ऊन सकाळी पडावे

**ऊन सकाळी पडावे**

ऊन सकाळी पडावे असे चोरून चोरून ।
जसा चंद्र चांदणीला पाही ढगापल्याडून ।।

दवबिंदू मिसळावे क्षणी पानांच्या मनात ।
जावा भिजूनिया वारा त्याच्या तनात तनात ।
यावा अंधार अंधार जणु सोन्याने मढून ।।

रानामधून घुमावी शीळ कोकीळ मैनेची ।
गालागालात हसावी खुळी कळी सृजनाची ।
यावा सुगंधही जसा उन्हामध्ये वितळून ।।

ऊन दुपारचे मग जावे ढगांत विरून ।
थेंब पावसाचे यावे माझ्या डोळ्यांत भरून ।
घरट्यात पाखरांच्या जावे माऊली होऊन ।।

सूर्य क्षितिजाच्या आड जरा उशिरा बुडावा ।
उन्हातून पसरावा लाल पिवळा गोडवा ।
सांज उन्हात ही अशी जावी पुरती भुलून ।।

जसा चंद्र चांदणीला पाही ढगापल्याडून ।।

ऊन सकाळी पडावे . . . . . . . . .
उन सकाळी पडावे . . . . . . . . . .. . . . . . !

- राजीव मासरूळकर
मु . पो . मासरूळ
ता . जि . बुलडाणा