चिडता का हो?

Submitted by निशिकांत on 2 January, 2020 - 23:14

वेडे मी जगतास म्हणालो चिडता का हो?
कुचकामी इतिहास म्हणालो चिडता का हो?

श्रीमंतीच्या ओंगळवाण्या प्रदर्शनाला
गरिबीचा उपहास म्हणालो चिडता का हो?

खटपट केली मंत्री झाले ते दरबारी
गांधीघरचे दास म्हणालो चिडता का हो?

उंची कपडे ओळख झाली या नेत्यांची
खादीचा हा र्‍हास म्हणालो चिडता का हो?

लंबे चौडे भाषण त्यांचे ऐकू कैसे?
मिनिटाला मी तास म्हणालो चिडता का हो?

काळे धंदे,काळी करनी रुतबा त्याना
काळा मी सुर्यास म्हणालो चिडता का हो?

लफडी उघडी करण्या लिहिती त्या शूराना
वंदन करुनी व्यास म्हणालो चिडता का हो?

निर्मोही बाबांच्या पदरी पैसा अडका
ढोंग्यांना बकवास म्हणालो चिडता का हो?

गोंगाटाने नवगीताच्या डोके उठले
सप्तसुरांना श्वास म्हणालो चिडता का हो?

भडकाउ प्रक्षेपण बघता टी व्ही वरती
"सह्याद्री"ला पास म्हणालो चिडता का हो?

हसणे "निशिकांतास" मिळले जगता जगता
ग्रिष्माला मधुमास म्हणालो चिडता क हो?

निशिकांत देशपांडे. मो.क्र. ९८९०७ ९९०२३

विषय: 
काव्यलेखन
Groups audience: 
गुलमोहर - गझल
Group content visibility: 
Public - accessible to all site users
शेअर करा