शाप पूर्वापार आहे

Submitted by निशिकांत on 25 September, 2014 - 09:28

अंतरीच्या पोकळीचा शाप पूर्वापार आहे
भोवताली घोळका, पण एकलेपण फार आहे

नांदतो एकत्र आम्ही दावणीला बांधल्यागत
गुंतणे त्याला न जमले, ही खरी तक्रार आहे

तो करी कर्तव्यपूर्ती वागताना मजसवे पण
प्रेम मिळण्याची अपेक्षा, पूर्ण का होणार आहे?

जन्मदिन लक्षात ठेउन साजरे केले मुलांचे
"जन्मली मीही असावी" हा विषय बेकार आहे

मी हवी माझ्या घराला फ्रीज अन् पंख्याप्रमाणे
संपली उपयोगिता की, वाटते भंगार आहे

बंडखोरी मी कराया लागता समजून आले
चौकटीला तोडणारी आत माझ्या नार आहे

प्रेम पहिले अंकुराया लागण्या आधीच सुकले
आजही तो जीवनाचा काळ हिरवागार आहे

लागला आहे लळा मज रोजच्या अवहेलनेचा
बंडखोरी जीवनाशी नेहमी करणार आहे

वापरू कुबड्या कुणाच्या का सुखामागे पळाया?
हासते मी, वेदनांचा वाटतो आधार आहे

जर तुला "निशिकांत" माया लाभली असती कदाचित
वर्णिले असतेस जीवन "अमृताची धार आहे"

निशिकांत देशपांडे. मो.क्र. ९८९०७ ९९०२३
E Mail--- nishides1944@yahoo.com

Group content visibility: 
Public - accessible to all site users

गझल आवडली
मक्ता नेहमीप्रमाणे अधिक आवडला

ही स्त्रीमनाची गझल आहे हे लक्षात यायला मला वेळ लागला कारण तशी अपेक्षा ठेवून वाचायला घेतली नव्हती पण हा धक्का सुखद होता माझ्यासाठी

धन्यवाद काका

सुंदर

चांगली गझल, वाईट वाटले अनेक शेर वाचून! >> +१ Happy

"जन्मली मीही असावी" हा विषय बेकार आहे
>>
हे असे हवे का? "जन्मले मीही असावे" हा विषय बेकार आहे

वा वा !

मनापासून आवडले बरेच शेर !

स्त्री भुमिकेत शिरून इतके प्रभावी शेर लिहिल्याबद्दल मनःपुर्वक अभिनंदन !

-सुप्रिया.