जाग नावाला तुझ्या निर्धार कर बरसायचा

Submitted by प्राजु on 2 April, 2013 - 08:37

जाग नावाला तुझ्या निर्धार कर बरसायचा
सोड मेघा छंद मातीला असा झुलवायचा

चेहरा सांगे तुझा सारी खुशाली पण तरी
काय डोळे यत्न करती वेगळे सांगायचा?

तूच चोथ्याला जगाच्या टाळले कंटाळुनी
सांगना 'काळा' तुझा घाणा कुणी फ़िरवायचा?

राग लटका का तुला कळलाच ना माझा कधी?
यत्न सुद्धा ना कधी केलास तू मनवायचा!!

तू नको वाईट वाटूनी असा घेऊ मना
घे जरा अनुभव तुही काहीतरी गमवायचा

प्राक्तना रुसशील माझ्यावर किती तूही असा?
घेतला आहे वसा मीही तुला हसवायचा

जीवनाच्या याच पाटीवर नव्याने चल मना
संयमाचाही धडा आहे अता गिरवायचा..

-प्राजु

विषय: 
काव्यलेखन
Groups audience: 
गुलमोहर - गझल
Group content visibility: 
Public - accessible to all site users
शेअर करा

तिलकधारींशी सहमत

फारशी इंप्रेसिव्ह नाही वाटली ही वृत्त-हाताळणी त्यामुळे असे असावे बहुधा (वै म)

Submitted by वैवकु on 2 April, 2013 - 10:19


संयमाचाही धडा आहे अता गिरवायचा

छान मिसरा.
संयमाचे महत्त्व लवकरात लवकर उमजणे फायद्याचेच.
शुभेच्छा.

Submitted by समीर चव्हाण on 2 April, 2013 - 12:45