तिने रुसायला हवे

कुशीत घ्यायला तिला.. तिने रुसायला हवे
म्हणून रोज एकदा तिला छळायला हवे....

समर्पणात सौख्य केवढे असेल जाणण्या
पतंग होउनी दिव्यावरी जळायला हवे..

भविष्य पाहण्यात वेळ घालवायला नको
घडेल त्यास फक्त चांगले म्हणायला हवे...

जखम जुनी मनातली जपून ठेव वेदने
कशी परत करायची मला शिकायला हवे..

नको पळूस युद्ध सोडुनी उगाच जीवना
जगायचे असेल तर पुन्हा लढायला हवे...

तुझ्या अढळपदास मी जपेन नेहमीच पण
नभा तुला समोर माझिया झुकायला हवे..

पुसून आरसा कसा दिसेल स्वच्छ चेहरा
तुला स्वतःवरील डागही पुसायला हवे..

तुझी खट्याळ ओढणी नकोच सावरूस ना
ऋतूबदल जगातले प्रिये घडायला हवे..

-- संतोष वाटपाडे (नाशिक)