पसारा..

कळशीत घेऊनिया थंडगार पाणी..
रानोरान अनवाणी ! फिरू नको राणी !
जवळच आहे तुझे तहानले घर..
पडुदे मनात ओल्या पावसाची सर !!

कस्तुरीमृगाच्यापरी वेडा तुझा धावा !
अंतरीचा बाहेर तू शोधतेस रावा !!
पदर खोचून, उरी वेड पांघरून..
ऐकू बघतेस निळ्या बासरीची धून !?

गवसेल काय? भय !! धुक्याचा प्रलय !
जुनी अमावस ! नाही चंद्राचा उदय..
चुकला - मुकला वारा.. पाचोळपसारा..
रंगाविण उदासीन मोराचा पिसारा !!

नाद पैंजणाला तुझ्या असेल वेगळा..
कोवळे सावळे गीत येई तुझ्या गळा..
पण साजणाला नाही रस त्यात काही !
प्रीतीची बिचारा तुला मागताहे ग्वाही !!

निळे घन कधीपून कोसळून गेले..
मनाचे पाषाण खाली ढासळून गेले..
झाकतेस मनात उठल्या मारव्याला !
उन्हे जाळणारी.. तुझा दोष गारव्याला !?

खुळ्यापरी धावू नको, जाऊ नको दूर !
सावर सावर तोल मनाला आवर !!
धावपळ थांबताच साजण पावेल !
समाधीचा दीप तुझ्या अंतरी तेवेल !!

.................................