बहाणा पुरे हा मला टाळण्याचा

Submitted by सुचेता जोशी on 9 October, 2013 - 04:23

नको अर्थ काढू खुळ्या वागण्याचा
खटाटोप चाले तुला जाणण्याचा

अताशा अताशाच धरतेय खपली
नको घाट घालू पुन्हा डागण्याचा

तुझे ओठ वेचू कि डोळ्यात पाहू ?
नवा छंद जडला तुला वाचण्याचा

जगाची खुशाली तुला देव देवो !
जरी हक्क नाही मला मागण्याचा

तनावर मनावर तुझे राज्य चाले
खरा अर्थ कळला अता जागण्याचा

सख्या दे कबूली मजा त्यात आहे
पुरे हट्ट वेडा खरे झाकण्याचा

तुझी नोकरी अन उपद्व्याप सारे
बहाणा पुरे हा मला टाळण्याचा

तुझ्या आर्त उत्स्फूर्त मिस-यात भेटू
खुला मार्ग नाही तुला गाठण्याचा

Group content visibility: 
Public - accessible to all site users

जगाची खुशाली तुला देव देवो !
जरी हक्क नाही मला मागण्याचा
तनावर मनावर तुझे राज्य चाले
खरा अर्थ कळला अता जागण्याचा >>>>>>>
खूप सुन्दर!!!!!!! Happy

Pages