कलंक चित्रपट

थोडक्यात स्टोरी म्हणजे एक लाहोरच्या जवळ हुस्नाबाद नावाचं गाव, जिथे पर्वत, हिमाच्छादित कडे, दर्‍या, नद्या, घाट, कालवे, ब्रिटिशकालीन हवेल्या, राजस्थानी गल्ल्या एकत्र सुखाने नांदतात. तर तिथे संजय दत्त बडी असामी, न्युजपेपरचा मालक. त्याचा मुलगा आदित्य आणि सून सोनाक्षी. हे तिघेच महालासारख्या हवेलीत राहातात. साधारण दोन डझन लोक बसतील अशा जेवणाच्या टेबलावर संजय दत्त एका टोकाला, आदित्य दुसर्‍या टोकाला तर सोनाक्षी मधोमध असे बसून जेवतात. तर ती मरणपंथाला लागलेली. मरण्यापूर्वी नवर्‍याला सुख लाभावं म्हणून ती आलियाला त्याची भावी पत्नी म्हणून घरी राहायला यायचं आमंत्रण देते. त्यानिमित्ताने त्यांची ओळख होईल एवढं लांब जेवायचं टेबल आहे तर एक अजून आरामात बसू शकेल आणि आपण गेल्यावर ते लग्न करतील असा तिचा बेत. पण आलिया practical असल्याने मी त्या घरची सून म्हणूनच येईअ, नाहीतर तू गेल्यावर तो मला घराबाहेरही काढेल मग मला कोणाचाच आधार राहाणार नाही असे निक्षून सांगते. मग त्यांचे लग्न होते पण आदित्य तिला मी तुझा आदर करीन पण तुला प्रेम नाही देऊ शकणार वगैरे सांगतो. मग आलियासमोर आता आपण करायचे काय असा प्रश्न पडतो. ती त्या हवेलीत भयानक bore होते पण मग कधीतरी तिच्या कानावर गाण्याचे आलाप पडतात. ते असतात गावातल्या हिरा मंडी या बदनाम एरियातील माधुरी म्हणजे बहार बेगम या तवायफचे. आलिया सरळ तिच्याकडे गाणं शिकायला जाते, तिथे सगळ्या गावात कोणी दुसरा गायन शिकवणारा गुरु नसतोच. त्या हिरामंडीत लोहारांच्या वस्तीत वरूण धवन हा अनाथ तरूण राहात असतो. मग तो आणि आलिया प्रेमात पडतात. मग बरीच गाणी नाच होतात. मग मधेच सोनाक्षी मरते, मरणाच्या वेळीही मेकअप, केशभूषा, वेशभूषा एकदम लग्नाला निघाल्यासारखी असते. मग आदित्यला आलिया आवडायला लागते. पुन्हा गाणी, नाच होतात. मग संजय दत्त आणि माधुरीचे संबंध असतात आणि वरुण त्यांची प्यार कि निशानी असतो, पण मग संजय दत्त माधुरीला सोडून देतो आणि माधुरीही वरुणला दूर ढकलते. त्यामुळे वरूण सूडाने पेटलेला असतो आणि आलियाकरवी संजय दत्तच्या खानदानाची बदनामी करणार असतो, हे already प्रेक्षकांनी guess केलेले रहस्य उघड होते. पण आलियाचे सच्चे प्रेम बघून त्याचे मन बदलते. या सगळ्यातच हिंदू मुस्लीम दंगे सुरु होतात, फाळणी होते, संजय दत्त भारतात निघून जातो. आदित्यलाही खरा प्रकार कळतो मग तो आलियाला जी ले अपनी जिंदगी म्हणतो. मग वरुणही तिला जी ले अपनी जिंदगी म्हणतो. आलियाचा नक्की निर्णय होत नाही, ते भारतात जायला ट्रेनमधे चढतात तेव्हा ती दोघांचाही हात धरते. पण मग वरूणला त्याचा एक दोस्त कम दुश्मन मारतो आणि आलिया आणि आदित्य भारतात येतात. संजय आणि माधुरीचं काय होतं कळत नाही. मधेच वरुण आणि सोनाक्षीची भुते येतात आणि रोमान्स करतात त्यामुळे आदित्य आणि आलियाही जिवंत असतात की मरतात ते कळत नाही. एकूण चित्रपटातल्या बर्‍याच गोष्टी कळत नाहीत. आपण हा चित्रपट तीन तास कसा सहन केला तेही कळत नाही