तुला सांगितले होते...

तुला सांगितले होते...
नदी जन्मास येताना
तिला पाहून बर्फाचे
ह्रदयही वितळले होते

नभातून सांज होताना
जळी काळोख होताना
कुणी प्रत्येक चिमणीला
पिलाशी सोडले होते

कसा मेघांत गुदमरतो
गिरिंशी झोंबतो-लढतो
अशा वार्‍यास एका
चातकाने रडवले होते

कसा बेफाम दर्या
वादळाशी झुंज देताना
उरातुन चंद्र काही
चिंब ओले जपलेले होते

रुतावी खिन्न काळ्या
कातळातील रुक्ष निर्ममता
तिथेही पावसाने काल
मोती पेरले होते

तुला सांगितले होते...
असे नैराश्य गिळताना
उसासे थंड होताना
निखारे मंद विझताना
इथे उधळून सगळे
’त्या’ने काही राखले होते
तुला सांगितले होते...