बसंतीला जणू देतो हुकुम गब्बर, 'चला नाचा !'

Submitted by सुप्रिया जाधव. on 22 December, 2018 - 23:12

विकोपाला भयंकर वाद गेले, कौल द्या ह्याचा
इमारत बांधल्यावर मागतो तो प्लॉट का त्याचा ?

नको पिटवूस डन्का मी तुझी कोणीच नसल्याचा
पुरावा मानते हा मी तुझे सर्वस्व असल्याचा

तुझी आजी तुझी आई तुझ्या बहिणी तुझ्या वहिन्या
बदलले ओतले मिश्रण, युगान्चा तोच तो साचा !

गळत नाही इथे पूर्वीप्रमाणे, ओल ही कसली ?
बुजवले तू जरी भगदाड बाकी राहिल्या खाचा

दरोडा घालणारा चोर जर नव्हता घरामधला ;
घराबाहेर खिडकीच्या कशा पडल्यात ह्या काचा ?

थिरकते जिंदगानी ढोलकीवरती प्रसंगांच्या
बसंतीला जणू देतो हुकुम गब्बर 'चला नाचा !'

कधीची वाजवत आहे कडी ती...आत घे आता
मनाच्या उंबऱ्यावरती तुझ्या झिजल्या तिच्या टाचा

सुप्रिया

Group content visibility: 
Public - accessible to all site users