(आरोग्य रक्षण आणि चाळणी चाचण्या)
(भाग ४ :
https://www.maayboli.com/node/65597)
वय ५० चे पुढे : आयुष्यावर बोलू काही !
आपण पन्नाशीच्या उंबरठ्यावर असतो तेव्हा अर्धशतक पूर्ण केल्याची एक सुखद भावना मनात असते खरी. पण त्याचबरोबर अजून किती काळ ‘नाबाद’ राहू याचीही हुरहूर लागते. समाजात आजारांचे प्रमाण एकूणच वाढलेले आहे. त्यात अनेक आजार प्रत्येक पिढीगणिक अलीकडच्या वयात होताना दिसत आहेत. सध्या ५०+ वयोगटात एकही व्याधी अथवा औषध चालू नसलेली व्यक्ती दुर्मिळ झाली आहे. बऱ्याच जणांच्या बाबतीत काही चाळणी चाचण्या चाळीशीच्या दरम्यानच पार पडलेल्या असतात.
या वयांत शिफारस केलेल्या मुख्य चाचण्या खालील आजारांसाठी आहेत:
मोठ्या आतड्याचा कर्करोग
स्तनांचा कर्करोग
गर्भाशयाच्या cervix चा कर्करोग आणि
मधुमेह
मोठ्या आतड्याच्या कर्करोग :
याचे प्रमाण पुरुषांमध्ये स्त्रियांच्या तुलनेत जास्त आहे. काही चाचण्यांच्या मदतीने जर आपल्याला या रोगाची चाहूल लवकर लागली तर त्याचा प्रतिबंध करता येतो तसेच उपचारही प्रभावी ठरतात. या रोगाची पूर्वसूचना देणारा एक विकार म्हणजे आतड्यात polyp होणे. हा विकार ५०+ वयांत होत असल्याने या गटातील सर्वांचीच चाचणी करावी असे तज्ञांचे मत आहे.
आता या आजाराची अधिक जोखीम कोणाकोणाला असते ते पाहू. अशांचे परत दोन गटात वर्गीकरण केले आहे:
उच्च जोखीम असणारे :
यात आतड्याचे खालील आजार झालेल्या व्यक्ती मोडतात:
* दीर्घकालीन ulcerative colitis
* Crohn disease
* अनुवांशिक polyposis चा आजार
(ulcerative colitis आणि Crohn disease हे मुळात आतड्याचे दाहविकार आहेत. त्यांत जुलाब होणे आणि त्यात रक्त व आव पडते).
मध्यम जोखीम असणारे :
* गट १ मध्ये उल्लेखिलेले आजार आई वडील वा भावंडे यांना असणाऱ्या व्यक्ती
* आहारात भाज्या व फळांचे प्रमाण कमी असणे
* भरपूर मेदयुक्त आहाराची सवय
* मद्यपान व धूम्रपान
आतड्याच्या कर्करोगाच्या चाळणी चाचण्या:
मुख्यत्वे ५०-७५ या वयोगटासाठी यांची शिफारस केलेली आहे. त्या दोन प्रकारच्या आहेत:
‘इमेजिंग’चे प्रकार: यात दुर्बिणीच्या सहाय्याने (scopy) आतडे पाहणे आणि CTscan च्या मदतीने केलेल्या अत्याधुनिक चाचण्यांचा समावेश आहे. त्या दर ५ वर्षांनी कराव्यात. पण उच्च जोखीम असल्यास दर २ वर्षांनी. या चाचण्यांमुळे कर्करोग पूर्व-प्राथमिक अवस्थेत ओळखता येतो. हे अत्यंत महत्वाचे आहे.
शौच प्रयोगशाळा-तपासणी : यात शौचात दडलेले रक्त आहे का ते पाहतात. पण जेव्हा ते सापडते तेव्हा प्रत्यक्ष कर्करोग झालेला असतो. त्यामुळे ही खऱ्या अर्थाने चाळणी चाचणी ठरत नाही.
ज्या व्यक्ती लठ्ठ आहेत आणि अतिरीक्त मद्यपान व धूम्रपानाच्या आहारी गेल्या आहेत त्यांनी या चाचण्या ४५ व्या वर्षीच सुरु कराव्यात. सर्वांनी ७५ व्या वर्षांनंतर मात्र या चाचण्यांच्या फंदात पडू नये.
स्तनांचा कर्करोग:
याचे विवेचन याआधीच्या वयोगटात झालेले आहे. इथे खालील मुद्दे लागू असल्यास रोगाची जोखीम अजून वाढते:
* स्वतःला यापूर्वी हाच कर्करोग झालेला असणे
* एकही मूल न होणे
* पहिले मूळ पस्तीशी ओलांडल्यावर होणे
* मासिक पाळी खूप उशीराच्या वयात बंद होणे
* पाळी बंद झाल्यानंतर हॉर्मोन्सचे उपचार घेणे
* लठ्ठपणा आणि अतिरीक्त मद्यपान टिकून असणे.
अशा जोखीमवाल्यांनी दरवर्षी mammography आणि स्तनांची MRI तपासणी करावी.
इथे एक मुद्दा लक्षात घ्यावा. स्त्रीच्या आयुष्यात जेव्हा मासिक पाळीची प्रथम सुरवात ते पूर्ण समाप्ती हा कालखंड खूप मोठा असतो तेव्हा एकूण cycles ची संख्याही वाढते. तसेच मूल न होणे, अथवा होऊन त्याला अंगावर न पाजणे या सर्वांमुळे cycles ची संख्या वाढते. परिणामी अशा स्त्रीला दीर्घकाळ इस्ट्रोजेनच्या प्रभावाखाली राहावे लागते. हा घटक या कर्करोगाची जोखीम वाढवतो.
Cervix चा कर्करोग :
याचेही विवेचन याआधीच्या वयोगटात झालेले आहे. तेव्हा अशा चाचण्या झाल्या नसल्यास आता जरूर कराव्यात. किमानपक्षी दरवर्षी स्त्रीरोगतज्ञाकडून जननेंद्रियाची तपासणी करून घ्यावी.
मधुमेह:
याचेही विवेचन पूर्वीच्या गटाप्रमाणेच. बऱ्याचदा या रोगाचे कुठलेही लक्षण नसेल तर चाचणी करणे टाळण्याकडे लोकांचा कल असतो. “मला काय धाड भरलीय, चांगला टूणटूणीत आहे मी”, अशा भ्रमात न राहता दर ३ वर्षांनी ग्लुकोज-पातळी,इ. तपासून घ्यावे.यातून जर मधुमेह उघडकीस आला तर मग कोलेस्टेरॉल व इतर मेदांचे प्रमाणही तपासून घ्यावे.
** ** ** **
काही बहुचर्चित पण शिफारस न केलेल्या चाचण्या :
अशा काही चाचण्यांबद्द्ल अनेकांच्या मनात शंकाकुशंका असतात. मुळात त्याची आंतरराष्ट्रीय पातळीवर शिफारस केलेली नसते. पण काही देशांत, विशिष्ट समूहांत किंवा ठराविक डॉक्टरांच्या मतानुसार त्या सांगितल्या जातात. त्यातून एकूणच रुग्णांचा गोंधळ वाढतो. अशा फक्त ३ चाचण्यांची दखल घेतो:
१. ‘ड’-जीवनसत्वाची रक्तपातळी :
या जीवनसत्वाचे शरीरात दोन प्रकार(forms) असतात( ड-२ व ड-३). त्यापैकी कुठला मोजायचा यावर एकमत नाही. हे मोजण्याच्या ज्या प्रयोगशाळा-पद्धती आहेत त्यांच्यात एकवाक्यता नाही. ‘नॉर्मल पातळी’ कशाला म्हणायचे याबाबतीतही गोंधळ आहे. एकाच रक्तनमुन्याची दोन ठिकाणी केलेली मोजणी बरीच जुळणारी नसते. अशा अनेक गुंतागुंतीत ही चाचणी अडकलेली आहे. तेव्हा संबंधित आजार रुग्णात थोडाफार दिसू लागला असेल तरच तिचा विचार व्हावा; सरसकट चाळणीसाठी नको.
२. ‘ब १२’-जीवनसत्वाची रक्तपातळी :
’ड’ प्रमाणेच त्यातील काही मुद्दे इथेही लागू होतात. चाचणीचे निष्कर्ष बऱ्याचदा विश्वासार्ह नसतात. समजा पातळी ‘नॉर्मल’ पेक्षा कमी असेल तरीही त्या व्यक्तीत संबंधित आजाराची लक्षणे बिलकूल नसतात. म्हणून काही त्रास (रक्तक्षय वगैरे) नसेल तर उठसूठ याच्या फंदात पडू नये. कधीकधी अशी टूम निघते की सर्व शाकाहारीनी हे प्रमाण बघून घ्यावे. पण अशा सरसकटीकरणाला तसा अर्थ नाही.
३. प्रोस्टेट-कर्करोगाची PSA चाचणी:
प्रगत देशांत हिचा खूप बोलबाला आहे. पण निव्वळ एक चाचणी करून काही साध्य होत नाही. त्यावरून निष्कर्ष काढणे अवघड असते.
म्हातारपण आणि काही चाचण्यांचे निष्कर्ष :
आपण जेव्हा रक्तावर एखादी रासायनिक चाचणी करतो तेव्हा तिची ‘नॉर्मल’ पातळी दोन अंकांच्या मध्ये दाखवतात. उदा. युरीआची पातळी ही २० – ४० mg/dL असते. साधारण प्रयोगशाळा-रिपोर्ट्समध्ये दाखवलेली ही पातळी ही प्रौढ व्यक्तीची असते. लहान मुले आणि वृद्ध यांचे बाबतीत या पातळीत काही चाचण्यांसाठी फरक असतो. ६५ वयानंतर काही चाचण्यांच्या बाबतीत जो फरक पडतो तो ध्यानात घेणे महत्वाचे आहे. अशा ३ महत्वाच्या चाचण्या या आहेत:
१. युरिआ (मूत्राविकारांसाठी)
२. क्रिअॅटीनिन ( ,, )
३. TSH (थायरॉइड साठी)
या सर्वांच्या पातळीची ‘वरची’ मर्यादा (upper limit) ही प्रौढांपेक्षा जास्त असते. तेव्हा रिपोर्टवरून निष्कर्ष काढताना हे लक्षात घेतले पाहिजे.
याबरोबर वयोगटानुसार चाचण्यांचे विवेचन संपत आहे. पुढचा आणि अंतिम भाग हा ‘खास स्त्री विभाग’ आहे आणि त्यात विवेचन असेल ते गरोदरपणातील चाचण्यांचे.
*********************
भाग ६ इथे आहे: https://www.maayboli.com/node/65714
(क्रमशः)
Skip to main content
Submitted by suruchi13 on 1 April, 2018 - 11:59
सुरुची,
फक्त एका रिपोर्ट वरून काळजी नको. काही मुद्दे ध्यानात घ्या:
१. तुमच्या lab ने Serum Creatinine ची जी रेंज दिली आहे (वरचे १.४) ती पुरुष व स्त्री या दोघांसाठी वेगळी दाखवली आहे का? नसल्यास ती पुरुषाची समजा. स्त्रीची वरची पातळी ही पुरुषापेक्षा सुमारे ०.३ ने कमी असते.
- लॅब ने एकच रेंज दाखविली आहे.
२. तुमची युरिआ किती आहे? त्याची Serum Creatinine शी सांगड घालता येईल.
- Urea 23 आहे. (15-45). म्हणजे urea आणि creatinine या दोन्ही values वरून ठरवावं लागेल तर.
३. तुमचा रक्तदाब व लघवीची रुटीन तपासणी नॉर्मल आहे ना तेही बघा.
- हो, नॉर्मल आहे.
४. सध्या कोणतेही रोग-लक्षण नसल्यास काळजी नको.
- प्रतिसादाबद्दल आभार. माझ्या मनात अजून एक प्रश्न आहे. Auto immune diseases आनुवंशिक असतात का?
- सुरुचि
Auto immune diseases आनुवंशिक
Auto immune diseases आनुवंशिक असतात का? >>>>
होय, बर्यापैकी. काहींच्या बाबतीत विशिष्ट 'जीन्स' चा शोध लागलेला आहे. काही आजार दोन्ही जुळ्या भावंडांना होतात, तर काही प्रथम दर्जाच्या नात्यात दिसून येतातच.
थायरॉइड आजारात अनुवांशिकतेचा वाटा मोठा आहे. जर आईची थाय- कमतरता ही Hashimoto thyroiditis मुळे असेल तर तिच्या मुलीला ती होण्याची शक्यता सामान्य मुलींपेक्षा ९ पट जास्त आहे. हा एक Auto immune diseaseच आहे.
Crohn disease .. मला आहे हा
Crohn disease .. मला आहे हा आजार
कधीच बरा होणार नाही. फक्त कंट्रोल करू शकतो.
कोलोनोस्कोपी केल्यावर सापडला. आतापर्यंत दोन कोलोनोस्कोपी झाल्या आहेत. बहुधा पुढेही होतील कित्येक. त्याआधी हा ओळखणे कठीण असल्याने हालही बरेच झालेत. आतड्याच्या क्षयरोगाची (टीबीची) 9 महिन्यांची ट्रीटमेंट कम्प्लीट करून झाली आहे. दोघांची म्हणे लक्षणे सेम असतात. पण नंतर मात्र Crohn disease. कन्फर्म झाला हे नशीब. खरे तर तेव्हा डॉक्टर म्हणालेले टीबी असल्यास नशीब समज आणि पेढे वाट. कारण हा त्यापेक्षा डेंजर आहे. पण बहुधा हाच नशीबात होता. आता आहे तर आहे आयुष्यभराचा सोबती. चांगली गोष्ट एकच आहे, तुर्तास तरी यामुळे मी मरणार नाही..
येनीवेज.. आधी मी या ग्रूपात जॉईन नसल्याने हे लेख वाचण्यात आले नव्हते. दोनेक वरवर चाळले त्यात हे ओळखीचे सापडले. आणि त्यामुळे अचानक ही लेखमाला फार उपयुक्त वाटू लागली आहे. हळूहळू वाचतो सारे लेख. या लेखमालेबद्दल धन्यवाद
ऋन्मेऽऽष, आभारी आहे.
ऋन्मेऽऽष, आभारी आहे.
तब्बेतीसाठी शुभेच्छा
या जीवनाच्या टप्प्यावर अनेक
या जीवनाच्या टप्प्यावर अनेक ताणतणावाचे रोग होण्याची शक्यता असते, उदा. रक्तदाब, हृदयविकार, मानसिक ताणामुळे होणारे विकार,
स्थूलता व त्यामुळे होणारे विकार इ. त्यांचे नियंत्रण होणे खूप महत्त्वाचे अहे. बिघडणा-या जीवनशैलीतील बदल फार मोठा परिणाम करतात.
जगात यामुळे दीड कोटी व्यक्ती प्रतिवर्षी मृत्युमुखी पडतात.
रक्तदाब 120/८० च्या पर्यंत
रक्तदाब 120/८० च्या पर्यंत असणे आवश्यक आहे. १३०/९० असेल किंवा १४०/८० किंवा ९० असेल तर जीवनशैलीत बदल कारणे जरुरी आहे,
अशा वेळेस औषधांची सहसा योजना करावी लागत नाही. त्यानंतर मात्र लागते. अलीकडे वयानुसार ३० ते ३५ वयोगटामध्ये सर्व चाचण्या
करून घेणे महत्त्वाचे आहे. रक्तदाबाची लक्षणे लक्षात येत नाहीत किंवा काहीही नसण्याची शक्यता असते. रक्तदाब असणाऱ्या १२.५% व्यक्तींमध्ये
निदान होण्याची संभावना असते.
डॉ रवी, पूरक माहितीबद्दल आभार
डॉ रवी, पूरक माहितीबद्दल आभार .
व्यायामही प्रमाणात व योग्य
व्यायामही प्रमाणात व योग्य प्रकारचा असणे ही या काळामध्ये एक आवश्यक बाब आहे. चालणे, पळणे, श्वसनाचे, तसेच शक्तीसामार्थ्य
वाढविण्याचे अशा गोष्टी जीवनाचा अतिशय अविभाज्य अंग आहे. दररोज करण्यासारखी जरुरीची आहे. बहुतेक(९० ते ९५ %) विकार त्यामुळे
टाळता येतात, जीवनाची गुणवत्ता वाढते तसेच दीर्घायुष्याचे वरदानही मिळण्याची शक्यता वाढते. केवळ वेळ मिळत नाही, कंटाळा किंवा आळस
यामुळे बहुतेक व्यक्ती व्यायाम करण्याचे टाळतात. नुसते चालणे किंवा नुसती योगासने कारणे यांच्यावर अवलंबून राहणे हे पूर्णपणे शास्त्रीय नव्हे.
तज्ज्ञ-सल्ला घेऊनच व्यायाम करायला हवा. आहाराच्या बाबतीतसुद्धा तसेच म्हणावे लागेल. किती आहार घ्यावा, कोणता घ्यावा, कसा घ्यावा ,
काय खावे इ. बाबतीत तज्ज्ञांचा सल्ला घेणे फार आवश्यक आहे. डाएटीशियन योग्य सल्ला देऊ शकतात.
व्यायामही प्रमाणात व योग्य
व्यायामही प्रमाणात व योग्य प्रकारचा असणे ही या काळामध्ये एक आवश्यक बाब आहे. चालणे, पळणे, श्वसनाचे, तसेच शक्तीसामार्थ्य वाढविण्याचे अशा गोष्टी जीवनाचा अतिशय अविभाज्य अंग आहे. दररोज करण्यासारखी जरुरीची आहे. बहुतेक(९० ते ९५ %) विकार त्यामुळे टाळता येतात, जीवनाची गुणवत्ता वाढते तसेच दीर्घायुष्याचे वरदानही मिळण्याची शक्यता वाढते. केवळ वेळ मिळत नाही, कंटाळा किंवा आळस यामुळे बहुतेक व्यक्ती व्यायाम करण्याचे टाळतात. नुसते चालणे किंवा नुसती योगासने कारणे यांच्यावर अवलंबून राहणे हे पूर्णपणे शास्त्रीय नव्हे.तज्ज्ञ-सल्ला घेऊनच व्यायाम करायला हवा. आहाराच्या बाबतीतसुद्धा तसेच म्हणावे लागेल. किती आहार घ्यावा, कोणता घ्यावा, कसा घ्यावा ,काय खावे इ. बाबतीत तज्ज्ञांचा सल्ला घेणे फार आवश्यक आहे. डाएटीशियन योग्य सल्ला देऊ शकतात.
कुमारजी खूप उपयुक्त माहिती...
कुमारजी खूप उपयुक्त माहिती....
धन्यवाद .
आतापर्यंत कर्करोग निदानाची
आतापर्यंत कर्करोग निदानाची अंतिम चाचणी ही बऱ्याच वेळेस ‘अवयवाची बायोप्सी’ ही आहे. यात रुग्णाच्या शरीरात सुई घालायची असल्याने ती प्रक्रिया वेदनादायक असते.
त्याला पर्याय म्हणून आता निव्वळ रक्ताच्या नमुन्यावरच करायची अंतिम निदान चाचणी विकसित झाली आहे. संबंधित बातमी आजच्या छापील ‘सकाळ’च्या पान ३ वर आहे.
(इ-दुवा मिळण्यात अडचण येत आहे)
जगात ३ ठिकाणी झालेल्या या संशोधनात नाशिकमधल्या वैद्यकीय केंद्राचाही समावेश आहे.
अभिनंदन !
डॉक्टरसाहेब अक्रोमेगाली
डॉक्टरसाहेब अक्रोमेगाली पेशंट साठी पॉलीप टेस्ट मस्ट आहे का ? त्यांना आतड्याचा कॅन्सर होण्याची शक्यता जास्त असते का?
प्रदीप, चांगला प्रश्न.
प्रदीप, चांगला प्रश्न.
होय, अॅक्रोमेगली रुग्णांमध्ये आतड्यातील पॉलीपसाठीची तपासणी करण्याची शिफारस आहे.
अशा रुग्णांमध्ये पॉलीप होण्याचे प्रमाण सामान्य माणसाच्या तुलनेत सुमारे तीन पट जास्त असते.
अर्थात या विषयावर डॉ ची मतांतरे असू शकतील.
वरील प्रदीप यांच्या
वरील प्रदीप यांच्या प्रश्नाच्या निमित्ताने acromegaly या आजाराबद्दल थोडीशी माहिती :
हा आजार मेंदूतील पिट्युटरी ग्रंथीमध्ये ट्यूमर झाल्यामुळे होतो. >>>
त्यातून ग्रोथ हार्मोन खूप प्रमाणात स्त्रवते >>>
त्याचे शरीरावर अनेक परिणाम होतात.
त्यापैकी एक म्हणजे, मोठ्या आतड्यात स्थानिक पेशींची वाढ प्रमाणाबाहेर होते >>>
त्यातून polyp निर्माण होते. >>>
यातून कर्करोगाचा धोका वाढू शकतो.
धन्यवाद डॉ .कुमार
धन्यवाद डॉ .कुमार
वर 3 वर्षांपूर्वी राज यांनी
वर 3 वर्षांपूर्वी राज यांनी एक चांगला प्रश्न विचारला होता तो असा :
“डॉक्टरसाहेब, कोलनास्कपी आणि प्रोस्टेट्स चेकपच्या सध्याच्या चाचणी परिक्षेच्या पद्धतीत, रुग्णाच्या दृष्टीकोनातुन काहि सोयीचे बदल आणण्यासारखे आहेत का? ”
Submitted by राज on 27 March, 2018 - 21:38
….
त्यादृष्टीने काही संशोधन प्रगतिपथावर आहे. आतड्याच्या कर्करोगाची सूक्ष्म सुरुवात जरी झाली असेल तरी त्या स्थितीत रुग्णाच्या रक्तात एक विशिष्ट प्रकारचा ट्यूमर डीएनए आढळतो. रुग्णाच्या साध्या रक्ततपासणीवरून तो शोधता येतो. त्या दृष्टीने LUNAR-2 ही रक्तचाचणी विकसित होत आहे. तिचे निष्कर्ष खूप आशादायक आहेत.
त्याच्या जोडीला शौच तपासणीतून काही विशिष्ट उपयुक्त माहिती मिळण्यासंबंधीही संशोधन चालू आहे.
>>>>>>>>>आजकाल बर्याच ठिकाणी
>>>>>>>>>आजकाल बर्याच ठिकाणी कोलनास्कपी साठी रुग्णाला संपूर्ण भूल देतात त्यामुळे झोपेत काय होते ते अजिबात कळत नाही.
करेक्ट!!! माझी पहीली वहीली कोलॉनॉस्कॉपी पुढच्या महीन्यात आहे. त्याकरता मग ते गॅलनभर ट्रान्स्परन्ट द्रव्य प्या, फक्त लेमन जेलोच खा आणि बरेच सोपस्कार आहेत. याईक्स!!! भीती वाटतेय
डॉक्टर म्हणाले भूल देण्यात येईल
@अजय हाहाहा डॉलर उकळण्याची
@अजय हाहाहा डॉलर उकळण्याची आयडीया/किस्सा भारी आहे.
खरे cervical कॅन्सर
खरे तर cervical कॅन्सर प्रिव्हेन्शनकरता एक गार्ड्सिल नावाचा शॉट असतो. मला आजतागायत या शॉटबद्दल माहीतच नव्हते. परवा माझ्या गायनॅकला विचारले की मी एलिजिबल आहे का द्या मला तो शॉट. तर कळले की फक्त ४५ वर्षापर्यंतच FDA Approved आहे ती म्हणाली आता फक्त हेल्दी लाईफस्टाइल ठेव, वजन कमी कर. तेवढच आपण करु शकतो.
सामो, तो शॉट एचपीव्ही रिलेटेड
सामो, तो शॉट एचपीव्ही रिलेटेड डिसिजेस साठी आहे. जर व्यक्ती मोनॉगॅमस रिलेशनशिप मध्ये बराच काळ असेल तर फारशी गरज ही नाही कारण एचपीव्ही सेक्शुअली ट्रान्स्मिटेड व्हायरस आहे. (अर्थात डॉक्टर लोक अधिक सविस्तर सांगतील.)
>>>>>आपण पन्नाशीच्या
>>>>>आपण पन्नाशीच्या उंबरठ्यावर असतो तेव्हा अर्धशतक पूर्ण केल्याची एक सुखद भावना मनात असते खरी. पण त्याचबरोबर अजून किती काळ ‘नाबाद’ राहू याचीही हुरहूर लागते.
करेक्ट!!! मस्त वाटतं एवढं आयुष्य जगायला मिळाल्याबद्दल पण पुढचा प्रत्येक दिवस बोनस आहे हेही जाणवतं. मुलं मार्गी लागावीत पटापट ब्वॉ असे वाटते. पण एकंदर मिळालेल्या आयुष्याबद्दल कृतज्ञतेचीच भावना आहे.
>>>>>>सामो, तो शॉट एचपीव्ही
>>>>>>सामो, तो शॉट एचपीव्ही रिलेटेड डिसिजेस साठी आहे. जर व्यक्ती मोनॉगॅमस रिलेशनशिप मध्ये बराच काळ असेल तर फारशी गरज ही नाही कारण एचपीव्ही सेक्शुअली ट्रान्स्मिटेड व्हायरस आहे. (अर्थात डॉक्टर लोक अधिक सविस्तर सांगतील.)
ओह रिअली. हां मग काही हरकत नाही धन्यवाद.
>>याईक्स!!! भीती वाटतेय<<
>>याईक्स!!! भीती वाटतेय<<
तुम्हाला अजुन घाबरवायचा हेतु अजिबात नाहि. पण अॅक्च्युअल प्रोसिजर जेव्हढि स्मुथ (नो पन इंटेंडेड... ) आहे त्याच्या कितीतरी पटिने उलट प्रेपरेशन आहे. चोवीस तास आधी स्ट्रिक्टली लिक्विड डाएट, जेलो वर रहाणे वाज किलिंग मी. पण एक आहे, योर कोलन एंड्स अप गेटिंग स्क्विकि क्लीन...
(No subject)
>>>>कितीतरी पटिने उलट
>>>>कितीतरी पटिने उलट प्रेपरेशन आहे. चोवीस तास आधी स्ट्रिक्टली लिक्विड डाएट, जेलो वर रहाणे वाज किलिंग मी.
होय मी नवर्याचे हाल याचि देही याचि डोळा पाहीलेले आहेत
केवढं ते लिक्विड प्यायचं असतं.
>>>>>योर कोलन एंड्स अप गेटिंग स्क्विकि क्लीन... Proud
हाहाहा
मस्त जेलोस खूप खाणारे मी. व ते लिक्विड + स्प्राईट पीईन म्हणते.
सामो
सामो
त्या आधीच्या मानसिक तयारीसाठी शुभेच्छा !
धन्यवाद कुमार सर.
धन्यवाद कुमार सर.
सर, PSA test बद्द्ल जरा
सर, PSA test बद्द्ल जरा माहिती द्या ना.
साद,
साद,
PSA रक्तचाचणी
PSA हे प्रोस्टेट ग्रंथीमधून स्त्रवणारे एक एंझाइम आहे. निरोगी अवस्थेत त्याचे रक्तातील प्रमाण अत्यल्प असते. वाढत्या वयानुसार ते थोडे वाढते. जशी प्रोस्टेट ग्रंथी आकाराने वाढू लागते तसे त्याच्या प्रमाणात वाढ होते. जर का एखाद्याच्या प्रोस्टेट ग्रंथी मध्ये कर्करोगाची सुरवात झाली तर हे प्रमाण झपाट्याने वाढू लागते. कर्करोगाच्या पेशी या निरोगी प्रोस्टेटपेशीं पेक्षा PSAची दहापट अधिक निर्मिती करतात.
अर्थात पन्नाशीनंतर प्रत्येक पुरुषाने ही रक्तचाचणी करावी का हा भयंकर वादग्रस्त मुद्दा आहे. अलीकडील संशोधनानुसार प्रत्येकाने ही चाळणी चाचणी करू नये कारण त्यात फॉल्स पॉझिटिव्ह येण्याची शक्यता असते. त्यातून संबंधित व्यक्तीच्या मनात गोंधळ उडतो.
ज्या पुरुषांच्या बाबतीत या कर्करोगाचा कौटुंबिक इतिहास असेल त्यांच्या बाबतीत ही चाचणी जरूर करावी (अर्थात डॉक्टरांच्या सल्ल्यानुसार). निव्वळ या रक्तचाचणीवरून एकंदरीत प्रोस्टेटच्या भवितव्यासंबंधी निष्कर्ष काढणे कटकटीचे होऊन बसलेले आहे. म्हणून अलीकडे या चाचणीऐवजी प्रोस्टेटचा एमआरआय स्कॅन करणे यावर अधिक अभ्यास चालू आहे. भविष्यात त्याला यश आल्यास चाळणी म्हणून निव्वळ स्कॅन ही (खर्चिक परंतु सोपी) चाचणी अस्तित्वात येऊ शकेल.
धन्यवाद डॉ.
धन्यवाद डॉ.
Pages