करायची जातपात नाही!

एक रुबाई......

आले न मला ओरखडे सांधाया!
आले न कधीही तुकडे सांधाया!
आयुष्य उभे खर्च जरी मी केले,
आले न उरातील तडे सांधाया!

..................प्रा.सतीश देवपूरकर
गझल

करायची जातपात नाही!
अशी इथे रीतभात नाही!!

तुझ्या मनाचेच खेळ सारे.....
तसे कुणाच्या मनात नाही!

अनन्य आहे तुझी महत्ता!
असा कुणी ऎकिवात नाही!!

कधी कधी वाटते असे की,
जगात कोणी सुखात नाही!

नको ऋणाची करूस भाषा;
अशी प्रथा आपल्यात नाही!

जनावरेही बरी म्हणवी,
इमान ते माणसात नाही!

कसे मला ओळखेल कोणी?
कुठेच मी येतजात नाही!

वनात गेल्यावरी कळाले.....
‘प्रपंच’ रानावनात नाही!

नकोस कोणास स्वप्न दावू;
कुणीच आता भ्रमात नाही!

खरेच हा शुद्ध पायचाळा!
उनाड मी जन्मजात नाही!!

नकोच ती पायपोळ आता!
फिरायचे चांदण्यात नाही!!

नको कुणाची प्रमाणपत्रे!
अलीकडे मीच गात नाही!!

-------प्रा.सतीश देवपूरकर
भूशास्त्र व खानिज तेल तंत्रद्न्यान विभाग,
नौरोसजी वाडिया महाविद्यालय, पुणे.
फोन नंबर: ९८२२७८४९६१