काजळ

Submitted by सई गs सई on 22 August, 2013 - 23:07

नीज पणाला लागते
मुक्या चांदण्या नभात
कशी जीवाला झोंबते..
ओल्या काजळाची रात

ओढावल्या वादळात
गळे काजळओल गाली
माझे रूप आरशात..
वेड्या भुताची सावली

स्वसुगंधाने वेडावली
राऊळी मनाच्या खोल
काजळात बुडालेली..
स्वप्नगंधाची फूलवेल

स्वप्नांची पारध भोळी
दिव्य भासांची पहाट
अशा काजळाच्या वेळी
उठे प्रारब्धाची लाट..

काळजी वाटे गं जीवाची
काळराती लागे झळ
उडे रे राख काजळाची
काळजात उठे कळ..

माधवाsss..
उडे रे राख काजळाची
काळजात उठे कळ..

- सई

विषय: 
काव्यलेखन
शब्दखुणा: 
सई गs सई
Groups audience: 
गुलमोहर - कविता
Group content visibility: 
Public - accessible to all site users
शेअर करा