माझ्या महाराष्ट्राचं गाणं

बेलाग कातळ कड्याची कपार
त्यातून खुणवी गरुडाचे घर
घाटाचे वळण थोपवी पठार
झुकल्या माडांशी खेळतो सागर

पाटाच्या पाण्याची खळाळ लकेर
घामाच्या खताने फुलते शिवार
शेताच्या बांधाशी चटणी भाकर
कष्टाच्या घासाला तृप्तीचा ढेकर

भारूडा भुलवी लावणी शृंगार
ओवीच्या थेंबात शांतीचा सागर
अभंग हसतो झेलून प्रहार
भक्तीने भिजतो चंद्रभागातीर
दिंडीच्या रिंगणी विठूचा गजर

मेणाचे मार्दव, वज्रास टक्कर
रांगडा, भावुक, उदात्त, गंभीर
कीर्तीचा डिंडिम अटकेच्या पार
मानवी रत्नांचा अथांग सागर
भारतवर्षाचा चिरायु आधार.