सुरू होतील आता वादळे माझ्या विचारांची - तरही

Submitted by बेफ़िकीर on 1 March, 2014 - 09:37

तरही गझल ह्या धाग्यासाठी डॉ. कैलास गायकवाड ह्यांचे व ह्यावेळच्या मिसर्‍यासाठी वैभव कुलकर्णी ह्यांचे मनापासून आभार! माझा नम्र सहभाग खालीलप्रमाणे:

गझल अजून अपूर्ण आहे व कदाचित एक दोन शेर (जे मनात घोळत आहेत) ते ह्यात वाढू शकतील.

-'बेफिकीर'!

=============================

उजाडू लागली आहे अमावास्या विचारांची
सुरू होतील आता वादळे माझ्या विचारांची

पुन्हा वस्तुस्थिती देईल सल्ला पोक्त होण्याचा
पुन्हा भासेल टंचाई मनी तान्ह्या विचारांची

मनाचे बेट निमिषार्धात ठिकर्‍या होउनी उडले
तुझ्या डोळ्यात आली लाट जी खार्‍या विचारांची

मनाचे सर्व बिंदू टाकले कैदेत शब्दांच्या
मला करताच येईना गझल ताज्या विचारांची

हवा आहे तुला जो तो जमाना संपला आहे
इथे नाहीत आता माणसे साध्या विचारांची

(अपूर्ण)

==============================

-'बेफिकीर'!

Group content visibility: 
Public - accessible to all site users

आवडली पण अजून शेर हवेच
धन्यवाद बेफीजी माझ्या ओळीवरून तुम्हाला गझल लिहावी वाटली हा मी माझा सन्मान समजतो

मनाचे बेट निमिषार्धात ठिकर्‍या होउनी उडले
तुझ्या डोळ्यात आली लाट जी खार्‍या विचारांची

विरघळवून टाकणाऱ्या ओळी

मनाचे सर्व बिंदू टाकले कैदेत शब्दांच्या
मला करताच येईना गझल ताज्या विचारांची

हवा आहे तुला जो तो जमाना संपला आहे
इथे नाहीत आता माणसे साध्या विचारांची

व्वा !
तरहीची ओळही सुंदर !! Happy