निशिकांत on 4 November, 2018 - 23:20
जाहलेला अस्त आहे
राज्यकर्त्या कौरवांचे मस्त आहे
पांडवांचा जाहलेला अस्त आहे
राजकारण खेळणारा बाप ज्याचा
त्या मुलाचा मार्गही आश्वस्त आहे
लोक मोठे वेळ देती व्यग्र असुनी
काम नसणारेच म्हणती "व्यस्त आहे"
तू दिलेल्या आठवांचा त्रास इतका!
नेहमी एकलपणाने ग्रस्त आहे
शेत राखायास मी खुद लावलेल्या
कुंपणाने पीक केले फस्त आहे
लक्तरांनी वेष्टलेला मी दरिद्री
शासनाच्या धोरणांचा दस्त आहे
पीडितांची कड कुणीही घेत नाही
सोय जो तो पाहुनी नेमस्त आहे
पापक्षालन जी करी सार्या जगाचे
तीच गंगा गंदगीने त्रस्त आहे
काळजी "निशिकांत"ची का व्यर्थ करता
जाहला केंव्हाच तो उध्वस्त आहे
निशिकांत देशपांडे. मो. क्र.९८९०७ ९९०२३
विषय:
Groups audience:
Group content visibility:
Public - accessible to all site users
शेअर करा
वाह! खूपच सुंदर गझल
वाह! खूपच सुंदर गझल
मनापासून आभार प्रतिसादासाठी
मनापासून आभार प्रतिसादासाठी निलेशजी.