नेमक्या वेळी नको ते आठवे

हुंदक्यांनी लाख केली आर्जवे
सारखे ओठावरी आसू हवे

आसवांचा आड पडदा दूर कर
एकदा बोलून घे दु:खासवे

रंगलो नाही कधी जागेपणी
कोण देतो रंग स्वप्नांना नवे

छाटल्या फांद्या निराशेच्या किती
एवढेसे सूख आता पालवे

संप दंगा घोषणा झाल्या सुरू
जो इथे खाईल त्याला खवखवे

लोक सारे वाटती आता मला
पारधी निवडून देणारे थवे

लाट प्रेमाची नसे साधीसुधी
बेट प्रेमाचे तिलाही जाणवे

विसरणे असते तसे सोप्पेच पण
नेमक्या वेळी नको ते आठवे

....मयुरेश साने