चिंब भिजलेले, रूप सजलेले...

Submitted by इंद्रधनुष्य on 21 August, 2012 - 02:30

UNESCO कडून पश्विम घाटाला 'जागतीक वारसा'चा दर्जा मिळाल्या नंतर ट्रेकर्स मंडळी मधे आनंदी, उत्साही वातावरण पसरले होते. त्यातच ऑगस्ट मधे १८ ते २० अशी तीन दिवसांची सुवर्णसंधी जोडून आली खरी.... पण प्रत्येकाने आपली वैयक्तीक व्यवधाने सांभाळून केवळ रविवारचा सुमुहुर्त अहुपे घाटा करता निवडला.

यंदा पावसाची निराशाजनक कामगिरी पहाता पावसाळी ट्रेकची मनिषा अपुर्णच रहाणार की काय अशी भीती वाटू लागली. पण अहुपेला पोहचवल्यावर मात्र सगळी निराशा दूर झाली. सह्याद्रीच्या हिरव्या रांगानी शुभ्र फेसाळत्या ओढ्यांची पायघडी आमच्यासाठी अंथरली होती. धुक्याची चादर पांघरून घाट माथा आमच्या चढाईची फजिती बघत शांत पहुडला होता. त्यातच या अनघड वाटेवर गनिमाच्या तिरांनी संततधार सुरू करुन आमची कोंडी करण्याचा प्रयत्न केला. सोबतीला वानरांची हुपहुप, नाचण पक्षाची शीळ, खळाळत वाहणार्‍या धबधब्यांची गाज.. अहाहा... अजून काय हवं या निसर्गा कडून...

चिंब भिजलेले, रुप सजलेले... होय... हेच ते सजलेले रुप पहाण्याच्या अट्टाहासा पायी इथवर आलो होतो... आणि आपल्या लाडक्या सह्याद्रीने आम्हाला पुन्हा एकदा मोहवून टाकलं ते आपल्या अदाकारीनं, रांगडेपणानं, मायेनं...