असेच काही जगता जगता ......

असेच काही जगता जगता
चराचरातून टिपून घ्यावे
खोल मिसळुनी रक्तामध्ये
रोज नव्या रंगात नहावे

असेच काही जगता जगता
श्वास कुणाला आंदण द्यावे
कुणा ओठीच्या स्मितासाठी
स्वतःस थोडे छिलून घ्यावे

असेच काही जगता जगता
उन पावसाशी बोलावे
दु:ख कुणाचे करून आपले
आसवांमध्ये चिंब भिजावे

असेच काही जगता जगता
मनापासूनी लिहून जावे
लिहिता लिहिता भान हरपुनी
स्वतःच वेडी कविता व्हावे

असेच काही जगता जगता
मातीमध्ये कण रुजवावे
कुणास नकळत आभाळाचा
हात धरूनी निघून जावे

आनंद पेंढारकर