मन पाऊस पाऊस...

Submitted by बागेश्री on 10 April, 2012 - 05:41

मन पाऊस पाऊस
चिंब अंगण- ओसरी,
कुंद गारव्याची हवा
गंध मातीचा पसरी..

मन पाऊस पाऊस
होते गालिचा हिरवा,
टेक क्षणभर तू ही
नको होऊस पारवा!

मन पाऊस पाऊस
पाणी डोळ्यांच्या द्रोणात,
अवखळ ओघळते
मंद हवेच्या झोकात!

मन पाऊस पाऊस
थेंब थेंबाने रुजतो,
ध्यास रुजे त्याच्यासवे
कोंब आशेला फुटतो..

मन झिम्माड पाऊस
आठवांची बरसात
माझ्या काजळात ओल्या
फुले उद्याची पहाट!!

मन पाऊस मेघांचा
सुटे मळभ जीवांचे
रंग आसमानी झाले
तुझ्या माझ्या नशीबाचे!

मन इतके बरसे,
दु:खं झाली मातीमोल
सल काढले खुडून
सरे पापण्यांची ओल...!

असे चित्र पावसाचे,
जणू इवला कोलाज
सार्‍या आठवणी खुळ्या
त्यांत मावल्या सहज..!

मन पाऊस पाऊस
म्हणे कसा बरसला?
अगं मनातच होता
तुला आज गवसला..!

गुलमोहर: 
शब्दखुणा: 

टेक क्षणभर तू ही
नको होऊस पारवा!>>

पाणी डोळ्यांच्या द्रोणात,
अवखळ ओघळते
>>

आठवांची बरसात
माझ्या काजळात ओल्या
फुले उद्याची पहाट!!>>

सुटे मळभ जीवांचे
रंग आसमानी झाले
तुझ्या माझ्या नशीबाचे>>

सार्‍या आठवणी खुळ्या
त्यांत मावल्या सहज..!>>

चांगल्या ओळी

'दु:खं' ऐवजी 'दु:खे'ही चालेल, अष्टाक्षरीच असल्यामुळे

शेवटही छान केला आहे.

ही कविता आवडली. 'पाऊस पाऊस' हे सारखे येणे फारसे भावले नाही. अष्टाक्षरीवर पकड आलेलीच आहे तर इतरही वृत्ते हाताळणे आनंददायी ठरेल. भर उन्हाळ्यात पावसावर / पावसाचा उल्लेख असलेली कविता पाहून बरे वाटले.

यात 'नेहमीचेपणा' वाटला नाही हे अधिक आवडले. (शिरोडकरांच्या कवितेवर काल प्रतिसाद दिला नव्हता, पण भुंगांनी म्हणण्याआधीच मला वाटले होते की ती अगदी तुमचीच कविता आहे, असे कसे झाले की मुद्दाम मजा करताय दोघे हे लक्षात न आल्याने तेथे काहीच लिहिले नाही).

शुभेच्छा

शब्दच नाहीत कौतुक करायला. Happy

"वादळवाट" मालिकेच्या "कधी उतरला चंद्र तुझ्या माझ्या अंगणात" या शीर्षक गीताच्या चालीत वाचली ही अष्टाक्षरी. Happy

छान जमलेय कविता

"असे चित्र पावसाचे,.......त्यांत मावल्या सहज..!
आणि
"मन पाऊस पाऊस
म्हणे कसा बरसला?
अगं मनातच होता
तुला आज गवसला..!" >>>> अधिक आवडलं.
"अगं मनातच होता तुला आज गवसला" ही सिग्नेचर लाइन.
---------------------------------------------------------------------------------------------------------------------
""वादळवाट" मालिकेच्या "कधी उतरला चंद्र तुझ्या माझ्या अंगणात" या शीर्षक गीताच्या चालीत वाचली ही अष्टाक्षरी" >>>> ते शीर्षकगीत अष्टाक्षरीच आहे.
सहज सुचलं म्हणून आणखी उदाहरणं देतो.
"निंबोणीच्या झाडामागे चंद्र झोपला ग बाई" आणि "फिटे अंधाराचे जाळे झाले मोकळे आकाश"
या देखील अष्टाक्षरीच. वृत्त एकच पण किती वेगवेगळ्या चाली !

मन पाऊस पाऊस
म्हणे कसा बरसला?
अगं मनातच होता
तुला आज गवसला..!>>>>>>>>
सगळी कविता आवडली पण ह्या ओळी विशेष आवडल्या.

भर उन्हाळ्यात पावसावर / पावसाचा उल्लेख असलेली कविता.. >> Lol

सर्व प्रथम 'पाउस' या विषयावर कविता लिहल्या बद्दल,
अनेकानेक 'धन्यवाद' !!!! Happy

शेवटी 'गवसला' हा शब्द खटकला.
बाकी अष्टाक्षरी उत्तम.

वा बागेश्री! सुरेख कविता..

मन पाऊस मेघांचा
सुटे मळभ जीवांचे
रंग आसमानी झाले
तुझ्या माझ्या नशीबाचे!>> हे खूपच आवडले.. Happy

'फक्त नको होऊस पारवा' हे समजले नाही

सगळ्याच अष्टाक्षरी खूप खूप जबरदस्त आहेत.
पण मला आवडलेल्या :

मन पाऊस पाऊस
थेंब थेंबाने रुजतो,
ध्यास रुजे त्याच्यासवे
कोंब आशेला फुटतो..

मन झिम्माड पाऊस
आठवांची बरसात
माझ्या काजळात ओल्या
फुले उद्याची पहाट!!

माझ्या निवडक १० मधे सामील! किती सुन्दर लिहावं ग!

तुझ्या कवितेसाठी माझी ही छोटीशी भेट -

पार वाहून चालले
भर वैशाखाचे ऊन
मन पाऊस पाऊस
तुझी कविता वाचून Happy

माझ्या निवडक १० मधे सामील! किती सुन्दर लिहावं ग!

तुझ्या कवितेसाठी माझी ही छोटीशी भेट -

पार वाहून चालले
भर वैशाखाचे ऊन
मन पाऊस पाऊस
तुझी कविता वाचून Happy

बाग्ज, तुझा आणि माझा आवडता पाऊस आज खुप दिवसांनी तुझ्या कवितेत आला. Happy पुर्वी पाऊसच पाऊस कवितेत लिहिणारी तु अचानक थांबली होतीस. मी मिस करत होते. Happy तु काय सिझनप्रमाणे कविता लिहितेस का? वाट बघत होतीस ना उन्हाळ्यात लोकांना पावसात भिजवुन टाकायची. वाचुनच मन मस्त थंडगार झालं. Happy सगळ्या अष्टाक्षरी एक से बढकर एक. प्रचंड आवडल्या.

Atach tuzi navin kavita "Man Paus Paus" vacahli.

Jam avadali...keep it up!

Kalave
Apla pankha

note : Kavite madhe evdha paus ahe ki bahutek hya varshi pausala lavkar yenar!

Pages