आता दुकाळ येणार ..माये!!

Submitted by वैवकु on 26 July, 2012 - 03:20

माये येणार येणार आता दुकाळ येणार
तुझ्या लेकराना जिणं पुन्हा नकुसं होणार

कर्जबाजारू नशीब कर म्हणतं पेरणी
गाभ धरणार कशी भेगाळलेली धरणी
माझ्या कष्टाचं बियाणं मी गं कुठं पेरणार
माये येणार येणार आता दुकाळ येणार

तहानल्या दाही दिशा माजलीया आणीबाणी
ऐन श्रावणात आटलंया धरणाचं पाणी
आता माणसातली गं माणुसकी आटणार
माये येणार येणार आता दुकाळ येणार

माझ्या हाकंssला धाव ना आई विठाई पाव ना
बरसव बरसव तुझा पावसाचा पान्हा
भुकेजल्या लेकराना तू गं कधी पाजणार
माये येणार येणार आता दुकाळ येणार
.....
.........

आता दुकाळ येणार माये.... दुकाळ येणार !!
......तुझ्या लेकराना जिणं पुन्हा नकुसं होणार!!

......जिणं नकुसं होणार पुन्हा ....नकुसं होणार!!
माये येणार येणार आता दुकाळ येणार !!

गुलमोहर: 
कविता
शेअर करा

अप्रतिम....
आर्त आणि उत्कट.. प्रचंड आवडली!

'पाव ना - पान्हा' हा यमक किंचित कमजोर वाटला..

बट विथ इट, कविता सुपर्ब आहे ! नि:संशय!

Submitted by रसप on 26 July, 2012 - 04:04

खरेपणाच्या दाहाची कविता.अशीच असते/असावी कविता.

'ऐन श्रावणात आटलंया धरणाचं पाणी 'इथे एखादा शब्द कमी पडतोय असं सांगणंही निर्दयतेचं वाटतंय,पण सांगितलं पाहिजे.

Submitted by भारती.. on 26 July, 2012 - 09:24

सर्वांचे मना:पूर्वक आभार

रणजीत ,शामजी, भारतीताई आपल्या मार्गदर्शनासाठी धन्यवाद
सर्व सूचनांवर मी विचार करतो आहे शक्य ते बदल लवकरच करीन

पुनश्च धन्यवाद

आपला कृपाभिलाषी
-वैवकु

___________

ती खरी होऊ नये ,म्हणून प्रार्थना.>>>>> अनुमोदन Happy

Submitted by वैवकु on 27 July, 2012 - 04:04

रसप | 26 July, 2012 - 04:04 नवीन
अप्रतिम....
आर्त आणि उत्कट.. प्रचंड आवडली!
अगदी बरोबर..

Submitted by कमलाकर देसले on 27 July, 2012 - 05:58

स्मितू,बागे, शशान्क, देसले साहेब, वैशालीताई, किरण,शामली मनःपूर्वक धन्स

प्राजु विषेश आभार .............तुझी ती श्रावणावरची 'श्रावण्चिम्ब' कविता वाचूनच ही सुचलीय.
रीयल्ली ...खरंच !!
धन्स फॉर दॅट.........गं!!

Submitted by वैवकु on 28 July, 2012 - 05:28

"पसायदान" आहे हे...!
छान...पाऊस आता नक्की पडणार.

Submitted by गणेश कुलकर्णी on 29 July, 2012 - 08:49

आनंदराव धन्यवाद ......हे लेखन आवड्ल्याचे कळवल्याबद्दल (आणि वर आणल्याबद्दलही :))

स्वराली , सत्यजीत यांचेही आभार (क्षमस्व !!! मानायचे राहून गेले होते इतके दिवस )

Submitted by वैवकु on 25 May, 2013 - 11:22