खरंतर हे लिखाण विनोदी कलाकुसर ह्या भागासाठी योग्य आहे. पण असा विभाग नसल्याने इथे टाकत आहे !
दसर्याच्या एक-दोन दिवस आधी पोगो, सीएन वर दशावतार, बालकांड असले अॅनिमेशन चित्रपट सारखे लागत होते.
सृजनने (लेकाने) विचारलंच, " अरे हे लोक तेच-तेच का दाखवतायेत परत ?"
त्याला विजयादशमीबद्दल सांगितलं. त्या दिवशी सगळीकडे साजरा होणारा रावणवध ऐकताना त्याचे डोळे चमकले.
" आई, आपण पण बनवूया एक रावण. मी राम होतो. मी रावणवध करणार."
दसर्याच्या आदल्या दिवशीची फर्माईश.
ऐनवेळी कशाचा रावण बनवावा, हा प्रश्न पडला.
शेवटी पाण्याच्या रिकाम्या बाटल्या वापरायच्या ठरलं.
( ह्या पाण्याच्या बाटल्या आम्ही इतक्या प्रकारांत वापरल्या आहेत की आता एकदिवस त्या बाटल्या हात जोडून कळवळून म्हणतील, " अब हमसे सहा नहीं जाता, हमें हमारी हालात पर छोड दो....")
मग पाच लीटरच्या बाटलीचं रावणाचं धड बनवलं. बाटलीच्या खालच्या भागात दोन वर्तुळं कापून त्याच्यात दीड लीटरच्या बाटल्या रावणाचे पाय म्हणून घुसवल्या.
लगेच नवरोबांची कमेंट आलीच, " हाहाहा....तुमचा रावण परेड करायला उभा असल्यासारखा दिसतोय...सावधान पोझिशनमध्ये ! "
" हॅहॅ, असू दे, असूदे." आम्ही असं म्हटलं खरं, पण मुद्दा बरोबर होता.
मग पाय पुन्हा सांध्यातून ओढून काढले.
पुन्हा जरा तिरक्या दिशेत दोन वर्तुळं कापली. पुन्हा अटीतटीने पायांची घुसवाघुसवी. आता रावणाने ' सावधान ' सोडून ' विश्राम ' चा पवित्रा घेतला....एकदम हिरो इष्टाईल
त्याच्या धडावर गुंडाळायला स्किन कलरची आणि धोतरासाठी हिरव्या रंगाची लोकर आणली होती.
वटपौर्णिमेला वडाच्या झाडालाही कधी जितक्या मनोभावे धागा गुंडाळला नसेल त्याहून जास्त तन्मयतेने गुंडाळूनही रावण हातभर उघडाच !
शेवटी कंटाळून रावणाला सृजनचा जुना बनियन घातला. धोतर म्हणून माझी जुनी लेगिंग कापून घातली.
बाबांनी हे बघितलं आणि अगदी गंभीरपणे म्हणाले, " आज रात्री तुझ्या स्वप्नात नक्की रावण येणार."
" का ?" मी कापलेल्या लेगिंगची उंची रावणाच्या उंचीला जुळवण्यात मग्न होते.
" नुसता येणार नाही तर आवाज चढवून म्हणणार - कसाही असलो तरी लंकेचा राजा होतो मी ! अशी फाटकीतुटकी वस्त्रे घालताय मला...ही हिंमत ?"
" कुठे फाटलंय ?"
मी रावणाला गरकन फिरवून बघितलं....आणि सगळेच खोखो हसत सुटलो.
इस्त्री करताना अगदी 'नेमक्या' जागी जळल्यामुळेच ती लेगिंग जुन्या कपड्यांच्या खोक्यात जाऊन पडली होती. आणि आज ती रावणाच्या नशिबी आली होती !
शेवटी बाबांना दया येऊन त्यांनी त्याच्या धोतराला सोनेरी लेसचे जरीकाठ लावले. तेवढंच त्याला समाधान !
लेकाचा वाढदिवस नुकताच झाला होता. भिंतीवर अजूनपर्यंत लटकणार्या निळ्या कागदी पट्ट्या काढल्या आणि रावणाच्या हातांना गुंडाळून टाकल्या.
खेळण्यातल्या ड्रमचं तोंड केलं. त्यावर पांढरं कापड ताणून बसवलं.
( तोंड पांढरं, हात निळे, पोट अबोली रंगाचं....हे असं कसं, असले बालिश प्रश्न विचारायला सक्त मनाई आहे ! )
स्केचपेनने तोंडावर रंगरंगोटी झाली. मग मिशा एवढ्याशा असतात का, भुवया जरा जाड कर, असले फु. सल्ले ऐकत ऐकत एकदाचा मेकप पूर्ण झाला.
दात रंगवायला लाल स्केचपेन घ्यायची बुद्धी का झाली, रावणालाच ठाऊक. पण त्यामुळे तो एकदमच चमत्कारिक दिसायला लागला.:हाहा:
एवढं करेपर्यंत खाण्यापिण्याकडे दुर्लक्ष झाल्याने पोटात कथकली चालू झाली होती. जेवणं चालू असताना टीव्हीवर ' एक मंतरलेली रात्र ' हा चित्रपट लागला होता.
रात्री-अपरात्री कॉल्स बघायला जावं लागतं, उगीच कशाला डोक्याला ताप, म्हणून मी असले चित्रपट खरंतर बघत नाही.
पण थोडं कानावर पडत होतं. उत्सुकते पोटी बघायला मान वळत होती.
त्यात एका प्रसंगात श्रीराम लागू त्या झपाटलेल्या बंगल्यात आलेले असताना, अचानक दिवे जातात.
त्यांनी दचकून विचारल्यावर बंगल्यातला नोकर (निळू फुले) निर्विकार आवाजात उत्तर देतो,
" इथे अस्संच होतं सायेब, दिवे येतात - जातात. जातात- येतात. "
......त्या थंड आवाजाला घाबरून मी बाबांना टीव्ही बंद करायला लावला.
खोटं वाटेल, पण मोजून १० - १५ मिनिटे झाली असतील नसतील तेवढ्यात अचानक आमच्या घरातले आणि परिसरातले दिवे ( कधी नव्हे ते ) गेले. आख्ख्या बेटावर काळाबुडुख अंधार !
तेवढ्यात नवरोबा अगदी थंड आवाजात म्हणाले, " असंच होतं सायेब. दिवे येतात-जातात. जातात-येतात."
आधीच अंधारात चाचपडणं चाललं होतं, त्यातून हे वाक्य.
( स्वगत : कुठून उद्योग केला आणि ह्याला मराठी शिकवलं ?)
दहा मिनिटात दिवे आले. तोवर आमचं थोडं घाबरून आणि भरपूर खिदळून झालं होतं.
कोपर्यात ठेवलेल्या रावणाकडे बाबांचं लक्ष गेलं आणि ते पुन्हा एकदा गंभीरपणे म्हणाले, " ह्याच्या तोंडावर टॉवेल टाकून ठेवू या रे. झोपेत जाग आली आणि ह्याचं तोंड दिसलं तर माझी वाट लागेल."
तात्या विंचू, झपाटलेला, पछाडलेला....नको त्या वेळी नको ते आठवायला लागलं !
शेवटी खरंच त्याचं तोंड टॉवेलने झाकून आम्ही ( एकदाचे ) झोपलो.
दुसर्या दिवशीच्या सकाळच्या धावपळीत लेकाची भुणभुण चाललीच होती, " निला कलर आणलायेस ना ? आज मला राम बनवायचंय."
" हो रे बाबा " म्हणून आम्ही आपापल्या रूटीनसाठी सटकलो. आता दिवसभराच्या धावपळीत राम-रावण काही आठवलं नसतं.
पण मला खात्री आहे, पिल्लूच्या डोक्यात मात्र प्रत्येक क्षण तोच विचार चालू असणार...निरागस वय, भोळ्या कल्पना....
चार-साडेचारला घरी आले तर लेक सगळी जय्यत तयारी करून बसला होता. धनुष्य, बाण, भाता....
पण नेमके तेव्हाच एसी सर्विसिंग करायला लोक आले. त्यांच्यासमोर आम्ही असले उद्योग केले असते तर दुसर्या दिवशी नक्कीच पोलिस चौकशीसाठी घरी आले असते !
" कधी जाणार हे लोक ?" " अजून का जात नाहीयेत ?" लेकाचं भजन पूर्णवेळ चालूच होतं.
शेवटी एकदाचे ते गेले.
वॉटर कलर्सचा आधीचा असफल अनुभव असल्याने ह्यावेळी खाण्याचा निळा रंग ( फूड कलर ) वापरायचा ठरलं.
अगदीच गरजेपुरती चड्डी लेकाच्या अंगावर ठेवून रंगरंगोटी चालू झाली.
तो अगदी काटेकोरपणे लक्ष ठेवून रंग लावून घेत होता. जरा कुठे लावायचा राहिला तर म्हणायचा, " इथे लाव. माझा ब्राऊन कलर दिसला तर रावण ओळखेल की मी खरा राम नाही."
डोळ्यांच्या आजूबाजूला रंगवताना तर माझी पुरती रस्सीखेच.
नवरा मागून भुणभुण करत होता, " नीट गं. डोळा सांभाळ....स्स्स...पुरे...इतक्या जवळ कशाला लावतेस....डोळ्यात जाईल."
आणि मी थांबले की लेक पळत-पळत जाऊन आरशात बघून येई आणि म्हणे, " आई....इथे राहिलंय बघ. निल्या तोंडावर असे ब्राऊन डोळे भुतासारखे दिसतात."
त्याला अगदी काखेतही निळा रंग लावायचा होता. कारण काय तर भात्यातून बाण काढताना रावणाला दिसेल.
बरं, तिथे रंग लावताना गुदगुल्या होतात म्हणून खिदळणं सुद्धा थांबवता येत नव्हतं !
तळहातांना लाल रंग लावला. का तर म्हणे रामाचे तळहात गुलाबी असतात !
रंगवून झाल्यावर आरशात बघत म्हणाला, " आई, मी रामासारखा नाही दिसत गं. जेक सुलीसारखा दिसतोय...."
असलं कठोर वाक्य ऐकून माझ्यातल्या कलाकाराला किती यातना झाल्या, हे कसं सांगू ?
( पुढचा फोटो आपापल्या जबाबदारीवर बघावा. नाजूक हृदयाच्या व्यक्तींना गंभीर त्रास होऊ शकतो...)
पण कटु असलं तरी सत्य होतं ते...
" पुढच्यावेळी आपण जरा फिक्का रंग लावू हं. आत्ता राहू दे." मी म्हटलं.
" म्हणजे...हे सगळं प्रकरण अजून एकदा करायचा प्लॅन आहे तुमचा....श्रीकांता कमलकांता अस्सं कस्सं झालं ..."
हे कोण बोललं असेल, हे सांगायची गरजच नाही !
श्रीकांताचं गाणं मला आणि सृजनला उद्देशून अनेकदा म्हटलं जातं घरात.
पण कलेच्या संवर्धनासाठी आम्ही असल्या टोमण्यांकडे संपूर्ण दुर्लक्ष करतो !
रंगवलेल्या रामाने खोटे केस लावले. गळ्यात मोत्यांच्या माळाबिळा, बाजूबंद....
आम्ही म्हटलो, " ए ढोप्या, राम वनवासात असताना त्याच्याकडे दागिने नव्हते काही. रुद्राक्षाच्या माळा घालायचा तो."
" ओक्के, मग मला पण रुद्राक्षांच्या माळाच द्या."
अरे देवा, आता आली का पंचाईत ? इथे कुठून आणायच्या रुद्राक्षांच्या माळा ?
" कृष्ण घालितो लोळण..." सारखी आमची अवस्था व्हायच्या आतच आम्ही सारवासारव केली, " हां, बहुतेक त्याच्याकडे होत्या बरं का. पेटीत ठेवल्या होत्या सांभाळून."
पितांबर , धनुष्य, बाणाचा भाता ( आणि त्यात एकच बाण...कारण बाकीचे सगळे घराच्या मोहोंजदडोमध्ये लपलेले ), आदल्या दिवशी रावणाला बक्षिस दिलेला आणि ' आता मला पाहिजे ' म्हणून काढून घेतलेला मुकुट.....
"मारू का गं रावण ?"
" अरे थांब थांब, रावणाच्या हातात एखादी तलवार तरी देतो बनवून." बाबा म्हणाले.
मग बाबांनी कार्डबोर्डची तलवार कापून तिला सोनेरी कागद लावून रावणाला इनाम दिली.
असे सजले लंकापती....
युद्धाच्या आधी राम-रावणाची सदिच्छा-भेट झाली.
आणि मग आतुरतेने वाट पाहिलेलं ते राम-रावण युद्ध झालं....
मोजून ५ मिनिटांत रावण कोसळला आणि मग त्याच्या छातीवर पाय ठेवून राम मोठ्ठ्याने म्हणाला,
" भूवरी रावणवध झाला ! "
५ मिनिटाच्या युद्धासाठी आदल्या दिवसापासून केलेला विनोदी खटाटोप आठवून आम्हाला हसू येत होतं.
' राम ' मात्र जाम खुष होता.
खांद्यावरचा बाणांचा भाता काढता-काढता तो म्हणाला,
" आई, तू म्हणालीस की दसर्याच्या दिवशी देवीने महिषासुर राक्षसाला पण मारलं होतं. मग आपल्याला एक महिषासुर पण बनवायला लागेल ना...."
......हे ऐकून मी व्याकुळ चेहर्याने " नहीं..." म्हणत कपाळाला हात लावला......आणि....माझी अवस्था बघून बाबा आणि नवरोबा खोखो हसायला लागले.
' राम ' मात्र मिस्किलपणे गालात हसत उभा होता !!
धन्य आहे तुमच्या उत्साहाची!
धन्य आहे तुमच्या उत्साहाची!
मस्त दिसतायत रावण आणि जेक सुली.
मजाच की. आता त्याला
मजाच की.
आता त्याला दिवाळीसाठी वामनाची गोष्ट सांग. त्याची रिअॅक्शन मात्र लिही.
मस्तच गं रुणू, गोड आहे पिल्लू
मस्तच गं रुणू,
गोड आहे पिल्लू तुझं.
तुझ्या उत्साहाची पण कमाल आहे.
मस्त! ए कशला गोडुला दिशतोय
मस्त!
ए कशला गोडुला दिशतोय राम! आणि रावण पण मस्त झालाय...
अगदी!
कसलं गोड! लिहिलयस पण मस्त!
कसलं गोड!
लिहिलयस पण मस्त!
भन्नाट किस्सा!!! आईला सा.न.!
भन्नाट किस्सा!!!
आईला सा.न.!
मस्तच ! भारी आहे राम आणि रावण
मस्तच !
भारी आहे राम आणि रावण दोन्ही
एकदम गोड. आईच्या उत्साहाला
एकदम गोड.
आईच्या उत्साहाला प्रणाम.
जबरी ....... कल्पना मस्त आणि
जबरी ....... कल्पना मस्त आणि लिहिलय पण झक्कास!
आई, मी रामासारखा नाही दिसत
आई, मी रामासारखा नाही दिसत गं. जेक सुलीसारखा दिसतोय..>>>
रुणुझुणु.. कित्ती
रुणुझुणु.. कित्ती गोड!!!!!!!!! मज्जा आली वाचताना आणी फोटो तर सुप्पर्ब आहेत..
मंजिरी
मी पण महिषासुरा ची वाट पाहतेय
आर्च, तो मग मला वामन बनव असं
आर्च, तो मग मला वामन बनव असं रुणूच्या मागे लागेल. मग बटुसारखं टक्कल शेंडी ठेवावी लागेल त्याला छान शोभेल गोटा आणि शेंडी
अश्विनी, ते ठिके गं. पण
अश्विनी, ते ठिके गं. पण पायाखाली द्यायला आकाश पाताळ कुठून देणार्? आणि बलीराजा कोण बनेल?
बलीराजा पेट बॉटल्सच बनतील.
बलीराजा पेट बॉटल्सच बनतील. आकाश पाताळ.. ह्म्म्म्म्म. जिन्याच्या ३ पायर्या वापरायच्या
गोडच आहे रामायण.
गोडच आहे रामायण.
खरच तुझा उत्साह
खरच तुझा उत्साह वाखाणण्यासारखा आहे .. निव्वळ अप्रतिम..
खूप धन्यवाद लोक्स. << उसने
खूप धन्यवाद लोक्स.:)
<< उसने हनुमान की पुंछ जलायी थी ना इसलिये हनुमानने उसका घर जला दिया था और हमने पटाखोंसे रावण को जला दिया.>> अल्पना
<<हे सगळं तिकडे (वर) रावणाने पाह्यलं / वाचलं तर तो ही म्हणेल...रामा, रामा, रामा, रामा......>> शशांक,:हाहा:
<<बर झालं नुसता फोटो पण टाकलास ते .. नाही तर रामाला मी ओळखलच नसतं >> जाजु, तूच काय माझ्यासुद्धा कित्तीतरी वेळा मनात आलं , " हा नक्की सृजनच आहे ना?? "
नुसता फोटो टाकण्याचं आणखी एक कारण म्हणजे, मॉडेल कितीही छान असलं तरी माझ्यासारखा
' दगडू कलाकार ' त्याचा काय अवतार करू शकतो ह्याचं उत्तम उदाहरण !
<<तू आता 'कौसल्या' असा आयडी घे>> मंजुदी, पॉइंट नोटेड. डुआयडीच घेते नाहीतर हा
<< पिल्लूने जामच एंजॉय केलेलं दिसतंय>> अगो, अजून आठवत बसतो आणि खिदळतो तो.
<< तोच रावण इकडे पाठवता आला तर पहा >> आशिष, रावण कधीच गेला ' पातेल्यात ' ( 'पाताळ' चं लेकाचं व्हर्जन :फिदी:) इथल्या मालदिवियन लोकांनी बघितलं तर उगीच नसते गैरसमज, म्हणून मोडून टाकला आम्ही.
<< ही तयारी, युध्द आणि मग रंगहरण तुम्ही Video वर टाकलं असतं तर >> खरंच करायला हवं होतं. पण सहज काहीतरी म्हणून सुरू केलं होतं. असं काही डोक्यातच नाही आलं.
<< आता त्याला दिवाळीसाठी वामनाची गोष्ट सांग.>> आर्च, केश्विनी, नंदिनी.....वामन के साथ नरकासुरभी खडा रहेला है लाइन में शक्य झालं तर नक्की बनवू .( म्हणजे पुन्हा तुम्हाला विनोदी कलाकुसरीचा नमुना बघायला मिळेल.:फिदी:)
सगळी स्टोरी प्रचंड आवड्ण्यात
सगळी स्टोरी प्रचंड आवड्ण्यात आले आहे.
>>" इथे लाव. माझा ब्राऊन कलर
>>" इथे लाव. माझा ब्राऊन कलर दिसला तर रावण ओळखेल की मी खरा राम नाही."
झक्कास !!!
सुंदर! आणि हॅट्स ऑफ टू यु
सुंदर!
आणि हॅट्स ऑफ टू यु थ्री. (बाबा, नवरोबा आणि तू)
तुझ्या मनात अगदी माझ्या घरी,
तुझ्या मनात अगदी माझ्या घरी, राम जन्मला गं सखे... असं वाटलं असेल ना? लय भारीय! पण मला सांग ते केस कुठून आणलेत? तू पण विग लावतेस की काय अधूनमधून?
तुमच्या उत्साहाबद्दल ---/\---
तुमच्या उत्साहाबद्दल ---/\---
<< पण मला सांग ते केस कुठून
<< पण मला सांग ते केस कुठून आणलेत? तू पण विग लावतेस की काय अधूनमधून? >>
नाही गं बाई, ते तुळशीबागेतून आणलेत. २ वर्षांपासून सांभाळून वापरतोय.( माझ्यासाठी नाही....त्याच्यासाठी :फिदी:) कृष्ण, राम , राक्षस अशा बर्याच वेषभूषांसाठि उपयोग होतो त्या केसांचा.
लेकाची सगळी ड्रेपरी खूप उद्योग करून जमा केली आहे. त्याचा मुकुट म्हणजे गौरींना लावतात तो कंबरपट्टा आहे. त्याला कपाळाला टोचू नये म्हणून आतल्या बाजूने त्याला मऊ कापडाची पट्टी लावली आहे. आणि दोन्ही बाजूला वेल्क्रो जोडला आहे.
आणि बाजूबंद म्हणजे गौरींचे छोटे मुकुट आहेत. मोत्यांच्या माळा आज्जीच्या ढापल्या आहेत.
अरे सह्हीए हे रूणुझुणू
अरे सह्हीए हे
रूणुझुणू __/\__
छोटा राम क्युट आहे
कसला गोड दिसतोय राम भारी
कसला गोड दिसतोय राम
भारी उपद्व्याप केलेस, पण हॅट्स ऑफ यार !!
काय बोलणार?? किती तो उत्साह..
काय बोलणार?? किती तो उत्साह.. मानलं.._/\_
राम आणि रावण दोघेही क्युट!
___/\___ धन्य आहे हे सर्व. मी
___/\___ धन्य आहे हे सर्व. मी चुकुनही हे घरी दाखवणार नाही. अन्यथा आधि निळी रंगाची डबी घेउनच जावे लागेल.
गोडच दिसतोय राम ! रावणही छान
गोडच दिसतोय राम ! रावणही छान .
हे धमाल!!! मस्तच गं
हे धमाल!!!
मस्तच गं रुणुझुणू, भारी उत्साह आहे तुला
राम आणि रावण अगदी जबरीच दिसतायत
मजा आली लेख वाचताना
हो हो, खुपच मजा आली लेख
हो हो, खुपच मजा आली लेख वाचताना मस्त !!
Pages