प्लेग, रँड, चापेकरबंधू आणि टिळक-बदनामीचे नवे षडयंत्र!

Submitted by अदित्य श्रीपद on 7 July, 2018 - 09:58

गेली काही म्हणजे खरेतर अनेक वर्षे २२ जून १८९७ ही तारीख तशी लोकांच्या विस्मरणात गेलेली होती. क्वचित कधीतरी दूरदर्शन वर लागणाऱ्या ‘२२ जून १८९७” ह्या नावाच्या आणि (त्या घटनेवरच्या/विषयावरच्या) एकमेव मराठी चित्रपटाखेरीज फार काही कुठे दाखवले जात नसे. अगदी ताणून ताणून किंवा बादरायण संबंध जोडून सांगायचे म्हटले तर मध्यंतरी पुणे आकाशवाणीवर “गोंद्या आलारे...!” ही कॅच फ्रेज असलेली एक जाहिरात ऐकवत असत.तिचा संबंध चापेकर बंधूंशी जराही नसला तरी त्या निमित्ताने काही लोकाना आठवण तरी होत असे. त्यापेक्षा अधिक काही नाही. पण कधी नव्हे ते लोकाना ह्या वर्षीच चापेकर बंधूचे स्मरण झाले आहे. आता चापेकर बंधू हे परतंत्र भारतात एखाद्या इंग्रज अधिकाऱ्यावर हल्ला( कोणतेही खाजगी कारण नसताना) करून त्याचा जीव घेणारे अगदी पहिले वहिले क्रांतीकारक. आद्य क्रांतीवीर वासुदेव बळवंत फडके हे जरी आद्य क्रांतीकारक असले तरी त्यानी कोठल्याही इंग्रज अधिकाऱ्याला जीवे मारले नाही (अर्थात म्हणून काही त्यांच्या कार्यात, देशभक्तीत कमीपणा राहत येत नाही.) पण जन्माने हे लोक ब्राह्मण असल्याने स्वतंत्र भारताच्या इतिहासात दखलपात्र असण्याचे काही कारण नव्हते. स्वातंत्र्य वीर सावरकरांपेक्षा त्या अर्थाने ते खरेच भाग्यवान. पण २०१८ हे साल त्यांच्या साठी खास भाग्योदयाचा योग घेऊन आलेले दिसतेय. महारष्ट्रात पुन्हा नव-पेशवाई अवतरल्याची आणि ती भीमा कोरगाव येथे गाडण्याची हाकाटी झाली. त्याच सुमारास जळगावात कुणा ईश्वर जोशी नावाच्या माणसाने पिण्याच्या पाण्यासाठी असलेल्या विहिरीत अंघोळ करणाऱ्या मुलाना( अनेकदा समजावून ताकीद देऊनही ऐकत नसल्याने ) फटकावल्याने सवर्ण समाज मागासांवर कसे अत्याचार करून राहिलाय ह्याचे ज्वलंत दर्शन घडले – पुढे हा ईश्वर जोशी जोशी आडनावाप्रमाणे ब्राह्मण नसून भटक्या विमुक्त समाजातालाच एक आहे म्हणजे मागास आहे हे कळल्यावर सगळ्यांचीच तोंड कडू झाली.असो...
तर २०० वर्षापूर्वी २८००० ब्राह्मण सैन्याला खडे चारल्याची आणि इंग्रजांची तळी उचलल्याची साग्रसंगीत, वाजत गाजत आठवण काढून झाल्यावरही काही मजा येईना.अगदी छत्रपती शिवाजीमहाराजांचे चित्र असलेले टि शर्ट घातलेल्या राहुल फटांगळेचा बदडून खुन, कपाळावर शिवगंध( हा काय प्रकार आहे?) लावलेल्या विशाल जाधव वर प्राणघातक हल्ला, " छत्रपती , भवानी , गणेश " या आणि अशाच प्रकारची नावे असलेल्या जवळपास १३० मालमत्ताची नासधूस जाळपोळ करणे, याशिवाय गणपती , साई बाबा यांच्या मंदिराची मोडतोड करुन विटंबना करणे इत्यादी प्रकार करूनही काही रंग भरेना. ( हे सगळे पोलीस दफ्तरी नोंद आहे. –आभार तुषार दामगुडे )
मग २२जुन आला आणि थोडे फार ह्या निमित्ताने ब्राह्मणजातीत जन्माला आलेले टिळक आणि ब्राह्मणच असलेल्या चापेकरांचे चारित्र्य हनन करून थोडी तोंडाला चव येते का पाहूयात! ह्या उच्च भावनेने प्रेरित होऊन महारष्ट्रातील काही विचारवंत लोकांनी खालील प्रमाणे पोस्टी टाकल्या...
चाफेकर बंधुनी रैंड चा खून केला .
या खुनाला प्लेगच्या साथीची पार्श्वभूमी होती . जेव्हा पुण्यात प्लेगची साथ सुरु झाली तेव्हा माणस पटापट मरत होती . मरणाऱ्यांची संख्या काही हजारा पर्यंत पोहोचली होती .
अश्या परिस्थितीत सनातनी ब्राम्हण ही साथ देवाची अवकृपा झाली आहे म्हणून देव पाण्यात बुडवून रोगी नीट होण्याची वाट बघत होते.
रोग हे एखाद्या जिवाणू मुळेच होतो हे फ़क्त यूरोपियन देशामध्येच माहीत होत . तेव्हा भारतामध्ये या बद्दल कमालीच अज्ञान होत .
या रोगांना भारतात देवांचा कोप झाला असच समजत असत आणि इतर समाज ही सनातनी ब्राम्हणांचे शेपुट धरून त्यांच्या पावलावर पाऊल ठेऊन चालत असत .
या रोगावर काही उपाय नव्हता . फ़क्त हां संसर्गजन्य रोग आहे आणि बाधित रोग्यांना इतर चांगल्या माणसांपासून दूर ठेवले असता हां रोग नियंत्रणात येतो .. एव्हडेच कळाले होते .
त्या नुसार इंग्रजांनी उपाय सुरु केले . या कामासाठी सिव्हिल ऑफिसर रैंड याची प्लेग कमिशनर म्हणून नियुक्ति केली .
रैंड ने लोकांमध्ये जाऊन या रोगाची माहिती दिली .. या रोगाची तीव्रता सांगितली .. रोग्यांना इतर चांगल्या माणसां पासून दूर ठेवण हाच एक उपाय आहे हे सांगितले .
परंतु रोग हे अश्या काही विषाणु मुळे होतात हे मुळातच माहीत नसलेल्या सनातनी ब्राम्हण समाजाने रैंडला विरोध केला . रैंड ने त्याच्या कर्तव्याला जागुन घराघरातून प्लेग चे रोगी शोधून त्यांना इतरां पासून वेगळे ठेवले आणि प्लेग नियंत्रणात आणला .
रैंड ने या उपचार मोहिमेत लाखो भारतीयांचे प्राण वाचविले .
परंतु लाखो भारतीयांचे प्राण वाचवीणाऱ्या रैंडच्या या उपकाराचा सनातनी ब्राम्हणांना गंध ही नव्हता . सनातनी ब्राम्हणांनी या मोहिमेला संस्कृतीचा ऱ्हास असा समज करुन घेतला . हां गैरसमज समाजात टिळकांनी पसरवला .
प्लेग आटोक्यात आल्यावर टिळकांनी आपल्या संस्कृतीचा ऱ्हास इंग्रजांनी केला असा गैरसमज मोठ्या प्रमाणावर समाजात पसरवला .
टिळकांनी केसरी मध्ये अग्रलेख लिहून .. ठिकठिकाणी भाषणे देऊन इंग्रजांच्या या समाजाला आवश्यक असणाऱ्या मोहिमे विरुद्ध इतर सनातनी ब्राम्हणांना इंग्रजां विरुद्ध भडकवायला सुरुवात केली .
याच्याच् परिणाम असा झाला की लाखो भारतीयांचे प्राण वाचवीणाऱ्या रैंड चा खून सनातनी विचारधारा बाळगुण असणाऱ्या चाफेकर बंधुनी 22 जून 1897 रोजी केला . रैंड बरोबर त्याचा सहाय्यक आयस्टर याचाही खून केला गेला .
रैंड आणि आयस्टर च्या खुना बद्दल चाफेकर बंधुना फाशी देण्यात आली आणि समाजात सुधारणा घडवून आणण्यात बाधा निर्माण करण्याच्या आरोपा खाली टिळकांना सक्तमजुरिची शिक्षा झाली .
महेश भोसले , पुणे
23/6/2018

Simple, Free Image and File Hosting at MediaFire

थोडा वेळ उपरोध आणि खवचट पणाची भाषा बाजूला ठेवून जर बोलायचे म्हटले तर ही पोस्ट नुसती तर्क दुष्ट आणि असत्यावर आधारलेली आहे असे नाही तर अत्यंत थंड डोक्याने आणि सत्याचा सोयीस्कर अपलाप करून आणि असत्य योग्य ठिकाणी पेरून तयार केलेली आहे. ह्यातून पुढे काही वर्षानी चिंचवड आणि गणेश खिंड इथे कोरेगाव भिमासारखे उत्पात घडले तर आश्चर्य वाटायला नको.
मुळात प्लेगची साथ भारतात आणली इंग्रजांनीच, ह्यापूर्वी इ.स. ५००-६०० च्या सुमारास आणि इ.स. १३००-१४०० च्या सुमारास मोठ्याप्रमाणात साथी येवून युरोपात प्रचंड मानव हानी झालेली होती.(ब्युबोनिक प्लेग, black death अशा अनेक नावानी हा प्लेग इतिहासात प्रसिद्ध आहे.)व्यापार उदीमाच्या निमित्ताने जगभर फिरणारी जहाजे त्याच्यावर ह्या रोगाचे प्रमुख वाहक जे उंदीर ते घेऊन ही फिरत. ह्या उंदरांच्या अंगावर असलेल्या पिसवा ह्या रोगाच्या विषाणूने ग्रस्त होत. त्याना काही होत नसे पण उंदीर मात्र आजारी पडून मरत. उष्ण रक्ताच्या प्राण्यांच्या कडे आकर्षित होत असल्यामुळे ह्या पिसवा जर माणसाच्या जवळ आल्या तर त्या माणसांच्या अंगावर चढून माणसाना देखील ह्या रोगाची लागण करत. हा रोग अत्यंत संसर्ग जाण्या आल्याने पुढे ह्या माणसाच्या संपर्कात येणार्या इतर माणसाना ही हा रोग होता असे ह्या प्लेगची भारतात १८९६साली पहिली साथ आली ती मुंबईत. आता इंग्रजाना जो एकदम भारतीयांचा कळवळा आल्याचे ह्या पोस्टीत लिहिलेय तसे ते नसून भारतात प्लेग (त्याला गोळी ताप म्हणत किंवा ग्रांथिक सन्नीपात) आल्यावर युरोपातील त्याचा व्यापारावर अनिष्ट परिणाम होऊ नये म्हणून वाटेल ते उपाय करून प्लेगची साथ काबूत आणायचे स्पष्ट आदेश भारत सरकारला होते आणि त्याप्रमाणे हिंदी सैनिकांचे पथक कामाला लावून मुंबईत प्लेगची साथ आटोक्यात आणली गेली. त्यानंतर ४ फेब्रु १८९७ रोजी साथीच्या रोगाचा कायदा( The Epidemic Diseases Act) मध्यवर्ती विधीमंडळात संमत झाला. जो प्लेगचा निर्बंध म्हणूनही ओळखला जातो.ह्या कायद्याने इंग्रज अधिकार्याना अमर्याद अधिकार दिले गेलें त्यांच्या गैर वापराविरुद्ध न्यायालयात दाद मागायची ही सोय नव्हती.
हि साथ पुण्यात आली तेव्हा ती आटोक्यात आणण्यासाठी प्लेग कमिटी नेमून वॉल्टर चार्ल्स रँड हा आय सी एस अधिकारी तिच्यावर नेमण्यात आला आणि त्याच्या हाताखाली गोऱ्या सोजीरांची तुकडी देण्यात आली. हा रँड आधी सातार्याला जिल्हाधिकारी म्हणून होता. त्याची विकृत किंवा दुष्ट वृत्ती सांगायची तर तेव्हा काशीयात्रेवरून आलेल्या माणसांची मिरवणूक काढून वाजत गाजत गावात घेऊन यायची पद्धत असे त्याला द्वारं काढण म्हणत . तर ह्या रँडने त्यावर बंदी घातली म्हणजे वाजत गाजत मिरवणूक काढण्यावर बंदी घातली आणि तरी ही एकाने अशी मिरवणूक काढली तर त्या मिरवणुकीतल्या ११ जणाना पकडून त्याना १ महिना ते ३ महिने सश्रम कारावासाच्या शिक्षा तर ठोठावल्याच पण त्याना रणरणत्या उन्हात मुद्दाम गावातून २२ मैल अनवाणी चालवत गावाबाहेरच्या तुर्रुंगापर्यंत नेले.
तर असा हा रँड आपल्या बरोबर कर्नल फिलिप्स आणि कॅप्टन बीव्हरीज आणि इतर शेकडो गोरे सोजीर घेऊन प्लेगचा बंदोबस्त करण्यासाठी पुण्यात आला होता. ह्या पैकी कॅप्टन बीव्हरीज हा डॉक्टर होता आणि त्याला पूर्वी होंगकोंग मध्ये प्लेग च्या साथीत काम करण्याचा अनुभव होता. हो तिथे ही इंग्रजाच ही प्लेगची भेट घेऊन गेले होते. तर ह्या कॅप्टन बीव्हरीज च्या मताप्रमाणे एतद्देशीय शिपायाकरवी रोगी लोकाना वेगळे करणे तितक्या निष्ठुर पणे होत नाही म्हणून ह्या कमी फक्त गोरे सोजीरच घेतले पाहिजेत असे होते.आणि त्याला अर्थातच व्साहेब्ची मान्यता आणि पोर्ण सक्रीय पाठींबा होता.( मुंबईत हीच साथ हिंदी सैनिकांनी कशी काबूत आणली ते विच्रारायचे नाही.) धन्य ते इंग्रज आणि धन्य तो पुण्यात्मा रँड!
पुण्यात संगमाजवळ तात्पुरते प्लेग इस्पितळ उभारले आणि स्वारगेट जवळ त्या रुग्णाच्या नातेवाईकाना वेगळे करून ठेवले जात असे. समजून घ्या हे ऐच्छिक नसे तर जबरदस्ती असे. आजारी माणूस जाऊ द्या पण त्याच्या घरात राहणारा हरेक माणूस केवळ संशयावरून तिथे जाऊन खितपत पडत असे. प्लेगचा रोग झालेला माणूस बहुतेक वेळा मरतच असे पण त्याचे अंतिम दर्शन सोडा त्याच्या प्रेतावर अंतिम संस्कार करू देत नसत . आणि मुख्य म्हणजे मरणारे रोगी फक्त ब्राह्मण नसत.
त्याहून भयानक गोष्ट म्हणजे तपासणी पथक. सुरुवातीला हे पथक कदाचित समजुतीने वागले असेल ही पण लवकरच घरात घुसून आत अगदी खाजागीच्या खोलीत जाणे, सामानची नासधूस करणे पी पैका, चीज वस्तू लुबाडणे, केवळ संशय जरी आला तरी घरातले सगळे समान बाहेर काढून त्याला आग लावून टाकणे असे प्रकार सर्रास करत . संशयित रोगी प्लेग इस्पितळात पाठवला जात असे, घरात थकलेले, अंथरून धरलेले वृद्ध रोगी समजून प्लेगच्या इस्पितळात पाठवत त्याला रोग झालेला नसला तरी तिथे लागण होईच , असे कितीजण हकनाक मेले असतील त्याची गणतीच नाही. तिथे सुश्रुषा स्वच्छता खाणे पिण्याचीही कमतरता असे. .
तपासणी करता गेलेलं सोजीर घरातल्या सगळ्याना घराबाहेर काढून त्यांचे कपडे उतरवून तपासणी करत . काही समजतंय का? उघड्यावर दिवसाढवळ्या कपडे उतरवून तपासणी . आणि ह्या रोगाची गाठ काखेत तसेच जांघेत येई म्हणजे मांडी जिथे कमरेला चिकटते तिथे जननेन्द्रीयाच्या बाजूला. तेव्हाचा काल सोडा आजही हे कुणी चालवून घेईल का? प्लेगचा रोग झाल्याचा संशय आला म्हणून एखाद्या इंग्रजाला त्यांच्या देशात किंवा भारतात अशी वागणूक मिळाली असती का?ह्याबाबत तक्रार केल्यावर घरात अंधार असल्याने नीट बघता येत नाही म्हणून उघड्यावर अशी तपासणी करावी लागते असली निर्लज्ज उत्तरे दिली जात. गोऱ्या सोजीरांची पलटण धाड टाकायला येते हे कळल्यावर लोक जमेल तेवढे समान पैसा अडका घेऊन पलायन करत म्हणून मग पुढे अख्या पेठेलाच गराडा घालुन सगळ्यांची उघड तपासणी होई. घर समान सुमान आणि माणसाना बाहेर काढून रिकामे करत आत जंतुनाशक पावडरी आणि फिनेल टाकून निर्जंतुक करत आणि त्यला सील ठोकून लाल फुली मारत. अक्खी पेठ म्हणजे फक्त त्यात ब्राह्मण नसत सगळ्याच जातीचे लोक असत त्यात त्यांची ससे होलपट होई. त्याना तसेच गुराढोरासारखे हाकलत हाकलत स्वारगेटला घेऊन जात. त्यावेळी गोपाळ कृष्ण गोखले इंग्लंडला होते पण अनेक सुधारकांनी त्याना ह्या अत्याचाराची हकीकत पत्र-तार करून कळवल्यावरून त्यानी मँचेस्टर गार्डियन मध्ये मुलाखत देऊन संताप व्यक्त केला होता ( ११ मार्च १८९७ )
आता वर विनोद दिवे ह्यांच्या विखारी पोस्ट मध्ये त्यानी जे “महार आमच्या ब्राह्मण स्त्रियाना उलथापालथ करून बगला तपासतात, गणेशाचे वाहन उंदराला मारून टाकतात ...सरकारचे डोके ठिकाणावर आहे का ? “ असे लिहिले आहे त्यात महार सोडा, ब्राह्मणही सोडा इतर कुठल्याही जातीत-स्वजातीय परक्या पुरुषाना सर्रास घरात घुसून स्त्रियांच्या काखा बगलात हात घालून तपासायची मुभा होती का? त्याना तसे म्हणायचे आहे का? तसेच हा जो सरकारचे डोके ठिकाणावर आहे का? म्हणून अतिप्रसिद्ध असलेल्या अग्रलेखाचा उल्लेख इलेला आहे तोच मुळी रँडच्या खुनानंतर पुण्यात इंग्रजांनी जी दडपशाही चालवली होती तसेच प्लेग बाबत अजूनच कठोर वर्तन सुरु झाले होते त्यावेळचा आहे. ह्यालाच दिशाभूल म्हणतात. कळले ?
टिळकांची भूमिका
एकंदर ह्या पोस्टचा वापर टिळकाना बदनाम करण्यासाठी केलेला असल्याने त्यांच्या भूमिकेबद्दल सविस्तर लिहिणे भाग आहे.
प्लेग सारख्या भयानक संसर्गजन्य आणि जीवघेण्या रोगावर प्रभावी उपचार नाही आणि रोगी माणसाना वेगळे काढणे हाच त्याचा फैलाव रोखण्याचा सगळ्यात प्रभावी उपाय आहे. तसेच रुग्णांच्या नातेवाईकाना वेगळ्या संसर्गवर्जक तळावर ठेवणेही भाग आहे हे जाणून टिळकांनी त्याप्रमाणे सुरुवातीला जनतेला सरकारला ह्या कामी सहकार्य करावे असेच आवाहन केलेले आढळते, तसेच एवढे पुरेसे नसून ह्या संसर्गवर्जक तळावरील लोकांची आबाळ होऊ नये म्हणून त्याचे व्यवस्थापन पालिकेकडे असावे म्हणून मुंबई राज्याचे गवर्नर लॉर्ड सँडहर्स्ट ह्याना अर्ज दिला होता. तो अर्थात मान्य झाला नाही म्हणून मग पुण्यातील डॉक्टर आणि इतर प्रतिष्ठीत लोकांना एकत्र करून लोकांना सरकारच्या उपाय योजनान्बद्दल आणि त्याच्या आवश्यकते बद्दल समजावणे, अवगत करणे, पैसे व इतर सामान वर्गणी स्वरूपात गोळाकरून त्यातून रुग्ण व रुग्णांच्या नातेवाईकांची सोय करणे असे उपक्रम सुरु केले. लोक रोगाच्या भयाने गाव सोडून पळत पण त्याने रोग इतरत्र फैलावतो म्हणून गाव सोडून न जाता पुण्याबाहेर म्हणजे फर्ग्युसन कॉलेज च्या जवळच्या टेकडी आणि आसपास तंबू ठोकून राहण्याची कल्पना त्यानी मांडली व स्वत: अंमलात आणली. स्वत:ला किंवा त्यांच्या कुटुंबियाना रोगाची लागण होऊ शकते हे माहिती असून ते गाव सोडून पळून गेले नाहीत. त्यांचा थोरला मुलगा देखील प्लेग होऊनच वारला. ह्या त्यांच्या जनते विषयीच्या बांधिलकीने, कळवळ्यानेच ते खरेखुरे लोकनेते होते हे सिद्ध होते.देहभान विसरून प्लेगच्या साथीत रुग्णसेवेचे काम करताना क्रांतीज्योती सावित्रीबाई फुले ह्यांना ह्या रोगाची लागण झाली आणि त्यातच त्यांचा अंत झाला हे ही इथे आवर्जून नमूद केले पाहिजे.
पुढे रँड आणि त्याच्या पलटणीचे अत्याचार वाढू लागले आणि रोगाचा फैलावही वाढून जनतेची हलाखी अस्मानी आणि सुलतानी अशा दोन्ही संकटात अधिकच वाढली. सरकारचे हे उपाय(!)देखिल कमी पडू लागले तसे पुण्यातील व पुण्या बाहेरील डॉक्टर लोकांची मदत मिळवून त्यानी हिंदू प्लेग रुग्णालय स्थापन केले. त्याला अर्थात पुण्यश्लोक रँडने विरोध करत परवानगी नाकारली तर लॉर्ड सँडहर्स्ट कडून अनुमती मिळवून टिळकांनी रँडचा विरोध मोडून काढला. पुढे २० वर्षानी चिरोल केस संदर्भात साक्ष देताना लॉर्ड सँडहर्स्टने ह्या त्यांच्या कार्याचा गौरव पूर्वक उल्लेख केलेला आहे.
टिळक तर जहाल म्हणून प्रसिद्ध पण पुण्यातील मवाळ पक्षीयानी देखील लॉर्ड सँडहर्स्टकडे तक्रार अर्ज दाखल केले तसेच आपल्या वृत्तपत्रातून रँडच्या अत्याचाराचा प्रखर भाषेत विरोध केलेला आढळतो.त्यानीच पुण्यातून २० सहस्त्र सह्या असलेले अर्ज पत्र लॉर्ड सँडहर्स्टकडे पाठवून रँडच्या अत्याचाराला आळा घालण्याची विनवणी केली होती.सुधारक च्या १२ एप्रिल १८९७ च्या अंकात संपादक म्हणतात “...इतके दिवस चोरीवरच भागत होते, पण आता बायकाच्या अब्रूवर हात टाकेपर्यंत ह्यांची मजल गेली आहे आणि तरी आमचे लोक शांतच. अरे तुम्ही इतके नि:सत्व कशाने झाला आहात? पृथ्वीच्या पाठीवर आमच्या सारखे नामर्द लोक सापडणार नाहीत.आडदांडास कायदा शिकवा...” तर १० मे १८९७ रोजी सुधारक म्हणतो “...इतके सगळे झाले तरी आमच्याने प्रतिकार करवत नाही. हे कशाचे लक्षण! सर्व जगातील रानटी पासून ते सभ्य समाजातील लोक ज्या एका बाबतीत संवेदनशील असतात त्या तुमच्या स्त्रियांच्या अब्रूचे धिंडवडे काढून जाहीर विटंबना केल तरी तुम्ही स्वस्थ ते स्वस्थच. धिक्कार असो तुमचा. अरे जनावरानाही इतका सोशिकपण शक्य नाही.” आता सांगा तसे म्हटले तर हे मवाळाचे विचार काय कमी चिथावणीखोर आहेत पण खरोखर इतके भयंकर अत्याचार तेव्हा होत होते.हे सगळे लोक केवळ ब्राह्मण होते म्हणाल तर अंजुमन-ए- इस्लाम असोसिएशन ह्या संस्थेचे अध्यक्ष नवाब अब्दुल फिरोज खान ह्यांनी देखील सरकारकडे ह्याची तक्रार करणारा अर्ज शेकडो सह्या गोळ्या करून धाडलेला होता.
ह्या अत्याचारातून कुणीच देशी माणूस सुटत नसे. पंडिता रमबाई ह्यांच्या शारदाश्रामावर ही त्यांच्या धाडी पडल्या आणि त्यात दोन स्त्रीयावर बलात्कार देखील केले गेले आणि त्यातली एक तर नंतर गायबच झाली. ह्यासंबंधी रमाबाईन्नी ज्ञानप्रकाश मध्ये पत्र प्रसिद्ध केलेच पण कलकत्त्याहून निघणाऱ्या अमृत बझार पत्रिका आणि मुंबईच्या Bombay Guardian मध्ये ही वृत्तांत छापून आणला. त्यात त्या म्हणतात “...अशा किती सत्शील मुली ह्या प्रमाणे नाश पावल्या आहेत आणि नाहीशा झाल्यात ते एका ईश्वराला ठाऊक...” Bombay Guardian १६ मे १८९७. सदाशिव पेठेत अशीच तपासणी चालू असताना सोजीरानी काही स्त्रियांची भर रस्त्यात तपासणी केली. तेव्हा त्या स्त्रियांनी आकांत करत शनीच्या पारावर डोके आपटून कपाळ मोक्ष करून घेतला.
स्वत:च्या घाणेरड्या मनसुब्यान्साठी चापेकर आणि टिळकांची बदनामी करणारे कुलांगार ह्या स्त्रियांचे पणतू खापर पणतू नसले म्हणजे मिळवले नाहीतर त्या माउल्याना जिवंत असताना भोगाव्या लागल्या तशाच यातना मृत्युपश्चात भोगाव्या लागायच्या.
हे सगळे पाहत लोक विशेषत: तरुण अगदीच शांत होते असे नव्हे,रास्तापेठेत त्यानी सोजीराना तुफान मारहाण केली होती. इतकी कि त्यातला एक नंतर मरण पावला तर कॅप्टन ओवेन लुईस ह्या संसर्ग वर्जक तळाच्या अधिकार्याच्या घोडागाडीवर दगड फेक केली गेली. पण ह्या फुटकळ घटना झाल्या/
चापेकर बंधूना टिळकांनी चिथावले असे म्हणणे हा तर बेशरम पणाचा कळस आहे . असले अत्याचार इंग्रज करत असताना टिळकांनी वेगळे आणि चीथावायची गरज काय होती! ह्याच चापेकरांनी प्लेगचे साथ मुंबईत चालू असतना, म्यात्रीक्युलेशनच्या परीक्षेचा मांडव जाळला होता(३१ ऑक्टोबर १८९६) का तर प्लेगची साथ जोरावर असल्याने सरकारने हि परीक्षा पुढे ढकलावी असे निवेदन गंगाधर देशपांडे नावाच्या विद्यार्थ्याने केले होते पण सरकारने ती विनंती मान्य केली नाही. विचार करा परीक्षेच्या निमित्ताने बाहेरगावाहुन येणारी मुलं हा रोग घेऊन आपल्या गावी नसती का गेली? हा सरकारचा जनतेविषयी कळवळा आणि प्लेग संबंधी काळजी! चापेकरांनी त्याआधीच विक्टोरिया राणीचा मुंबईत जो एस्प्लनेड रोड वरचा पुतळा होता त्याची डांबर टाकून आणि खेटरांची माळ घालून विटंबना केली होती.(११ ऑक्टोबर १८९६) कारण होते १८९७ हे वर्ष राणीच्या राज्यारोहणाचे ५० वे वर्ष होते. थोडक्यात चापेकर हे आधीपासून इंग्रज विरोधक होते आणि त्याचे कारण त्यानीच लिहून ठेवले आहे ते म्हणजे त्याना इंग्रजी सैन्यात नोकरी करायची होती पण ब्राह्मण विशेषत: चित्पावन ब्राह्मण असल्याने त्याना सैन्यात घेतले गेले नाही त्याचा राग त्यानी मनात धरला होता. आता ते विचारवंत, सुधारक किंवा फार गुणी संघटक होते असे नाही तसे ते उचापत खोरच होते. अनेक धर्मांतरीत हिंदुना चोप देणे हे त्यांचे आवडते काम होते.त्यानी पुण्यात गोफण क्लब स्थापन करून इंग्रजांविरुद्ध सशस्त्र उठाव करण्याची योजनाही आखली होती, इतके त्यांचे एकंदर परिस्थितीचे आणि त्यावरच्या उपायांचे आकलन तोकडे होते. ते कर्मठ, सनातनी होते पण तो त्यांचा गुणविशेष नाहीच. जेव्हा सर्व जाती धर्मातले पुढारी विचारवंत, धुरीण( काही सन्माननीय अपवाद सोडून) पुण्यात चाललेल्या अत्याचाराकडे षंढ बनून पहात बसले होते तेव्हा ह्या अतिसामान्य कुवतीच्या तरुणांनी शांत न बसता प्रतिकार करायचे ठरवले. परिणामांची तमा न बाळगता. त्यांच्या ह्या कृत्याने खुद्द इंग्लंड पर्यंत धक्का छोटा का होईना पण बसला. अजून सगळीच राख झाली नाही, काही निखारे अजूनही धुमसत आहेत ह्याची जाणिव ह्या निमित्ताने सगळ्यांनाच झाली. ह्या कृत्यानंतर पुण्यात प्लेगच्या साथी पुढंही आल्या पण असे अत्याचार करण्याची हिम्मत किंवा दुर्बुद्धी म्हणा इंग्रज सरकारला पुन्हा झाली नाही. एका अधिकाऱ्याच्या खुनात इंग्रज सरकार उलथून पडणार नव्हते कि स्वातंत्र्य मिळणार नव्हते पण ही उपलब्धी काय कमी होती. ह्या बलिदानाने चापेकरांचा निर्वंशच झाला, त्यांच्या घरात कुणाला प्लेग झाला नव्हता तरी त्यानी स्वत:च्या मर्जीने हे बलिदान केले. त्याची आज काहीतरी लाज बाळगली पाहिजे कि नको?टिळकांनी चिथावणी दिल्यामुळे त्यानी हे कृत्य केले असे जरी म्हटले तरी तो सत्याचा अपलाप आणि चापेकारावाराती अन्याय होईल आणि न केलेल्या कृत्याचे श्रेय टिळकांना मिळेल अन्यथा ह्यात लाजिरवाणे असे काही नाही. पण इंग्रज अधिकाऱ्यांच्या जुलमाचा प्रतिशोध घेण्या मुळे मनस्वी दु:ख होणाऱ्या अधमाधम कुलांगार अवलाद्देना त्याचे काय होय . द्रविड बंधू जसे इंग्रजाना फितूर झाले तसल्याच ह्या अवलादी...
आता विजय दिवे ह्यांनी जाणून बुजून जो महार लोकांचा त्या सैनिकांनी घरात घुसून ब्राह्मण बायकांच्या काखा बगला तपासण्याचा गलिच्छ उल्लेख केला आहे त्याबद्दल थोडे .
हे समजायला फार अक्कल लागणार नाही कि हा महार सैनिकांचा उल्लेख यंदाच झालेल्या भीमा कोरेगाव , महार बटालियन , २०० वर्षापूर्वीच्या युद्धाच्या जायच्या पार्श्वभूमीवर जनतेच्या भावना भडकावण्या साठी मुद्दाम केला आहे पण
ब्रिटीश इस्ट इंडिया कंपनीने बॉम्बे नेटिव्ह इन्फन्ट्री मध्ये सामील असलेल्या लोकातून महार जातीचे लोक वेगळे काढून पुढे महार रेजिमेंट स्थापन केली.इंग्रज-मराठा युद्धात महार रेजिमेंट ने असामान्य पराक्रम शौर्य आणि स्वामी निष्ठा दाखवत इंग्रजाना अनेक जय मिळवून दिले हे खरेच पण त्यानी १८५७ च्या बंडाच्या बंदोबस्तात उत्तम कामगिरी करत महाराष्ट्रात तरी बंडाचा वणवा न भडकू देण्यात मोलाचा वाटा उचलला.( ह्यात जात म्हणून महारांची बदनामी करण्याचा हेतू नाही. इतर अनेक भारतीय सैनिकांच्या पलटणी स्वामिनिष्ठ होत्याच पण संस्थानिकही इंग्रजानप्रती स्वामी निष्ठच होते.भारताप्रती निष्ठा दाखवायला भारत एक देश म्हणून अगदी संकल्पना म्हणून तेव्हा लोकाना माहिती नव्हता.)पण इंग्रजानी ह्याची परत फेड कशी केली तर १८५७ च्या नंतर इंग्रज अधिकाऱ्यांनीच मांडलेल्या The Martial Races theoryप्रमाणे महार हे लढवय्ये जमातीत येत नसल्याने त्यांची भरती कमी केलीच पण १८९२ मध्ये ती महार रेजिमेंट खालसाच केली. अगदी १९१४च्य प्रथम विश्व युद्धात देखील त्याना घेतले गेले नाही. भारतातून तेव्हा जवळपास १० लाख लोक भरती केले गेले पण ते सगळे ह्या The Martial Races theoryप्रमाणेमराठा पंजाबी, पठाण, शीख गुरखा वगैरे...ह्या महारांच्या केलेल्या विश्वासघाताबद्दल गोपाल बाबा वालन्गकर,शिवराम जानबा कांबळे अशा तत्कालीन महार पुढार्यानी नाराजी व्यक्त करत हा अन्याय दूर करण्यासाठी सरकारकडे प्रयत्न केले . त्याला गोपाल कृष्ण गोखले ह्यांनी ही साथ दिली पण इंग्रज बधले नाहीत. पुढे दुसरे महायुद्ध सुरु झाले तेव्हा डॉ बाबासाहेब आंबेडकर हे Defense Advisory Committee of the Viceroy's Executive Councilचे सदस्य म्हणून निवडून घेतले गेले तेव्हा त्यानी अथक प्रयत्न करून हा अन्याय दूर केला आणि १९४१ साली परत महार रेजिमेंट स्थापन केली, जी आजतागायत चालु आहे.
तर मुद्दा असा कि जर १८९२ पासून महार रेजीमेंटच नव्हती तर १८९७ साली पुण्यात स्त्रियांच्या काखा बगला तपासायला, अब्रूवर घाले घालायला महार सैनिक येणार कुठून?आणि अशा अबला स्त्रियांच्या विटंबना करण्यात काय पौरुष ? पण जातीय विखर पेटवायचा म्हटल्यावर अक्कल अशीच गहाण टाकून इतिहास असाच दावणीला बांधला जातो.
---आदित्य
संदर्भ
१. कंठस्नान आणि बलिदान – वि श्री जोशी
२. पुणेरी – श्री ज जोशी
३. जोशीपुराण - श्री ज जोशी
४. लो. टिळकांचे केसरीतील लेख
५. आत्मवृत्त- धोंडो केशव कर्वे

विषय: 
Group content visibility: 
Use group defaults

पण जातीय विखर पेटवायचा म्हटल्यावर अक्कल अशीच गहाण टाकून इतिहास असाच दावणीला बांधला जातो.
<<

अगदी सहमत !

---
ह्या विनोद दिवट्या सारखे कितीही फेसबुकी किडे-मकोडे, काहिही बरळले तरी लोकमान्य टिळकांसारख्या सुर्याचा अपमान होणे कधी तरी शक्य आहे का !

पण जन्माने हे लोक ब्राह्मण असल्याने स्वतंत्र भारताच्या इतिहासात दखलपात्र असण्याचे काही कारण नव्हते.
>>> काहीही !

आदित्य श्रीपद यांनी आपले खरे रंग दाखवले. >> हो, अन इतरांनाही आपले खरे रंग दाखवायला भाग पाडले.
त्यांनी लिहिलेलं लिखाण बोचरं असलं तरी त्यातलं सत्य कसं काय दडून राहील ?
सरसकट सगळ्याच वरच्या जातीतल्यांनी ज्या आहुती दिल्या त्यात त्यांचा दलितांना दडपण्याचाच कसा उद्देश होता, असं कस म्हणता येईल ? म्हणजे भारताला स्वातंत्र्य मिळवून देण्याचा मक्ता फक्त ब्राह्मणेतरांनीच घेतला होता की काय?

आ दित्य श्रीपाद -लेख आवडला.
हेला - जर डेटा पॉईन्ट्स ने ले ख लिहिला असेल तर तुमची कमेन्ट योग्य कशी?
जे चाललय ते अ तिशय गलिच्छ आहे. (समाजात).
हिटलर शी नात साम्गणारा ब्राह्मण्द्वेष दिसतो.
असो.

विलभ ह्यान्चा प्रतिसाद आवडला.

मायबोलीवरील इतिहासतज्ञ, साथीच्या रोगांचा अभ्यास केलेले डॉक्टर, झालंचतर स्त्रीवाद कोळून पिलेले स्त्रीवादी यांच्या प्रतिसादाच्या प्रतिक्षेत.

===
<<< जेव्हा सर्व जाती धर्मातले पुढारी विचारवंत, धुरीण शांत बसले होते तेव्हा ह्या अतिसामान्य कुवतीच्या + इंग्रजी सैन्यात नोकरी करायची होती पण ब्राह्मण विशेषत: चित्पावन ब्राह्मण असल्याने त्याना सैन्यात घेतले गेले नाही त्याचा राग मनात धरलेल्या + उचापत खोर + अनेक धर्मांतरीत हिंदुना चोप देणे हे आवडते काम असलेल्या तरुणांनी शांत न बसता प्रतिकार करायचे ठरवले.
>>>
हम्म ठिकाय.

@अदित्य श्रीपद,
अतिशय माहिती व अभ्यासपूर्ण लेख.
---
मात्र ह्या टिवट्या सारख्या, बिग्रेडी इतिहासावर पोसलेल्या बिनअक्कल व विकृत लोकांना इतकं संदर्भासहित समजावूनही काही उपयोग होणार नाही, उलट या लेखावर सुद्धा चिखलफेक चालू होणार, याची खात्री बाळगा!!

150 वर्षाची गुलामी अंगात भिनलेली असल्याने स्वातंत्र्य सैनिक, क्रांतिकारक, ह्यांची बदनामी करून आधुनिक इंग्रज मालकांना प्रसन्न करण्याचा प्रयत्न, 21 व्या शतकात गुलामांची वंशज करीतच असतात.
त्यांना इग्नोर करावे,

'ते' विरुद्ध 'आम्ही' चे जे पोरकट प्रकार चालले आहेत ना भारतात ते सर्वांसाठीच घातक आहेत. ह्या 'ते' मध्ये व 'आम्ही' मध्ये जाती बदलत राहतात फक्त. काही जण इथे मात्र ब्राह्मणांसाठी हळहळतात, काही फक्त दलितांसाठी , काही मुसलमानांसाठी. काही क्रिश्चनांसाठी. एकूण भारतीय समाजात सौहार्द राहावे यासाठी कुणी तळमळत नाही.

आपण ज्या जातीत जन्माला आलो, त्या जातीविरुद्ध कोणी बोललं की तो आपोआप तुमचा शत्रू होऊन जातो... हे आधुनिक जगणे नाही, अतिप्राचिन काळात टोळीबाजांचे जसे असायचे तसे आहे.

कोण्या दिडदमडीच्या माणसाने काहीतरी उलटसुलट ब्राह्मणांच्या विरुद्ध लिहिलं म्हणून कितीतरी लोक इथे कळवळलेले दिसत आहेत. त्या लोकांना साधा प्रश्न आहे की इतिहासाची मोडतोड झाली म्हणून कळवळताय की ब्राह्मणांविरुद्ध लिहिलं म्हणून? तुम्ही त्या जातीचे नसला असतात तर तितकेच वाईट वाटले असते का?

मी जातीने ब्राह्मण नाही. तरीही मला सरसकट ब्राह्मणजातीचा द्वेष केला जाणे मंजूर नाही. त्या प्रकाराने मीही व्यथित होतो . तसाच मी व्यथित होतो जेव्हा प्रत्येक मुस्लिम हा आतंकवादाशी जोडला जातो तेव्हा. प्रत्येक दलित 'हे साले असेच फुकटे' अशा अर्थाने हिणवले जातात तेव्हा. हे असे हिणवणे द्वेष करणे आदीम टोळीबाजपणाचे लक्षण आहे.

प्रस्तुत लेख इतिहासाची मोडतोड झाली म्हणून लिहिला नसून ब्राह्मणांविरुद्ध प्रचार झाला त्या दु:खातून लिहिला आहे.

प्रस्तुत लेख इतिहासाची मोडतोड झाली म्हणून लिहिला नसून ब्राह्मणांविरुद्ध प्रचार झाला त्या दु:खातून लिहिला आहे. >>
ब्राह्मणांविरुद्ध चुकीचा प्रचार झाला, त्या दुःखातून लिहिले आहे.

एकेकाळी एका महामानवाने म्हटलं होतं, 'शिका, संघटीत व्हा, लढा!'. त्याबरोबरच त्यांनी 'एकरुप व्हा' असाही संदेश द्यायला हवा होता. त्यांना काय माहित, की त्यांचे काही अनुयायी येनकेन प्रकारे लढण्यातच धन्यता मानतात.

टीप - वरील वाक्य कुणा एकाला उद्देशून नाही

त्यांनी 'एकरुप व्हा' असाही संदेश द्यायला हवा होता. >>> चोराच्या उल्ट्या बोम्बा म्हनतात ते हेच. धन्य झालो हा प्रतिसद बघुन...

आणि एक. जगातल्या सर्वात महान आणि सर्वात प्राचिन अशा हिंदुधर्मात इतके महात्मा, संत पुरुष होऊन गेले ज्यांनी सातत्याने आपल्या कोट्यावधी अनुयायांना शेकडो वर्षांपासून जी समता बंधुता आणि प्रेमाची शिकवण दिली, ती शिकवण त्या अनुयायांनी आत्मसात केली असती तर त्या महामानवाला (डॉ. आंबेडकर. ज्यांचे नाव आपण घ्यायला लाजत आहात) 'शिका संघटित व्हा आणी संघर्ष करा' इत्यादी, इत्यादी, अशी शिकवण द्यायची आवश्यकताच पडली नसती...

यावर तुमचे काय मत आहे विलभ?

लो. टिळकांचे कर्तृत्वआणि प्रखर देशप्रेम वादातीत असले तरी ते प्रखर सुधारणाविरोधी होते. प्लेगच्या बाबतीत त्या काळी सर्वत्रच लोकांमध्ये फार कमी माहिती होती. लससुद्धा निघाली नव्हती. त्यामुळे आय्सोलेशन, क्वारंटाइन आणि आत्यंतिक स्वच्छता एव्हढेच करण्याजोगे होते. उंदीर हे या रोगाचे वाहक आहेत इतकेच माहीत होते आणि उंदीर मरू लागले म्हणजे या रोगाचा प्रादुर्भाव झाला असून तो माणसांमध्येही पसरणार हे ठाउक झाले होते. ब्रिटिश सरकार हे आय्सोलेशन, क्वारंटाइन आणि उंदीर मारण्याची औषचे जागोजागी शिंपडणे यावर भर देत असे. पण लागण झालेल्या व्यक्तीस दूर ठेवायला आणि आपण स्वत: ही ती दूषित जागा सोडून इतर ठिकाणी जायला सर्वसामान्य लोक तयार नसत. उच्व मध्यम आणि धनवान वर्गातील लोक हवापालट करू शकत. कोणी आपापपल्या गावी जर साथ पोचली नसेल तर तिथे जात. पण गरीब मात्र त्याच जागेला चिकटून राहात
पुढे चालू.

हेला ह्यांनी जर मनात काही एक गृहीतक धरून लिहिलेल्या लिखाणाचे विश्लेषण केले असेल तर त्यांचा ग्रह दूर करत येणे मुश्कील आहे आणि तो खास प्रयत्न करून मी दूर करावा ह्याचेही प्रयोजन काही दिसत नाही. मायबोलीवर त्यानी स्वत: काही लेखन केलेलं दिसस्त नाही त्यामुळे त्यांच्या अभ्यासाबद्दल किंवा व्यासंगाबद्दल काही सांगता येत नाही , ह्या आधी त्यानी माझ्या अनेक लेखांवर कधी प्रतिक्रिया दिल्याचे स्मरत नाही ते कदाचित माझे सगळे लेख बारकाईने वाचत असतील आणि मी कधी एखाद्या लेखात माझे खरे रंग दाखवून क्लोजेत बाहेर येतो ह्याची ते वात पाहत असावेत फक्त आधीच्या अनेक लेखात दिसलेले माझे रंग खोटे होते कि ते लेख क्कृष्ण धवल होते कुणास ठावूक .
टिळक सनातनी होते , कर्मठ होते सुधारणा विरोधी होते एवढेच काय तर त्यानी १९०६च लाखनौ करार करून मुस्लिमांना झुकते माप दिले हे मी जीनांच्या लेखात लिहिलेच होते कि, त्यावेळेस टिळकवादि लोक भडकले , इस्रायल च्या लेखात ज्यू बद्दल लिहिले कि पालेस्टाईन समर्थक भडकतात , साधे दत्तक विधानाच्या माझ्या लेखात ह्या प्रकारात असलेल्या भ्रष्टाचाराच्या आणि सरकरी दिरन्गाइच्य, संथ पणाच्या अनुभवावर लिहिले तरी शिव्या खाल्ल्या आहेत मी , आरक्षणावरील लेखात तसेच झालेले आणि सेक्युलारीझमवरच्या लेखात ही तसेच. साधे एका लेखात मी स्त्रिया विशेषत: विधवा आणि त्यातूनही ब्राह्मण विधवांची स्थिती किती शोचनीय असे ह्यावर काहीलिहिले तर त्यावरून एक विदुषी माझ्यावर एवढ्या भडकल्या कि मला कळेचना नक्की एवढे काय चुकीचे झालेय ,ह्या बाई आता काय माझ्यावर केस करतात कि मोर्चा काढतात आणि घरी येतात अशी भीती वाटू लागली ,मी तरी तेव्हा गप्प बसणेच पसंत केले. तेव्हा कुणाला आपले काय रंग दिसताहेत आणि कोण रंगान्धळा आहे ह्याची फार वास्तपुस्त न करणे श्रेयस्कर असे मी ठरवले आहे. आपले म्हणणे स संदर्भ मांडून त्या अनुषंगाने कुणी चर्चा अगर वाद प्रतिवाद करत असेल तर बोलण्यात लिहिण्यात अर्थ असतो अन्यथा नुसते हेत्वारोप करणे आणि मूळ मुद्दे सोडून स्वत: काही अभ्यास न करता निरर्थक चर्चा-धुराळा उडवणे हे ज्याना करायचा त्यानी तो करावा ... माझ्या सदिच्छा - लांबूनच .( एकदा आपली भूमिका स्पष्ट व्हावी म्हणून एवढे लिहिले आहे पुढे ह्या प्रकारच्या मुद्द्यांना प्रतीसादाना ओ देणार नाही असे ठरवलेले आहे .)

आपल्या लेखातला हा परिच्छेदः:

तर २०० वर्षापूर्वी २८००० ब्राह्मण सैन्याला खडे चारल्याची आणि इंग्रजांची तळी उचलल्याची साग्रसंगीत, वाजत गाजत आठवण काढून झाल्यावरही काही मजा येईना.अगदी छत्रपती शिवाजीमहाराजांचे चित्र असलेले टि शर्ट घातलेल्या राहुल फटांगळेचा बदडून खुन, कपाळावर शिवगंध( हा काय प्रकार आहे?) लावलेल्या विशाल जाधव वर प्राणघातक हल्ला, " छत्रपती , भवानी , गणेश " या आणि अशाच प्रकारची नावे असलेल्या जवळपास १३० मालमत्ताची नासधूस जाळपोळ करणे, याशिवाय गणपती , साई बाबा यांच्या मंदिराची मोडतोड करुन विटंबना करणे इत्यादी प्रकार करूनही काही रंग भरेना. ( हे सगळे पोलीस दफ्तरी नोंद आहे. –आभार तुषार दामगुडे )

हा तुषार दामगुडे आणि तो विनोद दिवे ह्या दोघांत काडिमात्र फरक नाही.

दलितांनी काढलेला मोर्चा ज्या विरोधात होता ते कारण म्हणजे भीमाकोरेगावची पूर्वनियोजित दंगल. हिंदुत्ववादी दहशतवादी लोक दलितांच्या गाड्यांवर अमानुष हल्ले करतांनाचे अक्षरशः शेकडो विडिओ आहेत.. त्याबद्दल आपण ह्या लेखात चकार शब्दही काढला नाहीये. मात्र देवांचे नावं असलेल्याची मोडतोड, हत्या इत्यादी मात्र मस्त रंगवून लिहिल्यात. दलितांचे खून पडलेत ते कोण लिहिणार इथे? पोलिसांनी जे गावोगावी दलित तरुणांचे अमानुष कोंबिंग ऑपरेशन केले ते आपल्या अभ्यासू नजरेतून सुटले असावे. तुम्हाला मात्र ब्राह्मण कसे खतरेंमें आहेत ह्याबद्द्ल 'जनजागृती' करायची असल्यामुळे कदाचित गरज वाटत नसावी.

माणसाला जेव्हा एकाच बाजूचं खरं वाटायला लागतं आणि त्या समर्थनार्थ बचावार्थ तो ऐतिहासिक अभ्यासू व्यासंगी संदर्भासकट वाटणारे मेगाबायटी लेख टाकू लागतो तेव्हा त्याचे खरे रंग कळतात. इतकाच तुम्हाला तटस्थ असण्याचा दंभ असेल तर जरा भीमा कोरेगावच्या दंगलीवरही होऊन जाऊद्याकी एक अभ्यासू लेख. संदर्भ सर्व उपलब्ध आहेतच नेटवर.

गेल्या शंभर वर्षात जातीयवादातून किती ब्राह्मणांचे ब्राह्मण म्हणून खून पडलेत आणि किती दलितांचे खून पडलेत अत्याचार झालेत ह्याची आकडेवारी काढा. भोतमांगेसारखे एक प्रकरण दाखवा ब्राह्मण जातीच्या व्यक्तीसोबत झालेले. मग ब्राह्मणद्वेष किती विखारी झालाय याच्या पिपाण्या वाजवा बेंबीच्या देठापासून, आपले काय म्हणणे नाही.

मला सरसकट ब्राह्मणजातीचा द्वेष केला जाणे मंजूर नाही. त्या प्रकाराने मीही व्यथित होतो . तसाच मी व्यथित होतो जेव्हा प्रत्येक मुस्लिम हा आतंकवादाशी जोडला जातो तेव्हा. प्रत्येक दलित 'हे साले असेच फुकटे' अशा अर्थाने हिणवले जातात तेव्हा. हे असे हिणवणे द्वेष करणे आदीम टोळीबाजपणाचे लक्षण आहे. >>>
सेम हिअर. "ब्राह्मणांनी/मराठ्यांनी/दलितांनी..." पासून सुरू होणारी सर्व चांगली किंवा वाईट घटनांमधले वागणे दाखवणारी वाक्ये चुकीची असतात. कारण कोणत्याच धर्माचे/जातीचे लोक असे एका घाउक प्रकारे वागत नाहीत, त्यांचे आर्थिक/सामाजिक गटसुद्धा सारखे नसतात.

२-३ आठवड्यांपूर्वी पुण्याच्या सभेत इतकी वर्षे जातीयतेशी अजिबात संबंध नसलेल्या पुणेरी पगडीला जातीय करून टाकण्यात आले. तेथे जामीनावर सुटलेल्या व्यक्तीला महात्मा फुले पगडी घालण्यात आली व सर्व उपस्थितांनी एकमेकांना पुरोगामी म्हणून घेतले. यात दोन्ही पगड्यांचा अपमान केला गेला हे अनेकांना जाणवले नाही. त्याविरूद्ध स्वघोषित लिबरल मीडियामधे फारशी टीका दिसली नाही. दिसलेच तर यातील जातीयतेवर टीका न करता पवारांचा मास्टरस्ट्रोक छाप कौतुके दिसली. हेच जर फडणविसांनी किंवा आणखी कोणी केले असते तर इतका फ्री पास दिला गेला नसता. राष्ट्रवादीचा प्रभाव कमी झाला की मतांच्या पोलरायझेशन करता असले विचार मीडियात सोडण्यात येतात. त्यामुळे वरकरणी फुटकळ लोक लिहीत आहेत असे दिसले तरी हे "विचारधन" देणारे वेगळेच आहेत.

मुस्लिमांविरूद्ध सोशल मीडियामधे जे चालते त्याला भरपूर झोडले जाते व ते बरोबरच आहे. पण ब्राह्मणांविरूद्ध असल्या काड्या घालणारे ही अनेक आहेत.

आता मूळ लेखाबद्दलः

प्लेग, रॅण्ड चा खून वगैरे बद्दल जे लिहीले आहे ते अनेक संदर्भ वापरून लिहीलेले जाणवते, त्यामुळे आवडले.

मात्र लेखात कोरेगाव भीमा चा उल्लेख आला आहे त्यात तेथील गेली काही वर्षे जोर धरलेला मूळ वार्षिक समारंभ व यावर्षी त्याला देण्यात आलेला राजकीय रंग यात फरक करणे आवश्यक आहे. गेली अनेक वर्षे जो समाज तेथे जात आहे त्यांच्याबद्दल आकस धरण्याचे काहीच कारण नाही. तो भाग या चर्चेशी अजिबात संबंधित नाही.

मागील प्रतिसादापासून पुढे:
सर्वसामान्य लोक घरातच राहाणे पसंत करीत. सरकारी लोक घराघरात घुसून कोणाचा प्लेगने मृत्यू झालाय अथवा नवी लागण झालीय का याची तपासणी करीत. लोकांना हे मुळीच आवडत नसे. कित्येकदा मृताचे शवही लपवून ठेवले जाई कारण प्लेगने म्रुत्यू शाबीत झाला तर इतरांना सक्तीने बाहेर काढून क्वारंटाईन समूहात रवानगी होई. मृतव्यक्तीचे कपडे आदि सामानसुमान जाळले जाई. इतरही सामानाची अगदी स्वयंपाकघर आणि देवघरापर्यंत जाऊन तपासणी आणि स्वच्छता होई. त्या काळातल्या सोवळ्याओवळ्याच्या आणि भ्रष्टाचाराच्या तीव्र कल्पना लक्ष्यात घेतल्या तर लोकांना ही मोठीच शिवाशिव आणि अत्याचार वाटे. शिवाय जांघेत बगलेत गाठ आहे की काय याचीही तिथे स्पर्श करून तपासणी हे सरकारी लोक करीत असत कारण आजारपणा लपवण्याकडे लोकांचा कल असे. लोक ह्या स्वच्छतेचा तिरस्कार करीत कारण त्यांच्या स्वच्छतेच्या कल्पना वेगळ्या होत्या.
या सर्व परिस्थितीमुळे असंतोष वाढत गेला. त्याला धार्मिक छळाचा रंग चढला. मग टिळकांनी हा प्रश्न हातात घेतला. लोकमान्य टिळकांची भाषा अतिशय सडेतोड, कठोर आणि झोडपणारी होती. त्यांची ही शैली पुढे आचार्य अत्रे आणि बाळासाहेब ठाकरे यांनी पूर्णत्वाला नेली. या जहाल लेखांमुळे तरुणांची मने ब्रिटिशांविरुद्ध उत्तेजित झाली. त्यातून रॅंडचा खून झाला.

मला वाटते हेला हे कोण म्हणजे ताई कि दादा माहिती नाहीत पण त्यानी स्वतंत्र आपला लेख लिहून मुद्द्यांचे सप्रमाण खंडन करावे उगाच लोकाना ह्याच्यावर लीहाकी त्याच्यावर लिहाकी अमाक्याबद्दल चकार शब्द काढला नाही असली whataboutarism दाखवणारी विधाने करू नयेत. माझे फेस बुक प्रोफाईल खुले आहे त्यावर भीमा कोरगाव पासून त्याच्या आधीच्या ही अनेक गोष्टीवर वेळोवेळी लिहिलेले आहे...एकंदरीत पूर्वग्रहदुषित नजरेने कुणाकडे, कुणाच्या लिखाणाकडे पाहू नये पण हा सल्ला काही ते मानणार नाहीत हे ही माहिती आहे म्हणून आता पुरे ...तुमच्या मूळ विषयाला सोडून असलेल्या प्रतीक्रीयाना उत्तर देणे मी थांबवत आहे ...तुम्ही हवे असल्यास त्याला सोयीस्कर पणे पलायन वाद म्हणू शकता ...

<<मागील प्रतिसादापासून पुढे:
सर्वसामान्य लोक घरातच राहाणे पसंत करीत. सरकारी लोक घराघरात घुसून कोणाचा प्लेगने मृत्यू झालाय अथवा नवी लागण झालीय का याची तपासणी करीत. लोकांना हे मुळीच आवडत नसे. कित्येकदा मृताचे शवही लपवून ठेवले जाई कारण प्लेगने म्रुत्यू शाबीत झाला तर इतरांना सक्तीने बाहेर काढून क्वारंटाईन समूहात रवानगी होई. मृतव्यक्तीचे कपडे आदि सामानसुमान जाळले जाई. इतरही सामानाची अगदी स्वयंपाकघर आणि देवघरापर्यंत जाऊन तपासणी आणि स्वच्छता होई. त्या काळातल्या सोवळ्याओवळ्याच्या आणि भ्रष्टाचाराच्या तीव्र कल्पना लक्ष्यात घेतल्या तर लोकांना ही मोठीच शिवाशिव आणि अत्याचार वाटे. शिवाय जांघेत बगलेत गाठ आहे की काय याचीही तिथे स्पर्श करून तपासणी हे सरकारी लोक करीत असत कारण आजारपणा लपवण्याकडे लोकांचा कल असे. लोक ह्या स्वच्छतेचा तिरस्कार करीत कारण त्यांच्या स्वच्छतेच्या कल्पना वेगळ्या होत्या.
या सर्व परिस्थितीमुळे असंतोष वाढत गेला. त्याला धार्मिक छळाचा रंग चढला. मग टिळकांनी हा प्रश्न हातात घेतला. लोकमान्य टिळकांची भाषा अतिशय सडेतोड, कठोर आणि झोडपणारी होती. त्यांची ही शैली पुढे आचार्य अत्रे आणि बाळासाहेब ठाकरे यांनी पूर्णत्वाला नेली. या जहाल लेखांमुळे तरुणांची मने ब्रिटिशांविरुद्ध उत्तेजित झाली. त्यातून रॅंडचा खून झाला.>>
हे असे सरकारही म्हटले पण अनेक मवाळ राजकारण्यांची मते , सुधारक सारख्या मवळ नियत कालीकांचे लेख देखील तितकेच चिथावणीखोर होते हे लेखात सप्रमाण दाखवून दिले आहे.

ओ काका. तुम्ही इथे काय लिहिलं आहे त्यावर चर्चा सुरु आहे. घरात ऑफिसात गाडीत असतांना कोणती गाणी गुणगुणता त्याचा काय संबंध इथे?

तुमचा जो परिच्छेद मी टाकला आहे त्याची नक्की भूमिका काय आहे तुमच्या ह्या लेखात? कसा काय रिलेटेड आहे तो चापेकर रँड प्रकरणाशी आणी ब्राह्मणांच्या बदनामीशी?

" मी इकडे काय लिहिलं आणि तिकडे काय लिहिलं " च्या वल्गना गरजेच्या नाहीत आणि त्यापण व्हॉटअबाउटरीच आहेत.

दामगुडे बाैद्धांना नक्षलवादी ठरवण्यासाठी खुप खटाटाेप करताेय

म्हणजे काय तर ही त्रिसूत्री आहे:
१. मुस्लिम आतंकवादी आयसिसवाले खुनी दरिंदे इस्लामचा प्रसार करायला हिंदूचा नायनाट करणार आहेत.
२. दलित-बौद्ध-आंबेडकरवादी हे नक्षलवादी-माओवादी असून देशाचे तुकडे पाडणार आहेत.
३. मराठे-बहुजन हे ब्रिगेडी असून देशद्रोही आहेत.

अशी त्रिसूत्री मांडली की आपोआप या देशाचा लाडका बाब्या कोण उरतो? तोच ज्याच्यासाठीच्या कळवळ्यातून सदर लेख लिहिला गेला आहे.