वेमा विलेपार्ले मुंबई गटग वृत्तांत

विलेपार्ले येथील गटग वेबमास्टर अजय गल्लेवाले व १९ मुंबईकर मायबोलीकरांच्या उपस्थितीत संपन्न झाले. साडेसहापासूनच द शॅक रेस्तोरां मायबोलीकरांच्या आगमनानं गजबजू लागलं.माझं तर हे पहिलंच गटग,पण तसं अजिबात न वाटण्याचं मुख्य कारण वेबमास्तरांचे व्यक्तिमत्व. मायबोलीच्या यशाचं रहस्यच ते. दुसरं कारण कदाचित मैत्री दिवसाचा सुमुहूर्त असावा. यावर संकष्टीचा वचक होताच पण..

कालचा ग्रूप मूळ मायबोली परिवाराइतकाच प्रातिनिधिकपणे संमिश्र होता..तरूण तुर्क,मध्यमवयीन अर्क, ५०,-५० % स्त्रीपुरुष ,वेगवेगळे वयोगट,इंटरेस्टस शिवाय सेंट्रल विरुद्ध वेस्टर्न हा मुंबईकरांचा प्रिय सनातन वादाचा मुद्दा..अशा तर्‍हेतर्‍हेच्या तर्‍हेवाईक ३९००० (चु.भू.द्या.घ्या.) मराठी माणसांना एकत्र आणणं हे ,एखाद्या नव्या धर्मसंस्थापनेइतकंच कठीण, खायचं काम नाही ते,असा विचार करतानाच तितकाच ' रंगीबेरंगी' खाना हजर झाला (सौजन्य वेमा !!) व गप्पांबरोबरच खायचं कामही सुरू झालं.

अजयजींशी अनौपचारिक गप्पा मारणं खूपच सोपं होतं .सगळ्यांशी मिळत मिसळत त्यांनीच तर एक असं वातावरण निर्माण केलं की मैत्री दिवसाचा अर्थ आणि उद्देश सहज लक्षात आला..
पुढचे दोन अडीच तास गप्पा ,फिरक्या,आस्थेने केलेल्या परस्परांच्या चौकशा,खाणं-पिणं (फ्रूटज्यूस वगैरे :)) अर्थातच ) ,अमर्याद खिदळणं यात कसे गेले कळलंच नाही. मुंबईकरांना थोडा वेळ चक्क घड्याळाचा विसर पडला होता.

अजयजींना भावपूर्ण प्रवासशुभेच्छा देऊन परतताना लक्षात राहिलं ते..

वेबमास्तरांनी आरंभवून विस्तारलेलं मायबोली नावाचं घर..
नीधप ची वेस्टर्नचा टक्का वाढल्यामुळे वाढलेली एक्साईटमेंट
त्यासमोर सेंट्रलचे दमदार खेळाडू मंजूडी, (छोटीशी चार्मिंग ज्यूनिअर मंजूडी ),ललिता प्रीती
दोन्ही स्वयंनियोजित छायाचित्रकारांची (आशुतोष आणि सेनापती ???)प्रेमळ लगबग..
रोमातले रोमन्स मनी वसणारे
डूआयच्या चर्चा अन सामोरा आयडू ( त्याची व्यवितली पोज पाठमोरी आहे)
_नील_ अन आनंदमैत्रीचं इतरांना हसवत ठेवणं
शांतपणे बसून सर्वांचं निरीक्षण करणारी दोन कलाकार व्यक्तिमत्वे- पाटील अन नीलू
जुन्या जाणत्या उत्साहाने भरलेल्या अश्विनी के.,सुजा अन अनिताताई ,
दहा वर्षांपासून मायबोलीची सहप्रवासी पण तुलनेने लहान वयोगटातली मोनालिपी ,
जाई साहित्ययात्री माझ्या सहप्रवासचाही ट्रॅक ठेवणारी..मी धन्य झाले!
मामी,भुंगा न आल्याने माझ्या उत्सुकतेवर पडलेले पाणी .. उशीरा का होईना आलेले कीरू ..
या लहानशा गटगमध्ये भेटलेले जाणवलेले मराठी व्यावसायिकांचे उद्योजकांचे हूंकार,संघर्ष ..त्यांना शुभेच्छा.
.
मी फारच नवीन असल्याने काही संदर्भ, उल्लेख राहिले किंवा चुकले असतील तर क्षमस्व.राहिले असतीलच .अज्ञानातून अनुल्लेखही झाले असतील..अजूनही आयडी अन नावांचा गोंधळ होतोय म्हणून जरा जपून जपूनच लिहिलेय.

अत्यंत नवख्या मायबोलीकरणीचे हे मनोगत.पण परिवारभावना मुळीच नवी नव्हती.
शेवटी,या महानगरात वेस्टर्न की सेंट्रल - आम्ही १०५!

महाराष्ट्राचा एकूण टक्का मुंबईत प्रभावी असावा अन मुंबईकरांचा मायबोलीवर वाढत रहावा अशा शुभेच्छा.

जय हो!!!

भारती बिर्जे डिग्गीकर