गेले दोन दिवस मला सूफी गाण्यांनी घेरलंय! असाच कधी अवचित येतो मूड आणि सुरू होते एक अद्भुत स्वरमयी भक्तीयात्रा!
ही गाणी अवीट गोडीची, गूढ अर्थांची, आत्मा - परमात्म्याशी संवाद साधणारी तर आहेतच; शिवाय कधी मनुष्याच्या मूर्खतेला शाब्दिक चपराक देणारी तर कधी लडिवाळपणे प्रियतमाचे आर्जव करणारी आहेत.
सशक्त, समर्पक शब्दरचना आणि अपार भक्तिभावाने कृतकृत्य करणारे मधुर, हृदयाला हात घालणारे संगीत....
... त्या जोडीला तेवढाच कसदार गायकी गळा त्या संगीतरचनेला लाभला तर मग सोने पे सुहागा!!
सध्या माझ्या मनात अहोरात्र पिंगा घालणारे गाणे म्हणजे वडाळी बंधूंनी गायलेली बाबा बुल्लेशाह यांची अपरिमित माधुर्य व उत्कट प्रेमभावाने ओतप्रोत रचना ''तू माने या ना माने दिलदारा असां ते तैनू रब मनिया''.....
बाबा बुल्लेशाह (मीर बुल्ले शाह कादिरी शतारी) या इ.स. १६८० च्या दरम्यान पाकिस्तानातील पंजाब प्रांतात जन्मलेल्या सूफी पंजाबी संत कवींच्या अनेक रचना पंजाबी लोकपरम्परेचा व साहित्याचा एक अविभाज्य भाग आहेत. बाबा बुल्ले शाह हे प्रख्यात पंजाबी सूफी कवी. हिंसेचे उत्तर हिंसा होऊच शकत नाही ह्या त्यांच्या विचाराशी ते इतरांचा रोष पत्करूनही कायम ठाम राहिले. त्यांच्या काव्यरचना ईस्लामच्या कट्टरतेला आव्हान देणार्या व त्यावर टीका करणार्या आहेत. बुल्ले शाह यांनी आपल्या काव्यांतून कायम मानवतेचा, प्रेमाचा, सौहार्दाचा पुरस्कार केला. सामाजिक प्रश्नांवर टीकाटिप्पणी केली. आणि गूढ आध्यात्मिक प्रवासाला त्यांनी शब्दस्वरूप आकार देऊन एक वेगळेच मूर्त स्वरूप दिले.
त्यातीलच ही एक रचना....
साधे, थेट हृदयाला भिडणारे पारदर्शी शब्द आणि त्यातून परमात्म्याला घातलेले साकडे, केलेले आर्जव नकळत मन हेलावून टाकते.
प्रेमाच्या सर्वात उत्कट भावाला ही रचना शब्दबद्ध करते.
यू ट्यूबवर हे गाणे अवश्य ऐका : पैगाम - ए -इश्क ह्या ध्वनिमुद्रिकेतील हे गाणे आहे.
http://www.youtube.com/watch?v=EmDkLJ6ZmCs
वडाळी बंधूंची सूफी गायकी जगद्विख्यात आहे. पद्मश्री पुरस्कार सन्मानित पूरणचंद व प्यारेलाल वडाळी पंजाबमधील अमृतसरच्या गुरु की वडाली भागात राहाणारे त्यांच्या घराण्यातील गायकांच्या पाचव्या पिढीचे प्रतिनिधी. पूर्वापार सूफी संतांच्या रचनांची गायकी घराण्यात चालत आलेली. निसर्गदत्त पहाडी, कमावलेला आवाज आणि त्यावर भक्तीचे लेणे! सूफी परंपरेवर त्यांचा गाढ विश्वास आणि आपल्या गायकीतून ईश्वराला आर्जवाने पुकारण्याची, आवाहन करण्याची अफाट ताकद!
पंडीत दुर्गादास आणि उस्ताद बडे गुलाम अली खां यांच्याकडे संगीताचे धडे घेतलेले, अतिशय साध्या जीवनशैलीने जगणारे हे दमदार, खड्या आवाजाचे गायक आपल्या लवचिक अदाकारीतून सूफी रचनांच्या शब्दांमध्ये विलक्षण रसपूर्णता आणतात. त्यांच्या गळ्यातून उमटणार्या प्रत्येक शब्दासरशी रोम रोम पुलकित होतात. त्यांची बरसणारी, भक्तीवर्षावात चिंब करणारी गायकी आणि बुल्लेशाह यांचे मार्मिक शब्द...... भक्तीच्या डोहात डुंबायला अजून काय पाहिजे?
गाण्याचे शब्द व त्यांचा स्वैर अनुवाद :
तू माने या ना माने दिलदारा असां ते तैनु रब मनिया
प्रियतमा, तुला आवडो अगर न आवडो, मी तुला माझा ईश्वर म्हणून आपलंसं केलंय....
दस होर केडा रब दा दवारा असां ते तैनु रब मनिया
आता तूच मला सांग की मी अजून कोणता दरवाजा ठोठावू... तूच आता माझा ईश्वर आहेस!
कोई काशी कोई मक्के जांदा कोई कुंभ विच दा धक्के खांदा
कोणी आपल्या पापांचे परिमार्जन करायला काशीला जातात, तर कोणी मक्केला जातात. तर कोणी कुंभमेळ्यात जाऊन आपली पापे नष्ट करण्याचा प्रयत्न करतात.
पाया जग मै तुझ विच सारा असां ते तैनु रब मनिया
पण मला तर तुझ्या चरणांशीच सारे विश्व गवसले आहे, तूच आता माझा ईश्वर आहेस!
अपने तनकी खाक उडायी तब ये ईश्क की मंजिल पायी
ह्या शरीरातील विकार जेव्हा भस्मसात झाले तेव्हा तुझ्या दिव्य प्रेमाचा साक्षात्कार झाला...
मेरी सांसोका बोले इकतारा असां ते तैनु रब मनिया
माझ्या श्वासांची एकतारी तेच गीत तर प्रत्येक श्वासागणिक गात आहे....
तुझ बिन जीना भी क्या जीना तेरी चौखट मेरा मदीना
तुझ्याशिवाय ह्या माझ्या जीवनाला काय अर्थ आहे? तुझ्या दारात मला माझे तीर्थ गवसले आहे
कहीं और ना सझदा गंवारा असां ते तैनु रब मनिया
आता हे मस्तक अन्यत्र कोठे झुकवणे मला सहन होत नाही कारण तूच तर माझा ईश्वर आहेस!
हंसते हंसते हर गम सहना राजी तेरी रजा में रहना
आता हसत हसत मी अडचणी व संकटांचा सामना करेन. तुझी सावली हेच माझं घर.
तूने मुझको सिखाया है यारा असां ते तैनु रब मनिया
तूच तर शिकवलंस हे सारं मला......
ईश्वराला इतक्या मधुर शब्दांत आळवणारी, त्यावर प्रेमाचा हक्क सांगणारी ही अभूतपूर्व रचना.....आणि त्यावर कळस चढवणारा वडाळी बंधूंचा दिलखेचक स्वर!
अप्रतिम शब्दांना आत्म्याला साद घालणाऱ्या समृद्ध गायकीचं कोंदण लाभल्यावर कधी ऐकणारा रसिक भक्त बनतो, डोळ्यांतून नकळत अश्रू ओघळतात, कंठ रुद्ध होतो आणि मन त्या भक्तीलहरींत डुंबू लागते हेच कळत नाही. चक्षूंसमोर उभा राहतो एक फकीर. अल्लाला, परमात्म्याला जीवाच्या आर्ततेने साद घालणारा, त्याच्या प्रेमात वेडावलेला, दिवाणा झालेला, जळी-स्थळी-काष्ठी-पाषाणी त्याच परमात्म्याला पाहणारा.... गाणे संपते तेव्हा आपणही दीवाने झालेलो असतो. त्या खुळेपणाला, त्या वेडाला माझा सलाम!
(माझ्या अतिशय अल्प हिंदी/पंजाबी ज्ञानाच्या आधारावर हा अनुवाद व गाण्याचे शब्द मांडण्याचा प्रयत्न केला आहे. तरी चु. भू. दे. घे. फेरफार/ सुधारणा असल्यास अवश्य कळवणे.)
-- अरुंधती
छान लिहिलय. सुफी
छान लिहिलय. सुफी संप्रदायाबद्द एक गूढ आकर्षण नेहमीच वाटतं. मला ते जोधा अकबर मधलं गाणं ही आवडतं, अन त्यावर नाचणारे ते सगळे; अगदी शेवटी ऋतिक रोशनही मस्त नाचलाय. मध्यंतरी मला वाटतं मीना प्रभूंच्या ( ) एका पुस्तकात एका रोम/ इटालियन किंवा कोठल्या तरी पंथाचा नाच करतानाचा फोटो अन माहिती वाचली होती, ती ही अशीच भूरळ घालणारी होती. खरच सुफी साहित्य एकदा वाचले पाहिजे. धन्यवाद या सर्वाची आठवण करून दिल्याबद्दल
सुरेख लिहीलय अरुंधती. मला
सुरेख लिहीलय अरुंधती. मला हंसराज हंसच्या गाण्यांमुळे आधी सुफ़ी संगीताची गोडी लागली. मला वाटते त्याने देखील सुरूवातीला बाबा बुल्लेशाह यांची बरीच गाणी म्हटली आहेत. नंतर कैलाश खेरने वेड लावलं...
असो, छान अगदी रसग्रहणासहीत सुरेख लेख ! धन्स
सुरेख लेख ,ऐकेन मी !! युटुब
सुरेख लेख ,ऐकेन मी !!
युटुब सोडुन हे कुठुन ऐकता येईल ?
आबिदा परवीन ऐका, वेड लावते
आबिदा परवीन ऐका, वेड लावते अक्षरशः ...
आरती, विशाल, आयपियेल,
आरती, विशाल, आयपियेल, शुभंकरोती, सर्वांचे प्रतिसादाबद्दल धन्यवाद!
आरती, ते ख्वाजा मेरे ख्वाजा हे गाणं माझं पण अतिशय आवडतं आहे. किती वेळा ऐकलंय, पाहिलंय ह्याची गणतीच नाही! त्यातल्या त्या नृत्यप्रकाराचे नाव सूफी डर्विश (दर्विश??) असे आहे. बरोबर आहे, तो ईजिप्तमधील नृत्यप्रकार आहे. यू ट्यूबवर त्याच्याही भरपूर क्लिप्स आहेत.
आयपियेल, ही सूफी गाणी तुम्हाला esnips.com वरही ऐकता येतील. किंवा myspace वर शोधा. गूगलवर जरी शोधलेत तरी बर्याच वेबसाईटस मिळतील.
शुभंकरोती, आबिदाचा बुलंद आवाज आणि तिचं ते तल्लीन होऊन गाणं येडं करतं येडं.....:-)
विशाल, कैलाश खेरच्या आवाजाला तोड नाही. पण वडाळी बंधूंचा जो कमावलेला, 'पंजाबदा पुत्तरदा आवाज' आहे ना, तोही असाच हृदयात कोरला जातो!!
अरुंधति, अ प्र ति म
अरुंधति,
अ प्र ति म लिहिलयस!!
मलाही सुफी गाण्यांची प्रचंड आवड आहे.
वडाळी बंधूच् हे गाणं अतिशय सुरेख आहे.. मागे सारेगमप ला त्यांनी लाइव्ह परफॉर्म केलं होतं हे गाणं, फार सही !
त्यांच्याच घराण्यातला तरुण गायक लखविन्दर वडाली पण सुरेख गातो.
एका पुस्तकात एका रोम/ इटालियन किंवा कोठल्या तरी पंथाचा नाच करतानाचा फोटो अन माहिती वाचली होती, ती ही अशीच भूरळ घालणारी होती.
<< आरति,
मीना प्रभुंनी तुर्कनामा मधे केलाय हा उल्लेख.
मला २००७ मधे इस्तान्बुल, कप्पाडोकिया मधे हे सुफी दर्वेशांचा परफॉर्मन्स पहायला मिळाले.. मॅजिकल, दैवी, गूढ, डोक्यत झिंगणारं.. काही तेरी वेगळाच.. शब्दांच्या पलिकडच्.. नक्की कसं वाटतं त्यांचा डान्स पहाताना हे अनुभव घेतल्या शिवाय नाही समजणार , कप्पा डोकियाला त्यांचा परफॉर्मान्स एका गुहेत होता, त्या नंतर त्यांचे पारंपारीक डान्सेस, फार च सही वाटलं ते पहाताना!!
दीपांजली, कसला ग्रेट असेल तो
दीपांजली, कसला ग्रेट असेल तो अनुभव... मी फक्त कल्पनाच करू शकते! यूट्यूबवरच्या त्या नृत्याच्या काही चित्रफिती पाहतानाही गुंगून जायला, झिंगायला होते! आणि गुहेतला परफॉर्मन्स म्हणजे अजून गडद गूढता..... कल्पनेनेच अंगावर काटा आला!
छान लिहीलयस. ते सुफी वगैरे
छान लिहीलयस. ते सुफी वगैरे मला काही कळत नाही तरी आख्खा लेख वाचला आणि आवडला
अरुंधती, ते ...सयोनी ! चैन
अरुंधती,
ते ...सयोनी ! चैन एक पल नहीं, ते देखिल सुफी आहे ना ?
हे गाणं मला खुप आवडायचं ,आवडतं !!
मस्त लेख.. आता मी ही युट्युब
मस्त लेख.. आता मी ही युट्युब शोधते आणि वडाळी बंधुंना ऐकते