प्रणयगीत

Submitted by उमेश कोठीकर on 30 December, 2010 - 05:21

भिजून यावा गंधित वारा, लाजत यावी रात्र जराशी
तुझ्या मनातील गूज कळावे, मला धरावे असे उराशी

तुझ्यातले माझ्यात मिळावे, फक्त श्वास श्वासांचे यावे
ओठांच्या या मिठीत न कळे, काय बोलले कोण कुणाशी?

डोळ्यांमधले शब्द कळावे, लज्जेचे हे बंध गळावे
स्पर्शाआधी उमलून यावी, गर्द गुलाबी लाज जराशी

अंतर व्याकुळ मिटून जावे,एक होऊनि चिंब भिजावे
असे काहीसे मिसळून जावे,मी तुझ्यात अन तू माझ्याशी

मिटून डोळे, सुखात न्हावे, तनामनातून तूच भिनावे
नकोस आता थांबू सखया, फुटून गेला बांध मघाशी

तृप्त पहाटे तुला बघावे, 'नकोस जाऊ' म्हणत रूसावे
आठवणींचे चुंबन गहिरे, जातांना तू ठेव उशाशी

गुलमोहर: 
कविता
शेअर करा

क्या बात है उमेश !!!! सगळी कविताच एकदम अप्रतीम !!! जियो !!!

डोळ्यांमधले शब्द कळावे, लज्जेचे हे बंध गळावे
स्पर्शाआधी उमलून यावी, गर्द गुलाबी लाज जराशी

-------- क्ल्लास !!!

Submitted by Girish Kulkarni on 30 December, 2010 - 05:29

क्या बात है... फार छान रचना.... सगळ्याच द्विपदी दिलखेचक...

अंतर व्याकुळ मिटून जावे,एक होऊनि चिंब भिजावे
असे काहीसे मिसळून जावे,मी तुझ्यात अन तू माझ्याशी

ही द्विपदी फार आवडली... नीट तपासले नाही ..पण ही मात्रावृत्तातील किंवा हिरण्यकेशीतील गझल आहे.

Submitted by डॉ.कैलास गायकवाड on 30 December, 2010 - 05:34

मस्तच

Submitted by मुक्तेश्वर कुळकर्णी on 30 December, 2010 - 05:39

छान ... मस्त ... रोमॅंटिक कविता

“डोळ्यांमधले शब्द कळावे, लज्जेचे हे बंध गळावे
स्पर्शाआधी उमलून यावी, गर्द गुलाबी लाज जराशी”

हे सर्वात जास्त आवडलं.

Submitted by UlhasBhide on 30 December, 2010 - 12:00

ए उमेस भाय, एकदम मस्त है काव्य तुम्हारा!
एकदम मस्त.
(रोमँन्टीक प्रकृतीच्या लोकांना एकदम आवडेल असे काव्य! )

Submitted by पाषाणभेद on 30 December, 2010 - 23:47

ही द्विपदी फार आवडली... नीट तपासले नाही ..पण ही मात्रावृत्तातील किंवा हिरण्यकेशीतील गझल आहे.

>>> त्यातले आपल्याला कायबी कळत नाय... Lol
बाकी कविता.... एक नंबर... जियो... Happy

Submitted by सेनापती... on 30 December, 2010 - 23:56

सगळ्या मित्रमंडळींचे खुप धन्यवाद. डॉक्टरसाहेब, गझलेचे तंत्र शिकायची खुप इच्छा आहे; पण जमत नाही. बेफिकीरजींच्या लेखामुळे जमेल असे वाटतेय.

Submitted by उमेश कोठीकर on 31 December, 2010 - 00:25

प्रणयाची धुंदी उतरली नाही अजुन मागे बातम्यात वाचल होत खुप तुमच्याबद्दल अश्या कविता सुचतात कशा बाइ

Submitted by माला on 31 December, 2010 - 07:03

काय "मादक" कविता केलीस मित्रा - मादक या शब्दावरून वादंग सुरु न होवो.
खरंच अप्रतिम प्रणयगीत. खूपच सुंदर -जमलेली.

Submitted by पुरंदरे शशांक on 1 January, 2011 - 06:10

अगदी सहज सुंदर अशी कविता, आवडली रे उम्या Happy
नव्या वर्षात तुझ्याकडून अशाच सुंदर कविता वाचायला मिळोत या शुभेच्छा Happy

Submitted by विशाल कुलकर्णी on 2 January, 2011 - 23:46

Pages