संवेदनाशील झाड

Submitted by पल्ली on 15 July, 2016 - 03:50

इतकं कसं हे झाड़ संवेदनाशील?
आजुबाजुला तापलेलं असताना
हे मात्र गार सावली करुन
वाट बघतंय पांथस्थाची,
गुलाबी मखमली फुलं
अशी अंगा खांद्यावर फुलवून
लाजत बिचकत उभंय,,,
त्यात मंद गंधाच्या हजारो कुपी,,
कहरच झाला!
पण, चुकलंच ज़रा झाडाचं...
इतक्या वैयक्तिक गुलाबी आठवणी
अश्या रस्त्यावर नको होत्या पसरायला,
येणारा जाणारा विचार न करता
निर्दयी पणानं त्या एकेका
सुकत चाललेल्या आठवणीला
पायदळी तुडवून जातोय....
मन मोकळं असं कुणाजवळही करू नये,
एवढा व्यवहार नाही कळला तुला?
ठेवल्या असत्यास त्या आठवणी जवळ,
सुकल्या असत्या, तरल झाल्या असत्या,
दूर उडाल्या असत्या, रुजल्या असत्या.
चुकलंच तुझं.
असो,
अरे मनस्वी झाड़ा,
सांगिन तुझा निरोप त्यांना,,,
नाही तुडवायचे तुझ्या भावनांना ते या पुढे.
-पल्लवी देशपांडे
(फेबु वर पूर्व प्रकाशित)

शब्दखुणा: 
Group content visibility: 
Public - accessible to all site users